Լրահոս

Ազգային ժողովի «Հայաստան» խմբակցության նախկին պատգամավոր Արթուր Ղազինյանը  գրել է. «Բերձորում, Աղավոյում և Լաչինի միջանցքի մնացած բնակավայրերում տեղի է ունենում կազմակերպված էթնիկ զտում: Բացատրեմ թե ինչու եմ սա որակում էթնիկ զտում: Արցախյան հակամարտության կարգավորման ներկա գործընթացը կարգավորվում է 2020թ նոյեմբերի 9-ի հայտարարությամբ (փաստաթղթի իրավական կարգավիճակը այս պահին չեմ ցանկանում քննարկել): Այդ փաստաթույթն ունի ահռելի քաղաքական և անվտանգային ուժ և նշանակություն, ճանաչված է ինչպես այն ստորագրող կողմերի, այնպես էլ այլ աշխարհաքաղաքական ուժային կենտրոնների կողմից: Նոյեմբերի 9-ի հայտարարության 6-րդ կետի երկրորդ մասը սահմանում է, որ. «Կողմերի համաձայնությամբ, Լեռնային Ղարաբաղի և Հայաստանի միջև կապն ապահովելու համար առաջիկա երեք տարիների ընթացքում պիտի հաստատվի Լաչինի միջանցքի երկայնքով նոր երթուղու կառուցման նախագիծ, որից հետո ռուսական խաղաղապահ զորակազմը կվերատեղակայվի՝ այդ երթուղին պաշտպանելու համար»: Ինչպես տեսանք, Լաչինի միջանցքը նոր ճանապարհով փոխարինելու համար անհրաժեշտ է երկու նախապայման. 1.կողմերի համաձայնություն, ինչը պետք է արտացոլված լինի նոր համաձայնագրով, և 2.նոր երթուղու կառուցման նախագիծ, որը պետք է հաստատվի երեք տարվա ընթացքում, որին պետք է հաջորդի նոր ճանապարհի կառուցումը: Կողմերի համաձայնությունը հավաստող կամ հաստատող որևէ փաստաթուղ մինչ օրս չի հանրայինացվել. կամ դա արվել է գաղտնի՝ ժողովրդի թիկունքում, կամ այդպիսի համաձայնագիր ուղղակի գոյություն չունի: Ինչ վերաբերում է նոր ճանապարհի նախագծմանը, ապա այն պետք է տեղի ունենար մինչև 2023թ. նոյեմբերի 9-ը, որից հետո այդ նախագիծը պետք է հանրայինացվեր՝ Արցախի և Հայաստանի քաղաքացիներին նոր ճանապարհը ներկայացնելու համար: Նախագծման մասին ՀՀ կառավարությունը, որպես հայտարարության կողմ, որևէ տեղեկատվություն չի տրամադրել ոչ Հայաստանի, ոչ էլ Արցախի բնակիչներին. հանրությունն այդ մասին տեղեկացել է ադրբեջանի կողմից շինարարական աշխատանքները սկսելուց հետո՝ կողմնակի աղբյուրներից: ադրբեջանն այդ ճանապարհը նախագծել և կառուցել է մեկ տարի և ինը ամսվա ընթացքում, մինչդեռ միայն նախագծման համար նոյեմբերի 9-ի հայտարությունը սահմանել է երեք տարի ժամկետ: Բացի վերը նշվածից, Լաչինի միջանցքի բնակավայրերն ադրբեջանին հանձնելու մասին նոյեմբերի 9-ի հայտարարությունը որևէ դրույթ ՉԻ ՊԱՐՈւՆԱԿՈւՄ, ինչը նշանակում է, որ իրենց կամքին հակառակ Բերձորի, Աղավնոյի և Լաչինի միջանցքի այլ բնկավայրերի բնակիչների տեղահանումն ապօրինի է, կրում է կամայական բնույթ և նպատակ է հետապնդում զտել այդ տարածքը էթնիկ հայերից: Այս ամբողջ պատմության մեջ ամենազավեշտալին այն է, որ իրենց տները լքելու պահանջ Լաչինի միջանցքի բնակիչներին ներկայացրել է Արցախի իշխանությունը, որը չի հանդիսանում նոյեմբերի 9-ի հայտարարության կողմ, հետևաբար չունի իրավասություն իրականացնել այդպիսի գործունեություն: Դա պետք է իրականցներ ՀՀ իշխանությունը: Իսկ թե ինչու է ՀՀ իշխանությունն իր գործը բարդել Արցախի իշխանության վրա, առանձին քննարկման նյութ է: Լաչինի միջանցքի բնակավայրերի բնակիչները գտնվում են ՌԴ խաղաղապահների պատասխանատվության գոտում, որոնք, Ադրբեջանի հետ համատեղ պարտավոր են երաշխավորել ինչպես նրանց, այնպես էլ այդ միջանցքով քաղաքացիների, տրանսպորտային և բեռնատար միջոցների երթևեկության անվտանգությունը երկու ուղղություններով: Ադրբեջանի և ՌԴ խաղաղապահների պարտվորությունը կարող է դադարել ՄԻԱՅՆ կողմերի համաձայնությամբ նոր ճանապարհի նախագծման և շինարարության ավարտից, ինչպես նաև ՌԴ խաղաղապահների այդ ճանապարհ վերատեղակայումից հետո: ՀՀ իշխանությունը ՊԱՐՏԱՎՈՐ Է մեզ տրամադրել Լաչինի միջանցքը փոխարինող նոր ճանապարհի կառուցման նախագծի շուրջ ձեռք բերված նոր համաձայնագրի տեքստը, այն ստորագրող սուբյեկտների անունները և ժամկետը: Իսկ եթե այդպիսի համաձայնագիր առկա չէ, ապա ամբողջ գործընթացը պետք է անհապաղ դադարեցվի՝ մինչև անհրաժեշտ փաստաթղթերի մշակումն ու համաձայնեցումը: Մինչև այդ նոր համաձայնագրի հրապարակումը, Լաչինի միջանցքի բնակավայրերի բնակիչների հարկադիր տարհանում ՉԻ ԿԱՐՈՂ իրականացվել. դա ապօրինի է, կրում է կամայական բնույթ և հետագայում գնահատվելու է որպես էթնիկ զտում»:

Լատվիան օգոստոսի 5-ին վերսկսել է ռուսական գազի ներմուծումը, որը դադարեցվել էր հուլիսի վերջին: «Արմենպրես»-ի հաղորդմամբ՝ այս մասին տեղեկացնում է «ՌԻԱ Նովոստի»-ն՝ հղում կատարելով «Entsog» հարթակին: Ռուսական գազը լատվիացի սպառողներին մատակարարվում է Վալդայ-Պսկով-Ռիգա մայրուղային գազատարով, որը Ռուսաստանից Լատվիա է մտնում Էստոնիայի տարածքով։ Մարտի 23-ին ՌԴ նախագահ Վլադիմիր Պուտինը հայտարարեց ԵՄ երկրներին և Ռուսաստանի դեմ սահմանափակող միջոցներ ձեռնարկած բնական գազի մատակարարումների համար վճարումները ռուբլով փոխանցելու մասին:

Օգոստոսի 4-ին օպերատիվ կառավարման կենտրոնից ոստիկանության Էրեբունու բաժին հաղորդում էր ստացվել, որ նախորդ օրը բջջային օպերատորներից մեկի՝ Էրեբունու փողոցի գրասենյակից բջջային հեռախոս են գողացել: Դեպքի առթիվ տարածքային քննչական մարմնում նախաձեռնվեց քրեական վարույթ։ Էրեբունու քրեական հետախույզների արագ արձագանքի և պրոֆեսիոնալ աշխատանքի արդյունքում տեղեկություններ ստացվեցին, որ գողությունը հնարավոր է կատարած լինի Երևանի Ավանեսովի փողոցի 34-ամյա մի բնակիչ: Օգոստոսի 5-ին նա հայտնաբերվեց, ձերբակալվեց և տեղափոխվեց ոստիկանության Էրեբունու բաժին: Անձնական խուզարկությամբ պայուսակից հայտնաբերվեցին սպիտակ, կիսահալված զանգվածներ և փորձանոթ՝ դեղնավուն հետքերով: Ըստ 34-ամյա տղամարդու՝ հայտնաբերվածը «a PVP» տեսակի թմրամիջոց է: Նա ներկայացվել է քննչական բաժին: Հանգամանքները նախաքննությամբ պարզվում են: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Պրոֆեսիոնալ թենիսիստների ասոցիացիան (ATP) հրապարակել է վարկանիշների հերթական աղյուսակը, որը շարունակում է գլխավորել ռուսաստանցի Դանիիլ Մեդվեդևը։ Ռուսաստանը ներկայացնող հայ մարզիկ Կարեն Խաչանովը զիջել է դիրքերը։ 1395 վարկանիշային միավոր ունեցող 26-ամյա թենիսիստը 24-րդից նահանջել է 28-րդ հորիզոնական։ Աղյուսակի առաջին տասնյակում տեղի է ունեցել մեկ փոփոխություն. իտալացի Յանիկ Սիները տեղափոխվել է 12-րդ տեղ, իսկ լեհ Հուբերտ Հուրկաչը բարձրացել է 10-րդ դիրք։ ATP-ի աղյուսակի լավագույն տասնյակը օգոստոսի 8-ի դրությամբ՝ 1 (1). Դանիիլ Մեդվեդև (Ռուսաստան)՝ 7875 2 (2). Ալեքսանդր Զվերև (Գերմանիա)՝ 6850 3 (3). Ռաֆայել Նադալ (Իսպանիա)՝ 5620 4 (4). Կառլոս Ալկարաս (Իսպանիա)՝ 5035 5 (5). Ստեֆանոս Ցիցիպաս (Հունաստան)՝ 5000 6 (6). Նովակ Ջոկովիչ (Սերբիա)՝ 4770 7 (7). Կասպեր Ռուդ (Նորվեգիա)՝ 4685 8 (8). Անդրեյ Ռուբլյով (Ռուսաստան)՝ 3710 9 (9). Ֆելիքս Օժե-Ալյասիմ (Կանադա)՝ 3490 10 (11). Հուբերտ Հուրկաչ (Լեհաստան)՝ 3015:

VBET Հայաստանի Պրեմիեր լիգայի երկրորդ տուրում «Ուրարտուն» հյուրընկալվելիս 2։0 հաշվով հաղթել է «Շիրակին»։ 8-րդ րոպեին հաշիվը բացել է Մաքսիմ Մայրովիչը։ 71-րդ րոպեին գոլի հեղինակ է դարձել Դմիտրո Խլյոբասը։ «Ուրարտուն» 6 միավորով երկրորդ տեղում է։ «Ալաշկերտը» նույնքան միավոր ունի, սակայն լրացուցիչ ցուցանիշներով գլխավորում է մրցաշարային աղյուսակը։ «Շիրակը» 3 միավորով 6-րդ տեղում է։

Հնդկաստանի Չեննայ քաղաքում ավարտին մոտեցող շախմատի համաշխարհային 44-րդ օլիմպիադայի նախավերջին՝ 10-րդ տուրում Հայաստանի կանանց հավաքականը մրցեց Ադրբեջանի թիմի հետ և ցավալի պարտություն կրեց: Մեր աղջիկները՝ Էլինա Դանիեյանը, Աննա Սարգսյանը, Լիլիթ Մկրտչյանը և Սուսաննա Գաբոյանը պարտոթյուններ կրեցին, ասպիսով զիջելով մրցակցին չոր՝ 0-4 հաշվով: Այս պարտությունից հետո մեր կանանց հավաքականը գործնականում կորցրեց մրցանակային տեղերի համար պայքարելու հնարավորությունը:

Հայաստանի քննչական կոմիտեի Կոտայքի մարզային քննչական վարչության Աբովյանի քննչական բաժնում քննիչ Դալլաքյանի կողմից նախաձեռնված քրեական վարույթի շրջանակում պարզվել է երեկ՝ օգոստոսի 7-ին, Կոտայքի մարզում տեղի ունեցած խոշոր ավտովթարի հետևանքով վարորդների և վիրավորների ինքնությունը:  Ինչպես հայտնում է ֆոտոլրագրող Գագիկ Շամշյանը, պարզվել է՝ Mercedes E320 մակնիշի ավտոմեքենան վարել է Գեղարքունիքի մարզի բնակիչ, 29-ամյա Թաթուլ Մանուկյանը, Opel Zafira-ն վարել է Գեղարքունիքի մարզի բնակիչ, 73-ամյա Վոլոդյա Մարտիրոսյանը, իսկ Mercedes C300 մակնիշի ավտոմեքենան վարել է  Կոտայքի մարզի բնակիչ, 32-ամյա Ժորա Ավետիսյանը:  Վթարի հետևանքով Mercedes E320-ի ուղևոր, Գեղարքունիքի մարզի բնակիչ, 28-ամյա Վահե Մանուկյանն ու Opel-ի ուղևոր, Տավուշի մարզի բնակիչ, 43-ամյա  Կարեն Մարտիորսյանը մարմնական վնասվածքներով տեղափոխվել են «Աբովյան» բժշկական կենտրոն:  Գ. Շամշյանի տեղեկություններով՝ Mercedes C300–ի վարորդ Ժ. Ավետիյանը «Արարատբանկ» ԲԲԸ-ի  Հրազդանի մասնաճյուղի կառավարիչն է: 

Ռուսաստանին միանալու հանրաքվեի է պատրաստվում նաև ուկրաինական Զապորոժիեն: Որոշումը վարչակազմի ղեկավարը արդեն ստորագրել է: Արդյո՞ք դրանից հետո վերջնականապես փակուղում կհայտնվեն ռուս-ուկրաինական բանակցությունները: Զելենսկին համենայն դեպս հայտարարել է, որ ոչ մի թիզ հող չի զիջի Մոսկվային: Ի դեպ, գիշերը նորից ռմբակոծվել է Զապորոժիեյի ատոմակայանը: Ըստ Մոսկվայի՝ Կիևն է «Ուրագան» կասետային հրթիռներով հարվածել ատոմակայանին:

Թուրքիան չի աջակցի Ֆինլանդիայի և Շվեդիայի անդամակցությանը ՆԱՏՕ-ին, քանի դեռ նրա պայմանները չեն կատարվել, մասնավորապես, խոսքը ահաբեկչական կազմակերպությունների դեմ պայքարի պարտավորությունների մասին է, ասել է նախագահ Թայիփ Էրդողանը։ «Մենք հստակ հայտնել ենք մեր դիրքորոշումը Մադրիդում կայացած ՆԱՏՕ-ի գագաթնաժողովում: ՆԱՏՕ-ին անդամակցությունը այն երկրների, որոնց փողոցներում ազատ շրջում են Քրդստանի աշխատավորական կուսակցության (PKK) անդամները վնասում է դաշինքի արժեքներին: Ինչ վերաբերում է Ֆինլանդիային և Շվեդիային, մենք հստակ և վճռական դիրքորոշում ունենք: Մինչև նրանք չկատարեն իրենց խոսքը, Թուրքիան հավանություն չի տա ՆԱՏՕ-ին երկու երկրների անդամակցությանը»,- ասել է Էրդողանը՝ ելույթ ունենալով Անկարայում Թուրքիայի դեսպանների հետ հանդիպմանը։ Թուրքիայի, Ֆինլանդիայի և Շվեդիայի ԱԳ նախարարները հունիսի 28-ին Մադրիդում ՆԱՏՕ-ի գագաթնաժողովի շրջանակում ստորագրել են հուշագիր։ Փաստաթուղթը նախատեսում է համագործակցություն Անկարայի հետ ահաբեկչության դեմ պայքարում, մասնավորապես՝ PKK-ի, նրա ճյուղերի, ինչպես նաև Ֆեթուլլահիստական ​​ահաբեկչական կազմակերպության (FETO) հետ, որին թուրքական իշխանությունները մեղադրում են 2016 թվականի հեղաշրջման փորձին մասնակցելու համար։ Թուրքական իշխանությունները նախկինում հայտարարել էին, որ Ֆինլանդիայի և Շվեդիայի հետ ստորագրված հուշագիրը վերջնական չէ, և Թուրքիայի խորհրդարանը կարող է չհաստատել այն, եթե Հելսինկին և Ստոկհոլմը չկատարեն ահաբեկչական կազմակերպություններին հակազդելու իրենց ստանձնած պարտավորությունները։

Շիրակի մարզի ծննդօգնություն իրականացնող բուժհաստատություններում օգոստոսի 1-7 գրանցվել է 61 ծնունդ, նրանցից 32-ը տղա է, 29-ը՝ աղջիկ։ Տեղեկացնում է Շիրակի մարզպետարանը։

ԱՄՆ-ը Կիևին կտրամադրի ևս 4,5 միլիարդ դոլարի բյուջետային օգնություն, այսպիսով` փետրվարից Վաշինգտոնի բյուջետային աջակցությունը կհասնի 8,5 միլիարդ դոլարի։ «Արմենպրես»-ի հաղորդմամբ՝ այս մասին տեղեկացնում է «ՌԻԱ Նովոստի»-ն՝ հղում կատարելով Միջազգային զարգացման գործակալությանը: «ԱՄՆ-ը ևս 4,5 միլիարդ դոլար կտրամադրի Ուկրաինայի կառավարությանը»,-ասված է հաղորդագրությունում: Նշվում է, որ Համաշխարհային բանկի միջոցով օգնությունը Կիևին կտրամադրվի տրանշների տեսքով, օգոստոսին Ուկրաինան կստանա 3 մլրդ դոլար։

Գորիս-Կապան ճանապարհի որոշ հատվածներ թշնամուն հանձնելուց հետո շուտով արդեն մեկ տարի կլինի՝ 9 տասնյակ ընտանիք ունեցող Որոտան գյուղը մեկուսացած է աշխարհից: Իսկ Որոտան տանող այլընտրանքային ճանապարհի շինարարությունը արդեն 4 ամիս է՝ դադարեցված է: Այդ ճանապարհը անցնում է սողանքավտանգ գոտով, և գարնանային փլուզումներից հետո շինարարները հեռացել են այնտեղից, սպասում են նախագծային նոր լուծումների: Որոտանի ճամփի «դժոխային պարույրներով» անցել է «Հայլուրի» նկարահանող խումբը:

ՀՀ ՊՆ ռազմական ոստիկանության աշխատակիցների ձեռնարկած մեծածավալ գործողությունների արդյունքում հայտնաբերվել, ՌՈ բաժիններ են տեղափոխվել ՀՀ ԶՈւ մի շարք պարտադիր ժամկետային և պայմանագրային զինծառայողներ, որոնք, խախտելով ՀՀ ՊՆ N հրամանը, օգտագործել են սմարթ հեռախոսներ, զինվորական ծառայության առօրյայից լուսանկարներ են ներբեռնել համացանց: Պաշտպանության նախարարությունից տեղեկացնում են, որ զինծառայողները ենթարկվել են կարգապահական պատասխանատվության: ՀՀ պաշտպանության նախարարությունը հետամուտ է լինելու նմանօրինակ դեպքերի բացառմանը և կարգազանց զինծառայողներին ենթարկելու է պատասխանատվության

Ադրբեջանական բանակն այս պահին չի վերահսկում Եղցահող գյուղի մոտ գտնվող Սարիբաբա բարձունքի ամենաբարձր կետը՝ հակառակ Բաքվի քարոզչությանը: 44-օրյա պատերազմից հետո, երբ գործի դրվեց ալիևյան GPS-ը, պարզվեց, որ արցախա-ադրբեջանական սահմանն անցնում է հենց այդ սարով: Եղցահողում վստահեցնում են, որ օգոստոսի 1-ին թշնամին սահմանի իր հատվածում դիրքեր է տեղակայել և հընթացս փորձել է ավելի առաջանալ, ամբողջությամբ տիրել Սարիբաբային: Սակայն, ըստ Եղցահողի գյուղապետի, դա թշնամուն, ի վերջո, չի հաջողվել. հիմա՝ բարձունքում կան և՛ Արցախի պաշտպանության բանակի, և՛ ադրբեջանական զինուժի հենակետեր, որոնց նկատմամբ տիրապետող դիրք ունեն ռուս խաղաղապահները. նրա՛նք են ամենաբարձրում, համենայն դեպս, այս պահին:

Հայաստանի առաջատար լողորդներից Արթուր Բարսեղյանը ոսկե մեդալ է նվաճել Սանկտ Պետերբուրգում ընթացող Բանակայինների 3-րդ համաշխարհային խաղերում: Հայ մարզիկն առաջին տեղն է գրավել բատերֆլյայ ոճով 100 մետր լողի մրցումներում։ Նա մրցատարածությունը հաղթահարել է 55,09 վայրկյանում։ Ռազմական սպորտի միջազգային խորհրդի և ՌԴ պաշտպանության նախարարության աջակցությամբ անցկացվող Խաղերի ծրագրում ընդգրկված է 7 մարզաձև՝ վոլեյբոլ, աթլետիկա, ամառային բիաթլոն, միջազգային ռազմական հնգամարտ, լող, մարզական կողմնորոշում, ստանդարտ զենքից հրաձգություն։ Խաղերին մասնակցում են 18 երկրների ներկայացուցիչներ։

Գեղարքունիքի մարզում ադրբեջանցիները կրակել են հայկական դիրքերի ուղղությամբ, վիրավորել հայ զինվորի: Հանգստյան օրերին հնչած կրակոցների ձայները հասել են Սոթք: Բնակիչները գյուղ այցելած մեր թղթակիցներին պատմել են, որ վերջերս թշնամին հաճախակի է խախտում հրադադարը: Ռուսաստանի պաշտպանության նախարարությունը ևս հաստատել է, որ Ադրբեջանն է խախտել հրադադարը: Կրակոցների մասին Հայաստանի պաշտպանական գերատեսչությունը հայտնել էր դեպքից 16 ժամ հետո միայն: Իսկ զինվորի վիրավորվելու մասին հաղորդագրությունը տարածեցին միայն այն ժամանակ, երբ ժամկետային զինծառայող Նվեր Գևորգյանի հորաքույրը հայտնեց դրա մասին:

14 տարի է անցել ռուս-վրացական պատերազմից: Հնգօրյա մարտերից հետո Հարավային Օսիան իրեն հռչակեց անկախ պետություն, իսկ Վրաստանը հայտարարեց, որ Ռուսաստանը օկուպացրել է իր տարածքները: Փորձագետները արձանագրում են, որ ռուս-վրացական պատերազմը դեռ չի ավարտվել, հակամարտությունը շարունակում է մնալ պայթյունավտանգ: ժնևյան բանակցությունները ձգձգելու համար Մոսկվան Արևմուտքին է մեղադրում, որը, ըստ փորձագետների, ամեն ինչ անում է Հարավային Կովկասում ամրանալու համար:

ՌԴ նախագահ Վլադիմիր Պուտինը չի մեկնելու Նյու Յորք՝ սեպտեմբերին կայանալիք ՄԱԿ-ի Գլխավոր ասամբլեայի 77-րդ նստաշրջանին մասնակցելու և չի նախատեսում ելույթ ունենալ անգամ տեսակապով: «Արմենպրես»-ի հաղորդմամբ՝ ՏԱՍՍ գործակալությունը տեղեկացնում է, որ այս մասին հայտնել է ՌԴ նախագահի մամուլի քարտուղար Դմիտրի Պեսկովը: «Ոչ, ուղևորություն և ելույթ չի նախատեսվում»,-ասել է նա: ՄԱԿ-ի Գլխավոր ասամբլեայի բարձր մակարդակի շաբաթը կանցկացվի Նյու Յորքում, որտեղ գտնվում է կազմակերպության կենտրոնակայանը, սեպտեմբերի 20-ից 26-ը։ Ավանդաբար մասնակցում են նախագահներ, վարչապետներ, նախարարներ: Ռուսական պատվիրակությունն այս տարի կգլխավորի արտգործնախարար Սերգեյ Լավրովը։

Մոսկվայի և Կիևի միջև այժմ բանակցային որևէ գործընթաց չկա: «Արմենպրես»-ի հաղորդմամբ՝ «Eeuronews»-ը տեղեկացնում է, որ նման հայտարարությամբ հանդես է եկել ՌԴ նախագահի մամուլի քարտուղար Դմիտրի Պեսկովը: Նա տեղեկացրել է, որ հատուկ ռազմական օպերացիան շարունակվում է: «Ռուսաստանի նախագահ Վլադիմիր Պուտինի և Վլադիմիր Զելենսկու հանդիպումը հնարավոր է միայն այն բանից հետո, երբ բանակցողները կավարտեն իրենց «տնային աշխատանքը», ուստի այս առայժմ նման հանդիպման համար նախադրյալներ չկան»,-ասել է Պեսկովը: Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Պուտինին առաջարկել է Զելենսկու հետ հանդիպում կազմակերպել:

ԱՄՆ նախագահ Ջո Բայդենը հայտարարել է, որ կորոնավիրուսային հիվանդությունը տանելուց հետո արդեն իրեն լավ է զգում: «Արմենպրես»-ի հաղորդմամբ՝ այս մասին տեղեկացնում է «ՌԻԱ Նովոստի»-ն: «Ամեն ինչ կարգին է»,-ասել է Բայդենը՝ պատասխանելով լրագրողների՝ իր առողջության մասին հարցին: Բայդենը կորոնավիրուսով վարակվել էր երկու շաբաթ առաջ, ապաքինվել էր, սակայն կարճ ժամանակ անց նորից իր մոտ կորոնավիրուսային թեստը դրական պատասխան էր ունեցել: Նա շարունակել էր մնալ ինքնամեկուսացման պայմաններում: Օգոստոսի 7-ին ԱՄՆ նախագահի կորոնավիրուսի թեստը բացասական պատասխան էր ունեցել: Բժիշկը թույլատրել է նրան վերադառնալ անմիջական շփման, աշխատանքի: