Լրահոս
Սփյուռք
16:00
20.06.24
225

Հայազգի Ռայա Նազարյանն ընտրվել է Բուլղարիայի խորհրդարանի նախագահ

Img default alt hy

Բուլղարիայի 50-րդ Ազգային ժողովի (Խորհրդարանի) նախագահ է ընտրվել «Քաղաքացիները հանուն Բուլղարիայի եվրոպական զարգացման» կուսակցության և Ժողովրդավարական ուժերի միություն (GERB - SDS) դաշինքի պատգամավոր Ռայա Նազարյանը։ Նրա թեկնածությունը պաշտպանել է 131 պատգամավոր, դեմ է քվեարկել 66, ձեռնպահ՝ 39 պատգամավոր։

Ընտրվելուց հետո Ռայա Նազարյանն իր ելույթում նշել է, որ խորհրդարանն՝ անկախ հասարակության վստահության աստիճանից, գործադիր և օրենսդիր իշխանությունների լեգիտիմացման միակ հարթակն է։

«Այդ իսկ պատճառով մեր յուրաքանչյուր ներկայացուցչի ընդհանուր պարտականությունն է ապահովել քաղաքական գործընթացների կարգավորումը և արդարացնել հասարակության ակնկալիքները՝ կապված կայունության, անվտանգության և արդարության հետ»,- ասել է նա։

Նազարյանի հիմնական մրցակիցը՝ «Վերածնունդ» կուսակցության ներկայացուցիչ Պետար Պետրովը, ստացել է 54 ձայն։ Նազարյանն ավելի քան 12 տարի զբաղվել է իրավաբանությամբ, մեծ փորձ ունի բուլղարական դատարաններում կոմերցիոն, քաղաքացիական և վարչական դատավարություններում:

1985 թ. սեպտեմբերի 16-ին Վառնա քաղաքում ծնված Ռայա Նազարյանը Միջնորդության և իրավական վեճերի արտադատական լուծման մասնագետ է, Սոֆիայի փաստաբանների միության անդամ, Իրավաբանական ընկերության գործընկեր և համահիմնադիր: Ռայա Նազարյանը քաղաքականություն է մտել 2022 թ.: