Չինաստանը պատժամիջոցներ կկիրառի Փելոսիի և նրա ընտանիքի նկատմամբ

«Shantnews»-ի փոխանցմամբ՝ Չինաստանը պատժամիջոցներ կկիրառի ԱՄՆ Կոնգրեսի Ներկայացուցիչների պալատի նախագահ Նենսի Փելոսիի և նրա մերձավոր ընտանիքի նկատմամբ Թայվան կատարած այցից հետո։ Այս մասին հայտնել է Չինաստանի ԱԳՆ-ն։

Փելոսին կղզի է ժամանել օգոստոսի 2-ին և իր այցն անվանել «թայվանական ժողովրդավարությանն աջակցելու ԱՄՆ հանձնառության վկայություն»: Սա ԱՄՆ Կոնգրեսի Ներկայացուցիչների պալատի խոսնակի առաջին պաշտոնական այցն է Թայվան` վերջին 25 տարվա ընթացքում։ Չինաստանը խստորեն բողոքեց ԱՄՆ-ի դեմ և խոստացավ պատասխան քայլեր ձեռնարկել։

Օգոստոսի 4-ին Չինաստանի Ժողովրդա-ազատագրական բանակը (PLA) եռօրյա լայնամասշտաբ զորավարժություններ է սկսել Թայվանի շրջակայքում: Հինգ հրթիռ է արձակվել. դրանք ընկել են Ճապոնիայի Բացառիկ տնտեսական գոտում։ Չինաստանի ԱԳՆ-ն հայտարարել է, որ Թայվանի նեղուցում բոլոր բախումները պայմանավորված են Միացյալ Նահանգների գործողություններով․ առանց խոսնակի այցի իրադարձություններն այլ կերպ կզարգանային։

Սպիտակ տան ազգային անվտանգության խորհրդի ռազմավարական հաղորդակցության համակարգող Ջոն Քիրբին ասել է, որ ԱՄՆ-ը դատապարտում է PLA-ի բալիստիկ հրթիռների արձակումը:

Միաժամանակ Կրեմլի խոսնակ Դմիտրի Պեսկովը Փելոսիի այցը Թայվան անվանել է անհարկի սադրանք, իսկ Չինաստանի մանևրները կղզու շուրջ՝ որպես ինքնիշխան իրավունք։

Թայվանը Չինաստանի մի մասն է, սակայն երկար տասնամյակներ ապրում է որպես անկախ պետություն։ ԱՄՆ-ը պնդում է, որ չի վիճարկում Չինաստանի կողմից կղզու սեփականությունը՝ միաժամանակ աջակցություն ցուցաբերելով Թայվանի իշխանություններին։

ՉԺՀ կառավարության և նրա կղզու նահանգի միջև պաշտոնական հարաբերությունները խզվել են 1949 թվականին, շփումները վերսկսվել են 1980-ականների վերջին։