Լրահոս

2022-02-09
  • Img default alt hy
    Հասարակական
    Տեխնիկական աջակցություն կտրամադրվի ՀԱԲԼԾԿ լաբորատորիաներին
    Եվրոպական Միության ֆինանսավորմամբ և Ավստրիական զարգացման համագործակցության համաֆինանսավորմամբ իրականացվող «Կանաչ գյուղատնտեսության նախաձեռնությունը Հայաստանում» (EU-GAIA) ծրագրի շրջանակներում՝ այսօր փոխըմբռնման հուշագիր է ստորագրվել ՀՀ սննդամթերքի անվտանգության տեսչական մարմնի և Ավստրիական զարգացման գործակալության միջև: Այս մասին հաղորդում է Սննդի անվտանգության տեսչական մարմինը: Այս հուշագրի ստորագրմամբ ՍԱՏՄ ղեկավար Գեորգի Ավետիսյանն ու ԵՄ «Կանաչ գյուղատնտեսության նախաձեռնությունը Հայաստանում» ծրագրի թիմի ղեկավար Պասխալիս Բոկկերսը հաստատել են ընդհանուր նպատակը՝ ամրապնդել տեսչական մարմնի և դրա ենթակայությամբ գործող «Հանրապետական անասնաբուժասանիտարական և բուսասանիտարական լաբարատոր ծառայությունների կենտրոն» ՊՈԱԿ-ի մասնագետների ինստիտուցիոնալ և տեխնիկական կարողությունները՝ սննդի անվտանգության վերահսկման ոլորտում ռիսկերի գնահատման և ռիսկերի կառավարման ընթացակարգերի ներդրման միջոցով, ինչպես նաև խթանելով ԵՄ սննդի համակարգի ստանդարտները և սննդի որակի վերահսկման մեխանիզմը՝ ՀՀ անասնաբուժական և բուսասանիտարական ոլորտներում: Սա նաև հիմք է սննդամթերքի անվտանգության ոլորտի տեխնոլոգիական զարգացման ուղղությամբ համագործակցելու համար. ՍԱՏՄ անձնակազմին կտրամադրվեն ուսումնական ծրագրեր, որոնք ներառում են նաև վերապատրաստումներ: Ծրագիրը նախատեսում է տեխնիկական աջակցության տրամադրում ՀԱԲԼԾԿ լաբորատորիաներին, ներառյալ` թունաքիմիկատների մնացորդների հայտնաբերման ժամանակակից մեթոդների ներդնում, լաբորատորիայի ներկայիս սարքավորումների արդիականացում և նոր ներդրված մեթոդների շուրջ՝ լաբորատորիայի անձնակազմի կարողությունների զարգացում։ Այս համագործակցությունը մեծապես կնպաստի ՍԱՏՄ կարողությունների զարգացմանն ու վերահսկողության գործիքների օգտագործումը կդարձնի առավել հասցեական:
    20:40
    09.02.22
    Ավելին
  • Img default alt hy
    Հասարակական
    ՌԴ-ի աջակցությամբ Հայաստան է վերադարձել Ադրբեջանում պահվող 127 անձ. Զախարովա
    2020 թվականի դեկտեմբերից (Արցախյան պատերազմից հետո – խմբ.) ռուսական խաղաղապահ զորախմբի միջնորդությամբ ընդհանուր առմամբ 146 մարդ է վերադարձվել։ 127-ը` հայկական կողմին, 19-ը` ադրբեջանական։ Այս մասին ամենշաբաթյա ճեպազրույցի ընթացքում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ «Ռուսաստանը ողջունում է Ադրբեջանի կողմից այս տարվա փետրվարի 7-ին հայկական կողմին 8 զինծառայողի փոխանցումը։ Կարևոր է հնարավորինս արագ վերջնականապես վերացնել այդ խանգարող երևույթը` հայ–ադրբեջանական հարաբերությունների այդ խնդրահարույց հարցը, ավարտել «բոլորը բոլորի դիմաց» ձևաչափով պահվող անձանց փոխանակումը», – ասել է նա։ Ըստ նրա` Ռուսաստանը կարևորում է զուգահեռաբար հակամարտության ընթացքում անհետ կորած անձանց ճակատագիրը պարզելու հարցում ջանքեր գործադրելը և աջակցելու է գործընթացին ինչպես ազգային մակարդակով, այնպես էլ որպես ԵԱՀԿ ՄԽ համանախագահ։
    20:28
    09.02.22
    Ավելին
  • Img default alt hy
    Տարածաշրջան
    Թուրքիայում ակնկալում են, որ Վլադիմիր Պուտինն իրենց երկիր կայցելի փետրվարի 14-ին
    Թուրքիայում ակնկալում են, որ ՌԴ նախագահ Վլադիմիր Պուտինն իրենց երկիր կայցելի փետրվարի 14-ին։ Այս մասին «Ռիա նովոստի»-ին ասել է դիվանագիտական օղակներում նրա աղբյուրը։ Ավելի վաղ ՌԴ նախագահի մամուլի խոսնակ Դմիտրի Պեսկովը հայտարարել էր, որ Վլադիմիր Պուտինի՝ Թուրքիա կատարելիք այցի օրը դեռ որոշված չէ, սակայն այցը կայանալու է։ «Այցի ժամկետը կհրապարակվի մոտ օրերս։ Հնարավոր է, որ Պուտինի այցը փետրվարի 14-ին տեղի ունենա»,- այս առնչությամբ ասել է գործակալության աղբյուրը։
    20:20
    09.02.22
    Ավելին
  • Img default alt hy
    Հասարակական
    Ստեղծվել է Երասխ-Ջուլֆա-Օրդուբադ-Մեղրի–Հորադիզ երկաթուղու կառուցման աշխատանքային խումբը
    ՀՀ վարչապետ Նիկոլ Փաշինյանն արդեն ձևավորել է Երասխ- Ջուլֆա- Օրդուբադ-Մեղրի–Հորադիզ երկաթուղու կառուցման աշխատանքային խումբը։ Այս մասին Փաշինյանը հայտնեց ԱԺ–ում կառավարության հետ հարցուպատասխանի ժամանակ` անդրադառնալով «Քաղաքացիական պայմանագիր» խմբակցության պատգամավոր Գևորգ Պապոյանի հարցին։ Նա հիշեցրեց, որ 2021-ի դեկտեմբերին ԵԽ նախագահ Շառլ Միշելի և Ադրբեջանի նախագահ Իլհամ Ալիևի հետ եռակողմ հանդիպման ընթացքում Հայաստանի և Ադրբեջանի միջև երկաթուղային հաղորդակցության վերականգնման հետ կապված պայմանավորվածություն է ձեռք բերվել: Պատգամավորը հետաքրքրվեց այդ ուղղությամբ զարգացումներից, նաև ճանապարհների ապաշրջափակման գործընթացից: ՀՀ վարչապետը կարևորեց այդ երկաթուղու կառուցման, վերականգնման, գործարկման, ինչպես նաև Բրյուսելում ձեռք բերված պայմանավորվածությունների դե յուրե արձանագրումը։ «Ձևավորված աշխատանքային խումբն արդեն զբաղվում է երկաթուղու կառուցման աշխատանքները կազմակերպելու գործով։ Հիմա քննարկում ենք տեխնիկական առաջադրանքի ձևակերպման, նախագծման և կառուցման աշխատանքների ֆինանսավորման հարցը»,– նշեց Փաշինյանը և հավելեց, որ ՀՀ փոխվարչապետ Մհեր Գրիգորյանը Երևանում հանդիպում է ունեցել եռակողմ աշխատանքային խմբի ռուսաստանցի համանախագահ Ալեքսեյ Օվերչուկի և Ռուսական երկաթուղիներ ընկերության ղեկավարի հետ: Նա նշեց, որ մի կարևոր գործողություն պետք է արվի` դա Բրյուսելում ձեռք բերված պայմանավորվածությունների դե յուրե արձանագրումն է։ Փաշինյանի խոսքով` այդ ամենը կա՛մ երկկողմ, կա՛մ եռակողմ, կամ՛ որևէ ֆորմատով պետք է դառնա պայմանավորվածություն, թղթին արձանագրվի և ստորագրվի: «Պայմանավորվել ենք, որ երկաթուղին պետք է գործի միջազգային կանոնների համապատասխան՝ երկրների օրենսդրության և սուվերենության շրջանակներում, ինչը նշանակում է, որ սահմանային անցման կետերում պետք է իրականացվի սահմանային, մաքսային և այլ հսկողություն: Եվ մենք պետք է համաձայնեցնենք պարամետրերը, որպեսզի նույն պարամետրով երկաթուղի կառուցենք, որովհետև այդ երկաթուղիները պետք է կպնեն իրար: Միջազգային բեռնափոխադրումների ուղի է դառնալու»,– ասաց Փաշինյանը: ՀՀ վարչապետը նաև շեշտեց` ավտոճանապարհների և երկաթուղիների նախագիծն անվանում են հայկական խաչմերուկ, որովհետև այստեղ գործ ունեն հյուսիս-հարավ-արևելք-արևմուտք խաչմերուկի հետ, և այդ խաչմերուկի գործադրումը կարող է շրջադարձային կետ լինել Հայաստանի տնտեսության զարգացման և ֆինանսատնտեսական կարողությունների հզորացման առումով:
    20:11
    09.02.22
    Ավելին
  • Img default alt hy
    Հայաստան
    56-ամյա վարորդի վարած Ford Explorerը, 40 մետր գլորվելով, կողաշրջվել է
    Այսօր՝ փետրվարի 9-ին, խոշոր ավտովթար է տեղի ունեցել Սյունիքի մարզում: Ժամը 16:50-ի սահմաններում 56-ամյա Լեռնիկ Հայրապետյանը Կապան-Նորաշենիկ ավտոճանապարհի սկզբնամասում իր վարած Ford Explorer մակնիշի ավտոմեքենայով դեռևս անհայտ հանգամանքներում դուրս է եկել ճանապարհի երթևեկելի գոտուց, մոտ 40 մետր գլորվել և կողաշրջվել է, հայտնում է Գագիկ Շամշյանը։ Վթարի հետևանքով վարորդը բժշկական օգնություն ստանալու նպատակով տեղափոխվել է «Կապան» բժշկական կենտրոն:
    20:05
    09.02.22
    Ավելին
  • Img default alt hy
    Իրավական
    Նարեկ Մանթաշյանը կմնա կալանքի տակ
    Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում Կարեն Ֆարխոյանի նախագահությամբ հրապարակվեց «Հայաստան» դաշինքի անդամ Նարեկ Մանթաշյանի խափանման միջոցի վերաբերյալ որոշումը, ըստ որի նա կմնա կալանքի տակ։ Դատարանում ներկաները վանկարկում էին՝ ամոթ։ Հիշեցնենք, որ փաստաբանը Մանթաշյանին գրավով ազատ արձակելու միջնորդություն էր ներկայացրել։
    20:03
    09.02.22
    Ավելին
  • Img default alt hy
    Հասարակական
    Ընդդիմադիրներից ներողություն չեն խնդրել՝ անհիմն քրգործով պատճառած զրկանքների համար
    2020 թվականի նոյեմբերի 11-ի հանրահավաքից հետո, որը ընդդիմությունը հրավիրել էր պատերազմում պարտություն կրած իշխանությունների հրաժարականի պահանջով, մի խումբ քաղաքական գործիչներ ձերբակալվեցին եւ քրեական գործ հարուցվեց՝ <օրենքով սահմանված կարգի խախտմամբ հավաքներ կազմակերպելու և անցկացնելու փաստի առթիվ` ՀՀ Քր. օր. 225.1 հոդվածի 1-ին մասով և 307.1 հոդվածի 1-ին մասով>։ Ձերբակալվել էին ԲՀԿ նախագահ Գագիկ Ծառուկյանը, «Ազգային անվտանգություն» կուսակցության նախագահ Գառնիկ Իսագուլյանը, «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցը, ՀՅԴ ԳՄ անդամ Գեղամ Մանուկյանը, Մասիսի նախկին քաղաքապետ Դավիթ Համբարձումյանը, ԱԺ նախկին փոխնախագահ Արա Սահակյանը, ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը, ՀՀԿ ԳՄ անդամ Էդուարդ Շարմազանովը, «Մեկ Հայաստան» կուսակցության նախագահ Արթուր Ղազինյանը, ՀՅԴ ԳՄ ներկայացուցիչ Իշխան Սաղաթելյանը։ Այսօր տեղեկացանք, որ այս անձանց հրավիրել են Քննչական կոմիտե եւ տեղեկացրել, որ գործը կարճվել է։ Նրանց են վերադարձրել հեռախոսները, անձնագրերը, որոնք մեկ տարուց ավելի պահվում էին քննիչների մոտ։ «Հրապարակը» փորձեց զրուցել վերոնշյալ քաղաքական գործիչների հետ` հասկանալու համար, թե գործն ինչ հիմքով է կարճվել եւ վերջապես փոխհատուցում լինելո՞ւ է, կամ գոնե ներողություն խնդրե՞լ են իրենցից։ Ընդդիմադիր առաջնորդները մեկ տարվա ընթացքում՝ այս քրեական գործի պատճառով բազմաթիվ զրկանքներ են կրել՝ զրկված են եղել Հայաստանից դուրս գալու հնարավորությունից, հեռախոսներն են առգրավված եղել, հրավիրել են հարցաքննությունների․․․ նյարդային լարում, առողջական խնդիրներ, ժամանակի վատնում՝ այս բոլոր վնասների փոխհատուցումն ինչպե՞ս է կատարվելու: ԱԺ «Հայաստան» խմբակցության պատգամավոր Գեղամ Մանուկյանը մեզ հետ զրույցում նախ հաստատեց վերոնշյալ լուրն, ապա ընդգծեց, որ որեւէ փոխհատուցման մասին խոսք անգամ չի գնացել, անգամ ներողություն չեն խնդրել իրենցից: Մանուկյանն ասաց` գործը կարճվել է հավանաբար փաստերի բացակայության պատճառով: «Հայտնի է, որ քրեական գործ հարուցվեց, քաղաքական գործիչներ կալանավորվեցին, այն բանի համար, որ Նիկոլ Փաշինյանի դավաճանական իշխանությունն ամեն կերպ պահեն», - նշում է պատգամավորը: Իշխան Սաղաթելյանն էլ մեզ հետ զրույցում նշեց, որ դեռեւս իրեն չեն հրավիրել  բաժին, սակայն կարճման մասին արդեն իսկ տեղյակ է: «Մինչեւ այս պահը դեռ ինձ ոչինչ չեն ասել: Մեկ ամիս առաջ արտերկրում հանդիպում ունեի, սակայն այդ գործի պատճառով մերժեցին երկրից դուրս գալը», - նշում է Սաղաթելյանը: «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցն էլ մեզ հետ զրույցում նշեց, որ հիմա վատառողջ է, կարճված գործի հիմքերին դեռեւս ծանոթ չէ, սակայն ենթադրվում էր, որ այս գործը պետք է կարճվի, քանի որ չկար որեւէ հիմք: Մենք կապվեցինք նաեւ գործը քննող քննիչի՝ Մարտիրոսյանի հետ, ով հրաժարվեց մեր հարցերին պատասխանել։ Մենք ընդամենը հետաքրքրվում էին, թե ով է պատասխան տալու կեղծ, անհիմն գործ հարուցելու համար, պատժվելո՞ւ են անհիմն գործ հարուցողները եւ արդյո՞ք այս անձանցից գոնե ներողություն են խնդրելու՝ պատճառած անհանգստությունների համար։   Ամբողջական հոդվածը կարող եք կարդալ այս հասցեով՝ : https://hraparak.am/post/03ec7c4fd5e48379f1b02b7504b701ab?fbclid=IwAR09MEO9gbahGmgv5bYwZcxfQnrBkOjcqtQZrjGdeSI8DG6XH2lZbDzGe3k © 2008 - 2021 «Հրապարակ օրաթերթ»
    19:56
    09.02.22
    Ավելին
  • Հասարակական
    Հայտնաբերել են բնակարանային գողության մեղադրանքով հետախուզվողը
    Փետրվարի 5-ին քրեական ոստիկանության գլխավոր վարչության ծառայողները Երևանի Փափազյան փողոցում հայտնաբերել և գլխավոր վարչություն բերման են ենթարկել Երևանի Սերո Խանզադյան փողոցի 36-ամյա մի բնակչի: Նա ոստիկանության Վաղարշապատի բաժնի կողմից 2020 թվականի դեկտեմբերից հետախուզվում էր բնակարանային գողության մեղադրանքով։
    19:52
    09.02.22
    Ավելին
  • Img default alt hy
    Հասարակական
    Վարչապետն ԱԺ-ում գովաբանում է պանթուրքիստական նախագիծը․ Էդուարդ Շարմազանով
    ՀՀԿ ԳՄ անդամ Էդուարդ Շարմազանովը ֆեյսբուքյան իր էջում գրել է․ «Երասխ- Ջուլֆա-Օրդուբադ-Մեղրի-Հորադիզ երկաթուղու կառուցումը տասնամյակներ շարունակ եղել է թուրքերի երազանքը։ Դրա մասին են երազել Վեհիբ փաշան, Կարաբեքիրը, Դեմիրելը…. Ո՞վ կպատկերացներ, որ կգա մի օր ու Հայաստանի վարչապետի աթոռին բազմած անձը ԱԺ-ում կգովաբանի այդ պանթուրքիստական նախագիծը։ Ու դա ամբողջը չէ. նա հանձնարարական է տվել աշխատանքային խումբ ձեւավորել, որը կզբաղվի այդ թուրքական երկաթուղու կառուցմամբ։ Բարի գալուստ էրմենիստա՞ն… Հ.Գ. Ի՞նչ «հայկական խաչմերուկ»։ Դա ոտքից գլուխ «թուրքական խաչմերուկ» է»։
    19:45
    09.02.22
    Ավելին
  • Img default alt hy
    Հասարակական
    Մանուկյանի, Վանեցյանի, Շարմազանովի և մյուսների վերաբերյալ քրեական գործը կարճվել է
    Քննչական կոմիտեն կարճել է ԲՀԿ նախագահ Գագիկ Ծառուկյանի, «Ազգային անվտանգություն» կուսակցության նախագահ Գառնիկ Իսագուլյանի, «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցի, ՀՅԴ ԳՄ անդամ Գեղամ Մանուկյանի, Մասիսի նախկին քաղաքապետ Դավիթ Համբարձումյանի, ՀՅԴ ԳՄ անդամ Գեղամ Մանուկյանի, Մասիսի նախկին քաղաքապետ Դավիթ Համբարձումյանի, նախկին փոխնախագահ Արա Սահակյանի, ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանի, ՀՀԿ ԳՄ անդամ Էդուարդ Շարմազանովի, «Մեկ Հայաստան» կուսակցության նախագահ Արթուր Ղազինյանի, ՀՅԴ ԳՄ ներկայացուցիչ Իշխան Սաղաթելյանի վերաբերյալ քրեական գործը։ Տեղեկությունը News.am-ին հայտնել է Գեղամ Մանուկյանը։ ՔԿ-ն քրեական գործը հարուցել էր ՀՀ ՔՕ 225.1 հոդվածի 1-ին մասով (օրենքով սահմանված կարգի խախտմամբ հավաք կազմակերպելը եւ անցկացնելը) և 307.1 հոդվածի 1-ին մասով (ռազմական դրության իրավական ռեժիմի ընթացքում գործող միջոցառումները և ժամանակավոր սահմանափակումները խախտելը)։ Հիշեցնենք, որ 2020 թվականի նոյեմբերի 11-ի հանրահավաքից հետո, որը ընդդիմությունը հրավիրել էր պատերազմում պարտություն կրած իշխանությունների հրաժարականի պահանջով, մի խումբ քաղաքական գործիչներ ձերբակալվեցին և քրեական գործ հարուցվեց։
    19:36
    09.02.22
    Ավելին
  • Հասարակական
    29-ամյա Վասակն ու 23-ամյա Կարինեն հետախուզվում են ապօրինի թմրաշրջանառության մեղադրանքով
    29-ամյա Վասակ Գազանճյանն ու 23-ամյա Կարինե Գեւորգյանը ոստիկանության Քանաքեռ-Զեյթուն բաժնի կողմից հետախուզվում են ապօրինի թմրաշրջնառության մեղադրանքով: Խափանման միջոցը կալանք: «Նրանց գտնվելու մասին տեղեկություն ունեցողներին խնդրում ենք դիմել ոստիկանության քանաքեռ Զեյթունի կամ մոտակա բաժին»,-ասված է տարածած հաղորդագրության մեջ:
    19:20
    09.02.22
    Ավելին
  • Img default alt hy
    Զինված ուժեր
    Ձեզ բախտ է վիճակվել պաշտպանել Տավուշ աշխարհի սահմանները․ նորակոչիկները երդվեցին
    Այսօր՝ փետրվարի 9-ին, կայացել է ՀՀ հյուսիսարևելյան ուղղությամբ մարտական հերթապահություն իրականացնող զորամասերից մեկի նորակոչիկ զինծառայողների երդման հանդիսավոր արարողությունը: Զորամասի հրամանատար, գնդապետ Վահան Սարգսյանն իր ելույթում մասնավորապես նշել է. «Այսօր պատասխանատու և հիշարժան օր է. մեր զինվորները հայրենիքին անձնվիրաբար ծառայելու երդում տվեցին: Ես վստահ եմ, որ այդպես էլ կծառայեն: Սիրելի՛ նորակոչիկներ, զորամասը, որտեղ դուք ծառայելու եք, հզոր ու հաղթական մարտական ուղի է անցել. դեռ 90-ական թվականներից, երբ ձևավորվում էր բանակը, մեր զորամասն առաջնագծում էր և առ այսօր առաջնագծում է՝ պատվով ու ամենայն պատասխանատվությամբ կատարելով իր առջև դրված խնդիրները»: Բերդ համայնքի ղեկավարի տեղակալ Սամվել Հովսեփյանը երդման արարողության կապակցությամբ շնորհավորել է նորակոչիկներին, նրանց ծնողներին, ներկաներին. «Պատահական չէ, որ երդման արարողությունն անցկացվում է հենց այս վայրում. սա մեր համայնքի խորհրդանիշներից մեկն է: Մենք գտնվում ենք պատմական Տավուշ ամրոցի վարչական սահմաններում: 3000 և ավելի տարիներ այստեղ ամեն քար ու թուփ խոսում են հայերեն: Մեր պապերն այստեղ են արարել, աշխատել, կռվել... Ցավոք, ունցել ենք նաև կորուստներ, բայց վերջնական արդյունքում՝ մենք հաղթել ենք, քանի որ այստեղ ենք: Մեր պապերի 3000 տարվա ճշմարտությունը «վերափաթեթավորված» հասել է մեզ. կա երկու ճշմարտություն՝ «Ուժն է ծնում իրավունք» և «Զինվորի «сапог»-ն է գծում երկրի սահմանը»: Սիրելի՛ նորակոչիկներ, շնորհավորում եմ ձեզ երդման արարողության կապակցությամբ: Ձեզ բախտ է վիճակվել պաշտպանել մեր երկրի սահմանները՝ Տավուշ աշխարհում: Դուք այն զինվորներն եք, ովքեր կերտելու են վաղվա հաղթանակները»: Դիմելով նորակչիկներին՝ Բերդի և տարածաշրջանի հոգևոր հովիվ Տեր Արամ քահանա Միրզոյանն ասել է. «Սիրելի՛ նորակոչիկներ, երբեք, ոչ մի վայրկյան չմտածեք, թե ծառայության տարիները կորուստ են ձեր կյանքից: Միշտ հիշեք, որ այս երկու տարիներն ամենակարևոր ներդրումն են ձեր կյանքում, որովհետև հնարավոր չէ խուսափել առաքելությունից և լինել երջանիկ, հնարավոր չէ խուսափել պատասխանատվությունից և շարունակել ապրել հանգիստ խղճով: Ձեր ծառայությամբ հզորացրեք մեր բանակը և ամբողջ կյանքում կքայլեք գլուխներդ բարձր՝ որպես հայրենիքի տեր: Այո՛, հայրենիքը պատկանում է նրանց, ովքեր պաշտպանում են այն»: ՀՀ ՊՆ ռազմական ոստիկանության Բերդի բաժնի պետ, գնդապետ Սերոբ Արշակյանը նույնպես շնորհավորել է նորակոչիկներին երդման արարողության կապակցությամբ. «Տղանե՛ր, զինվորական երդում տալը, մեր բանակի շարքերը համալրելը, երկու տարի հայրենիքի պաշտպանությանը նվիրելը մեծ պատիվ է: Ես լիահույս եմ, որ ձեր երդմամբ տրված խոստումը պահպանելու եք և բարձր եք պահելու ձեր ընտանիքների ու ձեր պատիվը: Վստահ եղեք, որ աջակցելու ենք ձեզ, որպեսզի կարողանաք հեշտությամբ հաղթահարել ծառայության դժվարությունները: Միասին ենք պաշտպանելու մեր հայրենիքը»:
    19:09
    09.02.22
    Ավելին
  • Img default alt hy
    Հասարակական
    Դատապարտյալին բերված սառնարանից հայտնաբերվել են 50-ից ավելի բջջային հեռախոսներ
    Դատապարտյալին բերված սառնարանից հայտնաբերվել են հինգ տասնյակից ավելի բջջային հեռախոսներ Փետրվարի 9-ին՝ ժամը 11:30-ի սահմաններում, Հայաստանի Հանրապետության արդարադատության նախարարության «Արմավիր» քրեակատարողական հիմնարկի ծառայողները, իրացնելով օպերատիվ տվյալները, զննության են ենթարկել քաղաքացի Կ. Մ.-ի կողմից դատապարտյալ Ռ. Ղ.-ի անվամբ որպես հանձնուք բերված սառնարանը: Զննության արդյունքում սառնարանի ետնամասում պատրաստված թաքստոցից հայտնաբերվել են 55 հատ բջջային հեռախոս, բջջային հեռախոսի 5 մարտկոց և 3 USB լար: Փաստի առթիվ նախապատրաստվում են նյութեր:
    19:00
    09.02.22
    Ավելին
  • Img default alt hy
    Միջազգային
    Ֆրանսիայում փող տպող գործարան է այրվում
    Ֆրանսիայի Շամալիեր քաղաքում հրդեհվել է Ֆրանսիայի Բանկի ֆաբրիկան, որտեղ փող են տպում: Տուժածներ կան, նրանցից մի քանիսին հոսպիտալացրել են։ Տեղեկությունը հայտնում է ՌԻԱ Նովոստին։ Հայտնի չէ՝ արդեն տպված թղթադրամներն այրվել են, թե ոչ։ Դեպքի վայրում 387 մարդ է եղել։ Տեղում աշխատում են փրկարարները։ Ոստիկանությունը շրջափակել է տարածքը, երթևեկությունը դադարեցվել է։ Ֆրանսիացի օգտատերերը կատակում են, թե նախագահ Էմանուել Մակրոնը Մոսկվայից վերադառնալուց հետո որոշել է անցնել ռուբլու:
    18:54
    09.02.22
    Ավելին
  • Img default alt hy
    Հասարակական
    Հայ-ամերիկյան հարաբերություններն այսօր գտնվում են պատմականորեն ամենապասիվ փուլում. Սուրեն Սարգսյան
    Իմ խորին համոզմամբ՝ հայ-ամերիկյան հարաբերություններն այսօր գտնվում են պատմականորեն ամենապասիվ փուլում, և այդ պասիվությունը պայմաավորված է ամենատարբեր հանգամանքներով, Aysor.am-ի թղթակցի հետ զրույցում ասաց միջազգայնագետ Սուրեն Սարգսյանը՝ հավելելով, որ հայ-ամերիկյան հարաբերություններին հստակ գնահատական տալու համար նախ անհրաժեշտ է դրանք դիտարկել համեմատության մեջ՝ ինչպիսին էին այդ հարաբերույթունները 90-ականներին, 2000-ականներին, 2010-ականներին և ինչպիսին են այժմ։ «Երկկողմ պասիվ հարաբերությունների պատճառներից առաջինն այն է, որ վերջին ժամանակահատվածում Միացյալ նահանգների քաղաքականությունը Հարավային Կովկասում բավականին պասիվ է։ Խոսքը ոչ միայն Թրամփի նախագահությա տարիներին է վերաբերում, այլև հիմա էլ ԱՄՆ-ը տարածաշրջանում ավելի պասիվ է, քան եղել է 90-ականներին կամ 2000-ականներին։ Դրա համար կան օբյեկտիվ և սուբյեկտիվ բազաթիվ պատճառներ՝ Ռուսաստանի ազդեցության մեծացում, Թուրքիայի ակտիվության գործոն, ԱՄՆ-Ադրբեջանի, ԱՄՆ-Վրաստանի հարաբերություններ և այլն», - ասաց միջազգայնագետը։ Սուրեն Սարգսյանը շեշտեց՝ հայ-ամերիկյան հարաբերությունների պասիվ վիճակի վկայություններից մեկը բարձր մակարդակի շփումների բացակայությունն է, ինչը խոսում է օրակարգի ոչ հարուստ լինելու մասին։ «Գրեթե բոլոր երկկողմ հանդիպումների ժամանակ քննարկվում են ԱՄՆ-ի կողմից տրամադրվող աջակցության ծրագրեր։ Այսինքն՝ հայ-ամերիկյան հարաբերությունները պտտվում են ամերիկյան օգնության շուրջ։ Սա, կարծում եմ, երկկողմ հարաբերությունների համար ճիշտ ռազմավարություն չէ, և այդ ռազմավարությունը Հայաստանի կողմից պետք է վերանայվի։ ԱՄՆ-ի հետ հարաբերություններ կառուցելիս մեր երկիրը պետք է անցնի նախաձեռնողական քաղաքականության», - ասաց միջազգայնագետը։
    18:50
    09.02.22
    Ավելին
  • Img default alt hy
    Հասարակական
    Ադրբեջանի հետ խաղաղության պայմանագիր կնքելը մեր նպատակներից է. Փաշինյան
    ՀՀ վարչապետ Նիկոլ Փաշինյանը վստահեցնում է, որ Հայաստանը պատրաստ է Ադրբեջանի հետ խաղաղության պայմանագիր կնքել, սակայն դրանից առաջ անհրաժեշտ է բանակցել։ Փաշինյանն այս մասին ասաց` պատասխանելով «Քաղաքացիական պայմանագիր» խմբակցության պատգամավոր Ծովինար Վարդանյանի հարցին։ Վարչապետն ընդգծեց, որ Հայաստանը պատրաստ է հարցի շուրջ առարկայական խոսակցության։ Նա շեշտեց նաև, որ այս հարցի շուրջ քննարկումներից տպավորություն է ստեղծվում, թե Հայաստանին որևէ մեկը փորձում է օրակարգ պարտադրել կամ հենց Հայաստանն է ինչ–որ օրակարգից խուսափում։ «Ադրբեջանի հետ խաղաղության պայմանագիր կնքելը, Թուրքիայի հետ հարաբերությունները կարգավորելը և համապատասխան փաստաթղթով արձանագրելը, իհարկե, մեր կառավարության և բոլոր կառավարությունների նպատակն է եղել»,– ասաց Փաշինյանը։ Նրա խոսքով` ԼՂ հիմնախնդրի բանակցային գործընթացի նպատակը խաղաղության պայմանագրի կնքումն է եղել, և դա արձանագրված է բոլոր փաստաթղթերում։ Հիշեցնենք, որ ավելի վաղ, Ադրբեջանի նախագահի օգնական Հիքմեթ Հաջիևը հայտարարել էր, որ Բաքուն պատասխան է սպասում Երևանից հնարավոր խաղաղության պամանագրի ստորագրման շուրջ բանակցություններ սկսելու վերաբերյալ: ՀՀ ԱԽ քարտուղար Արմեն Գրիգորյանն էլ հունվարի 20-ին ասել էր, որ Ադրբեջանի հետ խաղաղության պայմանագրի ձևակերպումն ու ստորագրումը ենթադրում է մի շարք պայմանների առկայություն։ Նա ընդգծել էր, որ պայմանագրի ստորագրման համար անհրաժեշտ է գտնել ԼՂ հիմնախնդրի լուծում։ ՀՀ արտաքին գործերի նախարար Արարատ Միրզոյանը նույնպես հայտարարել է, որ խաղաղության պայմանագրի ստորագրումը կապված է ԼՂ հակամարտության կարգավորման հետ։
    18:45
    09.02.22
    Ավելին
  • Img default alt hy
    Հասարակական
    Թուրքիայի քաղաքացին ապօրինի հատել է ՀՀ սահմանը, բռնվել ՌԴ սահմանապահների կողմից. «Aravot.am»
    Aravot.am-ի տեղեկություններով՝ հունվարի 8-ին ժ.18.54-ի սահմաններում Թուրքիայի Հանրապետության քաղաքացի Ա. Բ. –ն, շրջանցելով ՀՀ սահմանային անցակետերը, հետիոտն անցնելով հայ-թուրքական սահմանով հոսող Արաքս գետը եւ ՀՀ-ում Ռուսաստանի Դաշնության անվտանգության դաշնային ծառայության սահմանապահ զորքերի Արարատի մարզի վարչական տարածքում տեղակայված սահմանապահ ուղեկալի կողմից հսկվող տարածքում, հաղթահարելով ինժեներատեխնիկական պատնեշը, ապօրինի, առանց սահմանված փաստաթղթերի եւ պատշաճ թույլտվության, հատել է ՀՀ պահպանվող պետական սահմանը։ Եվ Թուրքիայի Հանրապետության կողմից մուտք է գործել Հայաստանի Հանրապետություն, որտեղ բռնվել է ՀՀ-ում ՌԴ անվտանգության դաշնային ծառայության սահմանապահների կողմից: ՀՀ ԱԱԾ քննչական դեպարտամենտում այս դեպքով հարուցվել է քրեական գործ ՀՀ քր. օր. 329 հոդվածի 1-ին մասով (Oտարերկրյա քաղաքացու կամ քաղաքացիություն չունեցող անձի՝ Հայաստանի Հանրապետություն մուտքը, Հայաստանի Հանրապետությունում գտնվելը կամ Հայաստանի Հանրապետության տարածքով տարանցումը տեղափոխումը շահադիտական նպատակով կազմակերպելը, որը կատարվել է մուտքի, գտնվելու կամ տարանցման համար Հայաստանի Հանրապետության օրենսդրությամբ սահմանված կարգը խախտելով կամ մուտքի, գտնվելու կամ տարանցման պատշաճ թույլտվություն ստանալու համար կեղծ փաստաթղթեր կամ կեղծ տեղեկություններ ներկայացնելով): Այս դեպքի առնչությամբ լրատվամիջոցին դեռ չի հաջողվել լրացուցիչ տեղեկություն ստանալ ԱԱԾ-ից: Արարատի մարզպետ Սեդրակ Թեւոնյանն էլ Aravot.am-ին դեպքի առնչությամբ ասել է. «Տեղյակ չեմ, չեմ հասցրել բան անեմ»:
    18:36
    09.02.22
    Ավելին
  • Img default alt hy
    Հայաստան
    Անթալիա մեկնելու հարցը կորոշվի Ռուբինյան-Քըլըչ հանդիպումից հետո. Արարատ Միրզոյան
    Կմեկնի Հայաստանի պատվիրակությունը մարտ ամսին Անթալիա թե ոչ` պարզ կլինի փետրվարի 24-ին Վիեննայում նախանշված ՀՀ–Թուրքիա հարաբերությունների կարգավորման հարցով երկու երկրների հատուկ ներկայացուցիչների հանդիպումից հետո։ Այսօր ԱԺ–ում կառավարության անդամների հետ հարցուպատասխանի ժամանակ այս մասին ասաց ՀՀ ԱԳ նախարար Արարատ Միրզոյանը։ «Հույս ունեմ, որ այս անգամ արդեն առարկայական քննարկումներ կսկսվեն երկու հատուկ ներկայացուցիչների միջև, քննարկումներ` ուղղված Հայաստան–Թուրքիա սահմանի բացմանը և դիվանագիտական հարաբերությունների հաստատմանը»,– ասաց Միրզոյանը` հավելելով, որ այս հարցով Թուրքիայից ստացվող ազդակները դրական բնույթի են։ Ինչ վերաբերում է Անթալիայի համաժողովին մասնակցելու խնդրին, ԱԳ նախարարը հայտնեց, որ Թուրքիայից այդ միջոցառմանը մասնակցելու հրավեր ստացվել է իր ու Ռուբեն Ռուբինյանի անունով։ Որոշում առայժմ չկա։ Իսկ Նիկոլ Փաշինյանի` Թուրքիա մեկնելու մասին մամուլում տարածված հայտարարությունները, Միրզոյանի ենթադրությամբ, սխալ թարգմանության հետևանք են։ «Հայաստանի վարչապետն այսինչ–այսինչ դրական ուղերձներն է հղել և ասել, որ նա կմասնակցի Անթալիային։ Կարծում եմ` այստեղ «նա»–ն կարող է և երկրին վերաբերվել»,– ասաց Միրզոյանը։ Հիշեցնենք` փետրվարի 4-ին թուրքական հեռուստաընկերությանը տված հարցազրույցում Թուրքիայի փոխնախագահ Ֆուաթ Օքթայը հայտարարել էր, որ վարչապետ Նիկոլ Փաշինյանը մարտին կայցելի Թուրքիա՝ մասնակցելու Անթալիայի դիվանագիտական ֆորումին։ Արտաքին գործերի նախարարության մամուլի խոսնակ Վահան Հունանյանն ավելի ուշ մեկնաբանելով լուրը` ասել էր, որ Նիկոլ Փաշինյանի այց Թուրքիա և մասնակցություն Անթալիայի դիվանագիտական համաժողովին չի քննարկվում։ Օրեր անց Թուրքիայի արտաքին գործերի նախարար Մևլութ Չավուշօղլուն հայտարարեց, որ մարտի 11-13-ն Անթալիայում անցկացվելիք ի դիվանագիտական 2-րդ ֆորումին Հայաստանից մասնակցելու են ԱԳ նախարար Արարատ Միրզոյանը և Թուրքիայի հետ հարաբերությունների կարգավորման հարցերով հատուկ ներկայացուցիչ Ռուբեն Ռուբինյանը։
    18:25
    09.02.22
    Ավելին