Լրահոս

ՀՀ քննչական կոմիտեի Կոտայքի մարզային քննչական վարչությունում ձեռնարկված քննչական և դատավարական այլ գործողությունների, ինչպես նաև ՀՀ ոստիկանության աշխատակիցների հետ համատեղ իրականացված միջոցառումների արդյունքում բացահայտվել է օրեր առաջ «Հայփոս» ՓԲԸ-ին պատկանող ինկասացիայի ավտոմեքենայից կատարված գողության դեպքը: Նախնական տվյալներով՝ 2022 թվականի մարտի 2-ին՝ ժամը 13:50-ին, քաղաքացին զանգահարել է ՀՀ ոստիկանություն և հայտնել, որ Չարենցավան քաղաքի «Հայփոստ» բաժանմունքի դիմաց կայանված հիշյալ ինկասացիայի ավտոմեքենայից անհետացել է կենսաթոշակների համար նախատեսված գումարով պարկը, որի մեջ եղել է 6.500.000 ՀՀ դրամ գումար: Դեպքի առթիվ ՀՀ ոստիկանության Չարենցավանի բաժնում, ՀՀ քրեական օրենսգրքի 177-րդ հոդվածի 3-րդ մասի 1-ին կետով, հարուցվել է քրեական գործ, որը նախաքննություն կատարելու համար ուղարկվել է ՀՀ քննչական կոմիտեի Կոտայքի մարզային քննչական վարչություն: Նախաքննության ընթացքում իրականացված անհետաձգելի միջոցառումների արդյունքում հիշյալ գողությունը կատարելու կասկածանքով ձերբակալվել է Երևան քաղաքի 33-ամյա բնակիչը, ով տվել է խոստովանական ցուցմունք և պատրաստակամություն հայտնել ներկայացնել գողոնը: 33-ամյա տղամարդու մասնակցությամբ կատարված խուզարկության ժամանակ, վերջինս ներկայացրել է իր բնակարանում պահվող 6.500.000 ՀՀ դրամ գումարը, որն առգրավվել է: Կատարվում է նախաքննություն:

Ճանապարհային ոստիկանությունը զգուշացնում է. Հանրապետությունում տեղացող առատ ձյան պատճառով որոշակի դժվարություններ են առաջացել վարորդների համար։ «Ճանապարհային ոստիկանությունը հորդորում է հատկապես բարձրադիր մարզեր ուղևորվելիս երթևեկել բացառապես ձմեռային անվադողերով, խստորեն պահպանել ճանապարհային երթևեկության կանոնները և, հատկապես ոլորաններով երթևեկելիս, մեքենաների արագությունն ընտրել՝ հաշվի առնելով եղանակային պայմաններն ու ճանապարհածածկույթի վիճակը։ «Մաղթում ենք անվտանգ երթևեկություն»,-նշում են ՃՈ-ից։

Մարտի 4-ին՝ ժամը 17։00-ի դրությամբ, Սիսիանի տարածաշրջանի Գորայք-Սարավան ճանապարհահատվածը բքի պատճառով դժվարանցանելի է կցորդով տրանսպորտային միջոցների համար, տեղեկացնում է «Ճանապարհային դեպարտամենտ» հիմնադրամը։ Բքի պատճառով Արագածոտնի տարածաշրջանի Միրաք-Ծիլքար և Ալագյազ-Հնաբերդ ճանապարհահատվածները դժվարանցանելի են։ Սաստիկ բքի և տեսանելիության բացակայության պատճառով Վարդենյաց լեռնանցքը փակ է բոլոր տեսակի տրանսպորտային միջոցների համար։ Սևանի, Ջերմուկի տարածաշրջաններում և Սարավանի լեռնանցքում ձյուն է տեղում։ Մաստարա-Լանջիկ ճանապարհահատվածում բուք է։ Ճանապարհաշինարարներն ավտոճանապարհներին իրականացնում են մաքրման և աղ-ավազով մշակման աշխատանքներ: Միջպետական և հանրապետական նշանակության մյուս ավտոճանապարհները բաց են:

Թուրքիայի իշխանությունները ցանկանում են Անթալիայում կայանալիք դիվանագիտական համաժողովի շրջանակում կազմակերպել ՌԴ և Ուկրաինայի ԱԳ նախարարներ Սերգեյ Լավրովի և Դմիտրի Կուլեբայի հանդիպումը, հայտարարել է Թուրքիայի արտգործնախարար Մևլութ Չավուշօղլուն՝ մամուլի ասուլիսի ժամանակ։ «Թուրքիան այն փոքրաթիվ երկրներից է, որոնք կարող են երկխոսություն կազմակերպել երկու կողմերի միջև։ Դեռ «պատերազմից» առաջ մենք նախատեսել էինք երկու երկրների արտաքին գործերի նախարարներին մի հարկի տակ բերել՝ Անթալիայում կայանալիք դիվանագիտական համաժողովի շրջանակներում։ Մենք ցանկանում ենք ռուսական և ուկրաինական կողմերի միջև նախարարների մակարդակով հանդիպում կազմակերպել։ Լավրովը երեկ հաստատել է իր մասնակցությունը դիվանագիտական համաժողովին, բայց չգիտեմ՝ կարո՞ղ է արդյոք այս պայմաններում Թուրքիա ժամանել Ուկրաինայի ԱԳ նախարարը»,- Չավուշօղլուի խոսքերն է մեջբերել ՏԱՍՍ գործակալությունը։ Բացի այդ, Թուրքիայի ԱԳ նախարարը հայտարարել է, որ «Թուրքիայի բաց երկինքը ռազմավարական ու հումանիտար նշանակություն է ձեռք բերել» այս օրերին։ Հիշեցնենք՝ Անթալիայում դիվանագիտական համաժողովը նախատեսված է անցկացնել մարտի 11-ից 13-ը։ Դրան հրավիրված է նաև հայկական կողմը։ Չորեքշաբթի ՀՀ կառավարության հետ ԱԺ պատգամավորների հարցուպատասխանի ժամանակ ՀՀ ԱԳՆ Արարատ Միրզոյանը հայտարարել է, որ համաժողովին մասնակցելու որոշում դեռ չկա․ պատճառն աշխարհում սրընթաց զարգացումներն են։

Մարտի 4-ին, ժամը 15:34-ին Ճգնաժամային կառավարման ազգային կենտրոն ահազանգ է ստացվել, որ հրդեհ է բռնկվել Երևանի Ներքին Շենգավիթ թաղամասի 6-րդ փողոցի տներից մեկում: Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երեք մարտական հաշվարկ, Հրդեհաշիջման և փրկարարական աշխատանքների կազմակերպման բաժնի և Ճգնաժամային կառավարման ազգային կենտրոնի օպերատիվ խմբերը: Ըստ նախնական տվյալների՝ հրդեհը բռնկվել է տան տանիքում: Հրդեհը մեկուսացվել է ժամը 16:10-ին:

ՌԴ պաշտպանության նախարարությունը տեսանյութ է հրապարակել հարվածային ԱԹՍ–ն կառավարող օպերատորի էկրանից։ Ռուս զինվորականները Դոնեցկի Ժողովրդական Հանրապետության տարածքում «Ինոխոդեց» հարվածային անօդաչու թռչող սարքով ոչնչացրել են «Այդար» գումարտակի հրամանատարական դիտակետը։ Տեղեկությունը հայտնում են ՌԴ պաշտպանության նախարարությունից։ ՊՆ - ն ցուցադրել է հարվածային դրոնի օպերատորի էկրանից արված տեսագրությունը, որում երևում է, թե ինչպես է դրոնը մի շարք շենքերի վրայով թռիչք կատարում: Կադրում կարելի է տեսնել կառավարվող հրթիռը, որը ճշգրիտ հարվածով ոչնչացնում է կառույցներից մեկը։

Առաջին անգամ Հայաստանում օդանավ է անվանակոչվել հայ զինվորի անունով։ Armenia Airways ավիաընկերությունն իր ինքնաթիռներից մեկը՝ EK-73730 գրանցման համարով «Boeing 737-300»-ը, անվանակոչվել է 44-օրյա պատերազմում զոհված շարքային Գրիգոր Ղազարյանի անունով:

Վրաստանի առողջապահության նախարարությունը կամավորներին կոչ է արել արյուն հանձնել Ուկրաինայի համար: Այդ մասին հաղորդվում է նախարարության Ֆեյսբուքի էջում: «Նախարարությունը սկսում է Ուկրաինային օգնելու համար արյուն հանձնելու ցանկություն ունեցողների գրանցումը, հետաքրքրված մարդիկ կարող են զանգահարել 1505 հեռախոսահամարով կամ գրանցվել կայքում», - ասվում է հաղորդագրությունում: Նախարարությունը հայտնում է, որ հավաքված արյունը պահանջված մշակումից հետո կուղարկվի Ուկրաինա՝ որպես մարդասիրական օգնություն: Վրաստանի կառավարությունը երկուշաբթի օրը 100 տոննա մարդասիրական օգնություն է ուղարկել Ուկրաինա: Բացի այդ, Վրաստանում հյուրանոցներում անվճար տեղավորում են ուկրաինացի այն զբոսաշրջիկներին, ովքեր պատերազմի պատճառով չեն կարողանում տուն վերադառնալ:

«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ ուժեղ քամիներով պայմանավորված ընդհատվել է Լճաշեն պոմպակայանի էներգասնուցումը, որի հետևանքով՝ ս.թ. մարտի 4-ին ժամը 14.00-20.00 կդադարեցվի հետևյալ տարածքների ջրամատակարարումը. Գեղարքունիքի մարզի՝ Սևան քաղաքի, Գագարինավան թաղամասի, Վարսեր գյուղի, Կոտայքի մարզի՝ Ջրառատ գյուղի: Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

Եվրամիությունն այս պահին չի քննարկում իր անհապաղ ընդլայնման տարբերակը: Մարտի 4-ին Corriere della Sera թեթում հրապարակված հարցազրույցում այդ մասին հայտարարել Է Իտալիայի եվրոպական գործերի (անպորտֆել) նախարար Էնցո Ամենդոլան՝ մեկնաբանելով Միությանն Ուկրաինայի անդամակցության հեռանկարները, տեղեկացնում Է «Արմենպրես»-ը: «Ուղին շատ երկար Է ընթացակարգերի տեսակետից: Անհապաղ ընդլանումն օրակարգում դրված չԷ՝ հաշվի առնելով նեկայիս ժամանակները»,- ասել Է նա: Ավելի վաղ Ուկրաինայի նախագահ Վլադիմիր Զելենսկին դիմել Է Եվրամիությանը՝ անհապաղ Միությանն անդամակցելու խնդրանքով: Դրանից հետո երկրի վարչապետ Դենիս Շմիգալը հայտարարել Է, որ Ուկրաինան ներկայացնում Է Եվրամիության անդամակցության հայտ հատուկ ընթացակարգով: Եվրամիության արտաքին գործերի եւ անվտանգության քաղաքականության գերագույն ներկայացուցիչ Ժոզեպ Բորելը փետրվարի 28-ին հայտնել Է, որ Եվրամիության ղեկավարների ընթացիկ օրակարգում Միություն Ուկրաինայի ընդուման հարց չկա: Իր հերթին Եվրամիության ղեկավար Շառլ Միշելը մարտի 1-ին Եվրախորհրդարանի արտահերթ լիագումար նստաշրջանում, որը նվիրված Էր Ուկրաինայի իրադրությանը, հայտարարել Է, որ ԵՄ-ի խորհուրդը լրջորեն կվերլուծի Եվրամիությանն Ուկրաինայի անդամակցության հայտը: ԵՄ-ի խորհրդի հերթական նիստը տեղի կունենա մատի 24 – 25-ը, հաղորդել Է ՏԱՍՍ-ը:

Խարկովում ծանր վիրավորում են ստացել հայկական ընտանիքի 4 անդամ` ծնողներն ու նրանց 2 անչափահաս երեխաները։ Տեղեկությունը Sputnik Արմենիայի հետ զրույցում հայտնեց Խարկովում Հայաստանի պատվավոր հյուպատոսի օգնական Համլետ Հովհաննիսյանը։ «Վիրավորվել են ամուսինները և նրանց երկու անչափահաս երեխաները: Հարված է եղել անմիջապես նրանց շենքին, իրենք առաջին հարկում են եղել, հարվածը եղել է իրենց խոհանոցին: Բոլորը ծանր վիրավորում են ստացել։ Ծնողները դեռևս չեն կարողանում քայլել, բեկորային վնասվածքներ են ստացել: Վիրահատությունից հետո նրանց վիճակը կայուն է»,–հայտնեց Հովհաննիսյանը: Նրա խոսքով` 4 հոգուց բաղկացած հայերի ընտանիքը վիրավորում է ստացել մարտի 1–ին։ Նշենք, որ ընտանիքը մինչ դեպքը ցանկացել է հեռանալ Խարկովից, պարզապես հնարավոր չի եղել դա անել։ Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։ Մարտական գործողություններն ընթանում են արդեն 9–րդ օրը։

Ռափլիի թղթակիցները եղել են Լուգանսկի ու Դոնեցկի ռուսական վերահսկողության տակ անցած բնակավայրերում, որտեղ մարդիկ դեռ չեն էլ հասկացել՝ ինչ է կատարվել: Միայն գիտեն, որ ամենաշատը հիմա խաղաղություն են ուզում: Երեկ հայտնի դարձավ, որ արդեն 2 մլն մարդ տեղահանվել է, նրանցից ավելի քան մեկ միլիոն ավելի մարդ դուրս է եկել Ուկրաինայից՝ տեղավորվել հիմնականում Լեհաստանում, Հունգարիայում, Մոլդովայում:

Ազգային ժողովը մերժեց «Պատիվ ունեմ» խմբակցության պատգամավոր Թագուհի Թովմասյանի ներկայացրած օրենքի նախագիծը, որով առաջարկվում է հնարավորություն ընձեռել, որ պայմանագրային զինծայողները Կադաստրի կոմիտեի վկայականի հիման վրա բնակարանի վարձավճարի փոխհատուցում ստանան: Քվեարկությունից առաջ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ասաց, թե հանձնաժողովն իր քվեարկությամբ հնարավորություն էր տվել, որ հարցը քննարկվի լիագումար նիստում, սակայն նախագիծը ոչ միայն առկա խնդիրները չի լուծում, այլ՝ նոր խնդիրներ է առաջ քաշում. վերջինս կոչ արեց քաղաքական մեծամասնությանը դեմ քվեարկել: Նախագիծը քվեարկությամբ ստացավ 22 կողմ, 62 դեմ, 2 ձեռնպահ ձայն: Հիշեցնենք՝ գործող օրենքի համաձայն` պայմանագրային զինծառայողները վարձավճարի փոխհատուցում ստանալու համար բնակարանի վարձակալության պայմանագիր են ներկայացնում:

ՀՀ գլխավոր դատախազ Արթուր Դավթյանն ընդունել է տարածաշրջանային այցի շրջանակում Հայաստանի Հանրապետություն ժամանած Ռուսաստանի Դաշնության գլխավոր դատախազի տեղակալ, գլխավոր զինվորական դատախազ Վալերի Պետրովի գլխավորած պատվիրակությանը: Վերջինիս կազմում էր նաև ՌԴ հարավային ռազմական շրջանի զինվորական դատախազ Վլադիսլավ Պրիխոդկոն, որի ենթակայությամբ են գործում ռուսական խաղաղապահ ուժերի շրջանակում Արցախում տեղակայված ՌԴ դատախազության ներկայացուցիչները: Արթուր Դավթյանը նախ շնորհակալություն է հայտնել այս կարևոր այցը ՌԴ-ի համար ներկայիս դժվարին պահին իրականացնելու համար: Նա արժևորել է ՀՀ և ՌԴ դատախազական համակարգերի միջև հաստատված և օրստօրե ավելի խորացող հարաբերությունները: Համագործակցությունը զարգացնելու երկուստեք շահագրգռությունը, ըստ ՀՀ գլխավոր դատախազի, նպաստել է իրավական փոխօգնության, մարդկային ռեսուրսների կատարելագործման և անդրազգային հանցավորության դեմ պայքարի ոլորտներում համատեղ շոշափելի արդյունքների ապահովմանը: Նա ընդգծել է ՌԴ իր գործընկերոջ՝ Իգոր Կրասնովի անձնական ներդրումը հետպատերազմյան շրջանում կուտակված հումանիտար հիմնահարցերի լուծման նախաձեռնություններում, շեշտել հատկապես կողմերի միջև հաղորդակցության, տեղեկատվության փոխանակման ձևաչափեր ապահովելու, երկխոսության մթնոլորտ ձևավորելու հարցում ՌԴ դատախազության դրսևորած հետևողականությունը: ՌԴ գլխավոր զինվորական դատախազ Վալերի Պետրովը նշել է, որ ՀՀ և ՌԴ դատախազությունները հաջողությամբ գործակցում են ինչպես երկկողմ, այնպես էլ բազմակող ձևաչափերով, ինչի համար կարևոր նախադրյալ է ապահովում նախընթաց ժամանակահատվածում ձևավորված հարուստ իրավապայմանագրային բազան, ունեցած ընդհանուր պատմությունն ու ավանդույթները: Հանդիպման ընթացքում մտքեր են փոխանակվել մարդու հիմնարար իրավունքների պաշտպանության, հանցավորության միտումների վրա հակամարտությունների ազդեցության վերաբերյալ: Երկուստեք կարևորվել է Արցախում ռուսական խաղաղապահ ուժերի և Սյունիքում սահմանապահ ծառայություն իրականացնող ՌԴ ԶՈւ ստորաբաժանումների դերը տարածաշրջանային կայունության, լարվածության թուլացման հարցում: Արթուր Դավթյանն նշել է, որ Հայաստանում և Արցախում տեղակայված ՌԴ ԶՈՒ ուժերը ՀՀ ԶՈՒ և ԱրՀ պաշտպանության բանակի հետ միասին անվտանգության երաշխիքներ են ստեղծում հայ ազգաբնակչության համար, ապահովում բնականոն կենսագործունեությունը հատկապես շփման գծին մերձ բնակավայրերում: Ընդգծվել է, որ Արցախում գտնվող ՌԴ դատախազության ներկայացուցիչների գործունեությունը նպաստում է ռուսական ռազմական կոնտիգենտի շրջանում իրավակարգի ապահովմանը, ազգաբնակչության հետ հարաբերություններում փոխվստահության բարձրացմանը: Արթուր Դավթյանը հյուրերին մանրամասն տեղեկացրել է այն մասին, որ Ադրբեջանը շարունակում է չկատարել 2020թ. նոյեմբերի 9-ին ստորագրված եռակողմ հայտարարությունից բխող՝ հայ ռազմագերիների և պահվող այլ անձանց ՀՀ-ին անվերապահորեն վերադարձնելու հումանիտար պարտավորությունները, ավելին, շարունակվում են նրանց նկատմամբ անհիմն և ապօրինի քրեական հետապնդումները և դատական գործընթացները: Բացի այդ, արձանագրվել են հրադադարի ռեժիմն Ադրբեջանի ԶՈւ կողմից խախտելու բազմաթիվ դեպքեր, որոնք զինծառայողների և քաղաքացիական բնակչության շրջանում հանգեցրել են զոհերի, բազմաթիվ գույքերի վնասման: Այդ միջադեպերի մասին տեղեկատվության փաթեթը փոխանցվել է ռուսական կողմին՝ հույս հայտնելով, որ դրանք կքննարկվեն ադրբեջանական կողմի հետ հետագա հաղորդակցության ընթացքում: Արթուր Դավթյանը ՌԴ գործընկերների ուշադրությունը հրավիրել է այն իրողության վրա, որ ադրբեջանական կողմի խուսափողական վարքագծի պատճառով գործնականում ցածր արդյունավետություն ունի նաև շփման գոտում խախտումների և միջադեպերի վերաբերյալ ՀՀ-ի, ՌԴ-ի և ԱՀ-ի միջև տեղեկատվության փոխանակման, բոլոր դեպքերը պատշաճ քննության առարկա դարձնելու շուրջ երեք երկրների գլխավոր դատախազների ձեռք բերած պայմանավորվածությունների կատարումը: Կողմերը պայմանավորվել են շարունակել երկխոսությունը երկուստեք բարձրացված հարցերի շուրջ:

Ազգային ժողովը քննարկեց ՀՀ կառավարության կողմից ներկայացված «Ահաբեկչության կանխարգելման մասին Եվրոպայի խորհրդի կոնվենցիայի լրացուցիչ արձանագրությունը վավերացնելու մասին» ՀՀ օրենքի նախագիծը: Նախագիծն Ազգային ժողովում զեկուցում էր ԱԱԾ տնօրենի տեղակալ Սամվել Հայրապետյանը: Նա նշեց, որ արձանագրությունը ստորագրվել է 2015 թվականի հոկտեմբերի 22-ին Ռիգայում՝ 18 պետությունների կողմից: Հայաստանի կողմից արձանագրությունը ստորագրվել է 2018 թվականի հունվարի 24-ին: ՀՀ ԱԳՆ-ից ստացված տեղեկատվության համաձայն՝ արձանագրությունը ստորագրած 42 պետություններից ներպետական ընթացակարգերն ավարտել ու արձանագրությունը ուժի մեջ է մտել 24 պետությունների համար: Արձանագրության նպատակ է լրացումներ կատարել 2005 թվականի մայիսի 16-ին Վարշավայում ստորագրված Ահաբեկչության կանխարգելման մասին Եվրոպայի խորհրդի կոնվենցիայում, որով նախատեսվում է քրեականացնել արձանագրության 2-ից 6-րդ հոդվածներով սահմանված հետևյալ արարքները՝ ահաբեկչության նպատակով որևէ միավորման կամ խմբի մասնակցելը, ահաբեկչության նպատակով ուսուցում ստանալը, ահաբեկչության նպատակով արտերկիր մեկնելը, ահաբեկչության նպատակով արտերկիր մեկնելը ֆինանսավորելը, ահաբեկոչության նպատակով արտերկիր մեկնումը կազակարպելը կամ այլ կերպ դրան օժանդակելը: Արձանագրության վավերացման արդյունքում Հայաստանը կամբողջացնի ահաբեկչության կանխարգելման ու դրա դեմ պայքարի վերաբերյալ Եվրոպայի խորհրդում գործող փաստաթղթերին միանալու գործընթացը: Արձանգրության կիրառումը կնպաստի ահաբեկչության դրսևորաման բոլոր ձևերի կանխարգելմանը, մարդու իրավունքների, մասնավորապես, կյանքի իրավունքի վրա դրա բացասական հետարանքների կանխմանը, ինչպես նաև առավել կհամախմբի ահաբեկչության դեմ պայքարի ոլորտում կոնվենցիայի կողմ պետությունների ջանքերը: «Հայաստան» խմբակցության պատգամավոր Արմեն Գևորգյանը հետաքրքրվեց, որ 2020 թվականի 44-օրյա պատերազմի ժամանակ վարձկանների տեղափոխումը տարբեր երկրներից դեպի Ադրբեջան այս արձանագրության վավերացմամբ որևէ ձևով նոր հնարավորություն տալո՞ւ է այս խնդիրները միջազգային ատյաններում բարձրաձայնելու, առաջ տանելու ու դատապարտելու: ԱԱԾ տնօրենի տեղակալն էլ նշեց՝ կարծում է ՝մի քիչ խնդրահարույց կարող է լինել միջազգային հանրության տեսակետից. Ղարաբաղը կարող է ճանաչվել որպես վավերացմանը մասնակցող կողմ, բայց ԱԱԾ-ն իր ունեցած միջազգային իրավակարգավորումների շրջանակներում փորձել է միջազգային տարբեր ատյաններ հասանելի դարձնել: «Կա՞ տեղեկություն, թե ինչ արձագանքներ են ստացվել», - հետաքրքրվեց Գևորգյանը: Սամվել Հայրապետյանն էլ ասաց, որ տեղեկատվությունը հասանելի են դարձրել ՀՀ արտաքին գործերի նախարարության խողովակներով, իսկ ԱԱԾ-ի մակարդակով հասանելի են դարձրել ԱՊՀ երկրների հակաահաբեկչական կենտրոնին, որը համապատասխան միջոցներ է ձեռնարկել: «Շուրջ 250 ինքնորոշիչ տվյալներ մուտք է գործվել իրենց տեղեկատվական ռեսուրսներ հետագայում դրանց մուտքը տարբեր երկրներ կանխելու նպատակով», - հայտարարեց ԱԱԾ տնօրենի տեղակալը:

Ըստ Զելենսկիի՝ այս գիշերը կարող էր կանգնեցնել Ուկրաինայի ու Եվրոպայի պատմությունը: Նա այսպիսի հայտարարություն է արել՝ Զապորոժյեի ատոմակայանի մոտ բռնկված հրդեհի պատճառով: Ըստ Զելենսկիի պնդումների՝ ռուսական ուժերն են միտումնավոր թիրախավորում ատոմակայանի տարածքը:

ՌԴ նախագահ Վլադիմիր Պուտինն ասել է, որ որքան էլ դժվար լինի, Ռուսաստանը կշարունակի իր զարգացումը, տրանսպորտային և լոգիստիկ ենթակառուցվածքները կամրապնդվեն ողջ երկրում։ «Անկախ նրանից, թե որքան դժվար է, մենք անպայման կշարունակենք մեր զարգացումը, մենք կուժեղացնենք տրանսպորտային և լոգիստիկ ենթակառուցվածքները ողջ երկրում», - ասել է ՌԴ նախագահը։ Նախագահը նաև կոչ է արել հարևան երկրներին չսրել և վատթարացնել հարաբերությունները Ռուսաստանի հետ։

ՀՀ քննչական կոմիտեի Արարատի մարզային քննչական վարչությունում ավարտվել է Արտաշատ քաղաքի 28-ամյա բնակչին դանակահարելու դեպքի առթիվ հարուցված քրեական գործի նախաքննությունը: Մինչդատական վարույթում իրականացված քննչական և դատավարական այլ գործողությունների արդյունքում պարզվել են դեպքի բոլոր հանգամանքները, այդ թվում՝ շարժառիթը, դեպքի վայրը: Քրեական գործի նախաքննությամբ պարզվել է, որ 2021թ. հոկտեմբերի 4-ին՝ ժամը 16:00-ի սահմաններում, Արտաշատ քաղաքի Աթարբեկյան-Զորավար Անդրանիկ փողոցների խաչմերուկում, անձնական հարցերի շուրջ վիճաբանություն է տեղի ունեցել Արտաշատ քաղաքի՝ 28-ամյա բնակչի և նրա հարևան, 54-ամյա տղամարդու միջև, որի ժամանակ էլ վերջինս իր մոտ եղած դանակով դիտավորությամբ հարվածել է երիտասարդին՝ նրան պատճառելով կյանքին վտանգ սպառնացող մարմնական ծանր վնասվածքներ: Ձեռք բերված բավարար ապացույցների համակցությամբ՝ 54-ամյա տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով: Որպես խափանման միջոց վերջինիս նկատմամբ ընտրվել է ստորագրություն՝ չհեռանալու մասին: Նախաքննությունն ավարտվել է, և քրեական գործը, մեղադրական եզրակացությունը հաստատելու և դատարան ուղարկելու միջնորդությամբ, ուղարկվել է դատավարական ղեկավարում իրականացնող դատախազին:

Ուկրաինական դիվերսիոն խումբը սադրանքի փորձ է կատարել Զապորոժիեի ատոմակայանի հարակից տարածքում, այսօր ճեպազրույցում հայտնել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը։ «Անցած գիշեր էլեկտրակայանի հարակից տարածքում Կիևի ազգայնական վարչակարգը փորձել է հրեշավոր սադրանք իրականացնել», - ասել է նա։ Նրա խոսքով՝ մարտի 4-ին՝ ժամը 02:00-ի սահմաններում, կայարանին հարակից պահպանվող տարածքում հսկելիս ռուսական գվարդիայի շարժական պարեկը ենթարկվել է ուկրաինական դիվերսիոն խմբի հարձակմանը։ Կոնաշենկովը նաև ասել է, որ Ուկրաինայի նախագահ Վլադիմիր Զելենսկիի հայտարարությունները և ԱՄՆ-ի և Մեծ Բրիտանիայի հետ Զապորոժիեի ատոմակայանի վերաբերյալ նրա բանակցությունները վկայում են Ռուսաստանին ռադիոակտիվ աղտոտման աղբյուր ստեղծելու մեջ մեղադրելու փորձի մասին։