«Արևմուտքի երկրներն անտեսում են Բելառուսում պետական հեղաշրջման նախապատրաստման և Լուկաշենկոյի սպանության պլանավորման փաստերը». Պուտին

Արևմուտքի երկրներն անտեսում են Բելառուսում պետական հեղաշրջման նախապատրաստման և երկրի նախագահ Ալեքսանդր Լուկաշենկոյի սպանության պլանավորման փաստերը: Այս մասին Դաշնային ժողովին հղած ուղերձում հայտարարել է Ռուսաստանի նախագահ Վլադիմիր Պուտինը, փոխանցում է ՏԱՍՍ-ը։

Նա ընդգծել է, որ վերջին շրջանում քաղաքական շարժառիթներով սահմանված ապօրինի պատժամիջոցները և առանձին պետությունների՝ իրենց կամքը ուրիշներին պարտադրելու փորձերը սովորական պրակտիկա են դարձել։

«Բայց այսօր նման պրակտիկան վերածվում է ավելի վտանգավոր մի բանի։ Նկատի ունեմ Բելառուսում պետական հեղաշրջում կազմակերպելու և այդ երկրի նախագահի սպանության ուղղակի փորձի՝ վերջերս հայտնի դարձած փաստերը։ Ընդ որում, հատկանշական է, որ նույնիսկ նման աղաղակող փաստերը չեն արժանանում այսպես կոչված՝ հավաքական Արևմուտքի դատապարտմանը։ Ոչ ոք դա պարզապես չի նկատում, բոլորը ձևացնում են՝ ոչինչ տեղի չի ունենում»,- նշել է ՌԴ նախագահը։

Պուտինն ընդգծել է՝ պետական հեղաշրջումների կազմակերպումն ու բարձրագույն պաշտոնատար անձանց սպանության փորձն անթույլատրելի են՝ անկախ Բելառուսի նախագահի քաղաքականության նկատմամբ վերաբերմունքից:

«Իսկ ի՞նչ կլիներ, եթե Բելառուսում պետական հեղաշրջման փորձն իսկապես ձեռնարկվեր։ Քանի՞ մարդ կտուժեր։ Ինչպե՞ս կդասավորվեր Բելառուսի ճակատագիրը։ Ոչ ոք այդ մասին չի մտածում այնպես, ինչպես որ ոչ ոք չէր մտածում Ուկրաինայի ճակատագրի մասին, երբ այդ երկրում պետական հեղաշրջում տեղի ունեցավ»,- եզրափակել է Ռուսաստանի նախագահը։