Բերդի համայնքապետը գրավի դիմաց ազատ կարձակվի

«News.am»-ը գրում է․

«Հակակոռուպցիոն գործերով քրեական դատարանն այսօր՝ հոկտեմբերի 7-ին, Բերդ խոշորացված համայնքի ղեկավար Հարություն Մանուչարյանին ազատ արձակելու որոշում է կայացրել։

Դատարանը բավարարել է շուրջ 11 ամիս անազատության մեջ գտնվող Հարություն Մանուչարյանի պաշտպաններ Արման Թամրազյանի և Հայկ Ալումյանի միջնորդությունը և նրան գրավի դիմաց ազատ արձակել։

«Մենք գտնում էինք, որ որևէ տեսակի խափանման միջոց կիրառելու հիմք չկա, բայց չբացառելով, որ դատարանը կարող է համարել խափանման միջոց կիրառելու հիմք կա, միջնորդել էինք վերացնել որևէ տեսակի խափանման միջոցը կամ կալանքը փոխարինել գրավով։ Գրավը սահմանվել է 6 միլիոն դրամ։ Գրավի գումարը վճարելուն պես Հարություն Մանուչարյանը պետք է ազատ արձակվի»,- «News.am»-ի հետ զրույցում ասաց պաշտպան Հայկ Ալումյանը։

Նշենք, որ Հարություն Մանուչարյանի գործը դատաքննության փուլում է, գործով բոլոր վկաներն ըստ Ալումյանի, հարցաքննվել են։

Հիշեցնենք՝ Հարություն Մանուչարյանը մեղադրվում է պաշտոնեական լիազորությունները չարաշահելու և պաշտոնեական կեղծիք կատարելու մեջ, սակայն իրեն առաջադրված մեղադրանքը չի ընդունում, վստահեցնում է, որ ինքը քաղաքական հետապնդման է ենթարկվում։ Տեղեկություններ կան, որ Մանուչարյանին պատժել են 2021 թվականի խորհրդարանական ընտրություններին ՔՊ-ին չաջակցելու համար։

Նա կալանավորվել էր 2021 թվականի նոյեմբերի 9-ին։ 

Հիշեցնենք նաև, որ սեպտեմբերի 25-ին, Բերդ խոշորացված համայնքում անցկացված ՏԻՄ ընտրություններում հաղթել էր Հարություն Մանուչարյանի գլխավորած դաշինքը՝ «Զորավոր համայնքը»։

Ձայները բաշխվել են հետևյալ կերպ՝ «Զորավոր համայնք» դաշինքը ստացել է 5683 ձայն, «Քաղաքացիական պայմանագիր» կուսակցությունը՝ 4297 ձայն, իսկ «Արժանապատիվ սերունդ» դաշինք էլ՝ 1095 ձայն։ Բերդ խոշորացված համայնքում մանդատների ընդհանուր թիվը 21-ն է. «Զորավոր համայնքը» ունի 11, ՔՊ-ն՝ 8, «Արժանապատիվ սերունդն» էլ՝ 2 մանդատ։

Քանի որ «Զորավոր համայնքը» ավագանու անդամների տեղերի 50 տոկոսից ավելին է ստացել, ապա այդ կուսակցությունների դաշինքի թեկնածուների ցուցակի առաջին հորիզոնականում գտնվող անձն օրենքի ուժով համարվում է ընտրված համայնքի ղեկավար։ Սակայն Հարությունը Մանուչարյանը, ինչպես նաև ցուցակի երկրորդ հորիզոնականը զբաղեցնող Սամվել Հովսեփյանը և 10-րդ համար Սարգիս Մարգարյանը ինքնաբացարկի դիմում են ներկայացրել։