Լրահոս

Ուրեմն իմ պաշտոնավարման ավարտից անմիջապես հետո` այս 2 օրը, որոշ մանրախնդիր մարդիկ երկրի գործադիր իշխանության ղեկավարի աշխատակազմի մակարդակով զբաղված են երկրի համար «կարևորագույն գործով»: Պարզվում է` Մարդու իրավունքների պաշտպանի Ֆեյսբուքի էջի գաղտնաբառեր են որոնում. իբր «պետական միջոցներով զարգացրած էջը չի վերադարձվում»: Հանրային հեռուստաընկերության պաշտոնական կայքն ու Ֆեյսբուքի էջն էլ, երկրի արդիական հարցերը թողած, այս հարցը համարելով ֆունդամենտալ կարևորության, սկսեց առաջինը հրապարակումներ անել` բացահայտ ցույց տալով իր քաղաքական կողմնորոշումը: Դրան էլ հաջորդեցին ուղղորդված կեղծ էջերից արշավները ծայրահեղ վիրավորանքներով ու ատելությամբ: Այս մանրախնդիր հարցին ես չէի անդրադառնա, եթե չլիներ սկսված արշավը հանրային լայն ռեսուրսների ներգրավմամբ: Ուրեմն, ասեմ, որ երբ ստանձնել եմ Մարդու իրավունքների պաշտպանի պաշտոնը ՀՀ մարդու իրավունքների պաշտպանի էջը չի եղել առհասարակ. ինձանից առաջ պաշտոնավարած Մարդու իրավունքների պաշտպանն ամբողջությամբ փակել էր բոլոր էջերը կամ «տարել» իր հետ: Քանի որ ինքս կարևորում եմ կոնկրետ գործ անելն ու նման մանր հարցերի ուշադրություն չեմ դարձնում, առանց որևէ ձայն անգամ բարձրացնելու կամ անգամ որևէ մեկի այդ մասին ասելու, բացել ենք նոր էջ, որը հետագայում զարգացվել է բացառապես իմ անձնական միջոցներով: Քանի որ իմ պաշտոնավարման մինչև վերջին րոպեները ողջ աշխատակազմով եղել ենք գերծանրաբեռնված կոնկրետ գործերով, նման հարցերով զբաղվելու ժամանակ ընդհանրապես չենք ունեցել: Ինքս Ֆեյսբուքի տեխնիկական լուծումներին կամ հարցերին չեմ տիրապետում: Դրանից բացի, քանի որ էջը մի քանի ադմին է ունեցել թյուրիմացաբար էջում կատարվել են փոփոխություններ, որոնք լրացուցիչ մի քանի ժամանակատար խնդիր էին առաջ բերել: Բացի այդ, խնդիր էր առաջացել իմ ինստագրամյան անձնական էջը Ֆեյսբուքից առանձնացելու հարցում: Այս ամենի մասին տեղեկացրել էի նաև Մարդու իրավունքների նորընտիր պաշտպանին: Ինչևէ, մենք երկուսով այս փոքր հարցը քննարկել ու վաղուց ամուր փակել ենք: Բայց հարցն այստեղ բոլորովին այլ է. մի քանի օր է, ինչ Վարչապետի աշխատակազմով, Հանրային հեռուստաընկերությունով, կառավարող կուսակցությունով լծվել են այս էժան թեմայի զարգացմանը: Բայց դա էլ հատուկ անում են այնպես, որ մտադրված վնաս են տալիս Մարդու իրավունքների պաշտպանի հաստատությանը քաղաքական շահերի համար: Բավական չէ՞ դուք Ֆեյսբուքում ապրեք: Բա գործ արեք, թե՞ չի ստացվում գործ անելն ու վիրտուալ իրականությունը կոմֆորտ է. գործի պատասխանատվությունից հեռու է պահում: Ֆեյսբուքով երկիր կառավարելով` աղետի առաջ եք կանգնեցրել մի ողջ ժողովրդի, իրական վտանգի տակ եք դրել մեր պետականությունն ու անվտանգությունը: Գնալով ավելի եմ համոզվում, որ մեր պետությունում պատասխանատու պաշտոններ որոշ զբաղեցնողների կյանքի առաքելությունը ոչ թե Հայրենիքի պաշտպանությունն է ու պետության անվտանգությունը, սահմանային բնակավայրերում, գյուղերում ապրող մարդկանց վիճակը, այլ ֆեյսբուքի էջերն ու լայքերը և վիրտուալ կոմֆորտ իրականությունը: Որպեսզի երկրի գործադիր իշխանության ղեկավարի աշխատակազմում հանգիստ լինեն՝ տեղեկացնում եմ, որ հենց փետրվարի 24-ին են փոխանցվել Թվիթերի պաշտոնական էջը, ֆեյսբուքյան խմբերը, կփոխանցվի նաև Ֆեյսբուքի գլխավոր պաշտոնական էջը: Ամենակարևորը. հեռու տարեք ձեր ձեռքերը Մարդու իրավունքների պաշտպանի հաստատությունից: Սա պայքարով կայացած կառույց է, չփորձեք այն ծառայեցնել ձեր քաղաքական նպատակներին:

Դոնեցկի Ժողովրդական Հանրապետության տարածքում 11 օրվա ընթացքում գրանցվել է գրեթե 650 հարձակում, զոհվել է 15 խաղաղ բնակիչ, ևս 34-ը՝ վիրավորվել, հայտնում է հրադադարի վերահսկման և համակարգման համատեղ կենտրոնում (JCCC) ԿԺԴՀ ներկայացուցչությունը։

Կարևոր հանդիպում է տեղի ունեցել «Մեծ Յոթնյակի», ԵՄ և Ուկրաինայի ԱԳ նախարարների հետ։ Մենք համաձայնության ենք եկել․ - Ուկրաինային պաշտպանական զենք և տեխնիկա մատակարարել, - պատժամիջոցներ կիրառել ռուսական տնտեսությունը թուլացնելու համար։ [Մեծ Բրիտանիայի ԱԳ նախարար Լիզ Թրուս]

Ուկրաինայի նախագահ Վլադիմիր Զելենսկին իր անվտանգության ապահովման համար դիմել է ԱՄՆ նախագահ Ջո Բայդենին: ՏԱՍՍ-ի փոխանցմամբ՝ Զելենսկին ԱՄՆ նախագահին խնդրել է լրացուցիչ օգնություն տրամադրել, որպեսզի հնարավոր լինի ապահովել իր անվտագությունը: Վաշինգտոնի վարչակազմի ղեկավարն այն տրամադրել է: ABC լրագրող Ջեն Փսակին հայտնել է, որ Ուկրաինայի նախագահն այդ խնդրանքով դիմել է ԱՄՆ նախագահին վերջին հեռախոսազրույցի ժամանակ:

Կիևի քաղաքապետ Վիտալի Կլիչոն Associated Press-ին տված հարցազրույցում հայտնել է, որ Ուկրաինայի մայրաքաղաքը շրջափակման մեջ է, բնակիչների տարհանումը անհնար է: Լրագրողի հարցին ի պատասխան՝ պատրաստվո՞ւմ են էվակուացնել Կիևի բնակիչներին, Կլիչկոն նախ լռել է, ապա ասել. «Մենք չենք կարող, որովհետև բոլոր ճանապարհները արգելափակված են: Մենք շրջափակման մեջ ենք»:

Ռուսաստանի պաշտպանության նախարարությունն Ուկրաինայում հատուկ գործողություն սկսելուց հետո առաջին անգամ հայտնել է, որ զոհեր ու վիրավորներ ունի, սակայն չի հստակեցրել թիվը: Քիչ առաջ Ռուսաստանի պաշտպանության նախարարությունը հայտարարել է, որ պատերազմի 4 օրերի ընթացքում ոչնչացվել է Ուկրաինայի 1067 ռազմական օբյեկտ: Զելենսկին այսօր հայտարարել է, թե Գոստոմելի օդակայանի մոտ ուկրաինական ուժերը ոչնչացրել են աշխարհի ամենամեծ բեռնատար ինքնաթիռը:

«Ղարաբաղից կլուբնիկի թփեր էի բերել, մնաց էս զզվելիներին»: Շուռնուխցի 72-ամյա Անահիտը քար է վերցրել, որ շպրտի իր տուն մտած ադրբեջանցու վրա, բայց լացելով ու «ուշունց տալով» չի արել: 33 տարի Շուռնուխում ապրող կինը չի հասկանում՝ «ազգի՞ց ինչ են ուզում», բայց գիտի, որ պատերազմում «զինվորը չի պարտվել, Փաշինյանն է պարտվել»: Սյունեցի կինը վստահեցնում է՝ նորից կռիվ է լինելու, որ մենք հաղթենք: Տունն ադրբեջանցուն թողած կնոջ մենախոսությունը՝ Շուռնուխից:

Երեք զինծառայողների մահվան հանգամանքները չեն պարզվում հանցագործությունից 6 ամիս անց: Փաստաբանը պնդում է՝ դատաբժշկական փորձաքննությունից հետո սպանության պաշտոնական վարկածը փշուր-փշուր է եղել: Իսկ պաշտոնական վարկածով՝ բանակային հանցագործության հիմքում սեռական սկանդալն է: Դատաբժշկությունը չի հերքում պաշտոնական վարկածը: Կոռնիձորի արյունոտ գիշերվա առեղծվածը:

Գյումրիում երեկ գիշեր տեղի ունեցած դաժան սպանությունից նոր մանրամասներ են հայտնի դարձել։ Ժամը 01:05-ի սահմաններում Գյումրի քաղաքի շտապօգնության կայանից ոստիկանության Գյումրու Կումայրիի բաժին ահազանգ է ստացվել, որ բժիշկների հերթապահ խումբը Աթարբեկյան փողոցի «Անդրանիկի» արձանի դիմացից Գյումրու բժշկական կենտրոն է տեղափոխվել դանակահարված մի քաղաքացու: Սպանվածը Գյումրի քաղաքի բնակիչ, 1987 թվականին ծնված Վահագն Հարությունյանն է եղել։ «Ձայներ լսեցինք դուրս եկանք փողոց, տեսանք գետնին ընկած էր, սաղ արյուն էր»,- Irakanum.am-ին պատմեց սպանված երիտասարդի հարևաններից մեկը։ 35 –ամյա տղամարդը մարմնի տարբեր հատվածներում ստացել է դանակի բազմաթիվ հարվածներ։

Եվրամիությունը հանդես է եկել Ռուսաստանի դեմ նոր սահմանափակումների առաջարկով։ Այս անգամ առաջարկվել է արգելել Եվրամիության տարածքում ռուսական Russia Today լրատվական ալիքի ու Sputnik լրատվական գործակալության կայքերի ու ռադիոկայանների, ինչպես նաև դրանց դուստր ձեռնարկությունների աշխատանքը։ Sputnik գործակալությունը պատասխանել է Եվրահանձնաժողովի ղեկավարին` առաջարկելով պատժամիջոցները տարածել ողջ համացանցի վրա։ «Մենք առաջարկում ենք Եվրամիությանը կանգ չառնել կիսատ-պռատ սահմանափակումների վրա, այլ անհապաղ արգելել ինտերնետը»,-ասել է Sputnik-ի մամուլի ծառայությունը։ Միացյալ Նահանգները և Եվրամիությունը ավելի վաղ պատժամիջոցներ էին սահմանել Ռուսաստանի ղեկավարության և Ռուսաստանի տնտեսության տարբեր ոլորտների դեմ։ Արևմուտքն այսպես արձագանքել է ՌԴ նախագահ Վլադիմիր Պուտինի՝ Ուկրաինայի տարածքում հատուկ ռազմական գործողություն սկսելու որոշմանը։ Ռուսաստանի ղեկավարը պատժամիջոցներն անվանել է ոչ լեգիտիմ։

«Օրը 4 անգամ ինձ ծեծում էին». Խրամորթի հանդերից Բաքվի բանտ հասած Աբելը հիշում է, որ թշնամին միայն դեմքին չէր հարվածում, որ հեռուստատեսային հարցազրույցներ տար: Եվ այն, որ կողքի խցերից լսում էր ընկերների տառապանքի ձայնը: Նախկին գերին հիմա հայրենի Խրամորթում գնալու տեղ չունի. «աջ գնաս՝ թիրախ ես, ձախ գնաս՝ թիրախ ես»: «Մեռնել է՝ մեռնել, գնանք տղամարդավարի մեռնենք», - ասում է Աբելն ու վստահեցնում՝ ինքը գյուղից գնալու ոչ տեղ ունի, ոչ էլ ցանկություն:

Երևան եկած ադրբեջանցիներին ասֆալտին չեն փռում, բայց նրանց գալու դեմ բողոքող հայերին բռնի բերման են ենթարկում: Հայաստանի իշխանությունը չի ուզում բարկացնել թուրքերին, որքան էլ պահանջի ընդդիմությունը: Ալիևն էլ պարծենում է՝ ինքը հա՛մ Թուրքիայի եղբայրն է, հա՛մ էլ Ռուսաստանի: Սովորական հայկական սկանդալներ:

Կիևի մերձակայքում Ռուսաստանի զինված ուժերի և ուկրաինական բանակի միջև բախումների հետևանքով այրվել է Գոստոմելի օդանավակայանում կանգնած An-225 Mriya ինքնաթիռը։ Տեղեկությունը հաստատել է Ուկրաինայի ռազմարդյունաբերական կոնցեռնը։ Ընկերությունը նշում է, որ ինքնաթիռի վերականգնումը կարժենա մոտ 3 մլրդ դոլար։ An-225 -ն աշխարհի ամենամեծ ինքնաթիռն էր: Այն նախագծվել և արտադրվել է ԽՍՀՄ-ում, Կիևի մեխանիկական գործարանում 1984-1988 թվականներին, միայն մեկ` եզակի օրինակով։ Առաջին թռիչքն իրականացվել է 1988 թվականի դեկտեմբերի 21-ին։ Ինքնաթիռը սկսել է գործել 1989 թվականին և կարող էր տեղափոխել 150-200 տոննա բեռ։ Ուկրաինայի անկախության տարիներին An-225–ը շահագործվում էր «Անտոնով» ավիաընկերության կողմից։ Վերջին անգամ Mriya-ն օդ է բարձրացվել 2020 թվականի մարտին։

Պայթյուններ՝ անկախության հրավառությունից հետո: Դոնբասի ու Լուգանսկի Հանրապետությունները ճանաչելուց հետո Պուտինը «հատուկ ռազմական օպերացիա» սկսեց՝ «ապառազմականացնելու Ուկրաինան»: Ռուսաստանի ՊՆ-ն հայտնում է ուկրաինական ռազմական օբյեկտները շարքից դուրս բերելու մասին, Զելենսկին ֆեյսբուքում «լայվ է մտնում»՝ ասելու, որ իրենք անպայման հաղթելու են: Կիևում բաժանված զենքը կրակում է կիևցիների վրա: Ռուս-ուկրաինական պատերազմի քրոնիկան:

Ուկրաինայում ռազմական հատուկ գործողության հետևանքով ռուսական կողմն ունի կորուստներ և վիրավորներ։ Այս մասին հայտնել է ՌԴ ՊՆ պաշտոնական ներկայացուցիչ Իգոր Կոնաշենկովը։ «Ռուսաստանի զինծառայողները քաջություն ու հերոսություն են դրսևորում հատուկ գործողության շրջանակներում մարտական առաջադրանքներ կատարելիս։ Ցավոք, կան նաև զոհեր և վիրավորներ։ Մեր կորուստները մի քանի անգամ քիչ են ոչնչացված ազգայնականներից, ինչպես նաև Ուկրաինայի ԶՈւ-ի կորուստներից»,- նշել է նա։ Կոնաշենկովի խոսքով՝ ռուսական կողմը արժանապատիվ վերաբերմունք է ցուցաբերում այն ուկրաինացի զինծառայողներին, որոնք զենքը վայր են դրել։

«Խեղճ Պուտին, ի՞նչ խոսի սրանց հետ», Լուկաշենկոն ցավում է Պուտինի համար ու խոսելու հարթակ է տրամադրում Մոսկվային ու Կիևին: Զելենսկին առավոտյան համաձայն չէր գնալ Բելառուս, բայց երեկոյան պատվիրակություն է ուղարկել այնտեղ: Հրթիռներ՝ Կիևում, պատժամիջոցներ՝ Կրեմլում, բանակցություններ՝ բելառուսական «գաղտնի վայրում»: Լուկաշենկոն ահազանգում է՝ «Եվրոպան մսաղացի միջով է անցնելու»: Ռուսները վստահեցնում են, որ առաջ են գնում՝ հաճախ առանց դիմադրության, Զելենսկին պնդում է՝ Ուկրաինան զենքը վայր չի դնելու:

ԱԺ «Պատիվ ունեմ» խմբակցության պատգամավոր Տիգրան Աբրահամյանը գրում է. «Մենակ ՀՀ այս իշխանությունները կարող էին ուկրաինական ճգնաժամի պիկին Զինված ուժերի գլխավոր շտաբի պետին փոխել, իսկ շտաբում արմատական փոփոխությունների գնալ։ Ընդ որում՝ մեր տարածաշրջանին փոխանցվող նոր սպառնալիքների ֆոնին, ԳՇ պետի պաշտոնը շարունակում է թափուր մնալ։ Ցանկացած իրավիճակում ԳՇ պետն իր պաշտոնին և, առհասարակ, բանակի զարկերակին տիրապետելու համար ամիսներ, իսկ որոշ հարցերում՝ տարիներ են անհրաժեշտ։ Բայց դե սրանց՝ իշխանության ղեկին կանգնածներին, ի՞նչ ասես, իրենց թվում է, թե իրենց «եղբայրության ծրագիրը» թուրքերի և ադրբեջանցիների հետ «կաշիները» փրկելու է։ Կրակի մեջ ենք»։

Սորոսը ուկրաինացի զինվորականներին համեմատել է Վերմախտի զինվորների հետ, ովքեր պաշտպանել են Բուդապեշտը 1944 թվականին։

Ալեքսանդր Լուկաշենկոն ինձ խնդրեց, որ Ուկրաինայի և Ռուսաստանի պատվիրակությունները հանդիպեն Պրիպյատ գետի մոտ։ Շեշտում եմ՝ առանց նախապայմանների։ Անկեղծ կասեմ․ ես այնքան էլ չեմ հավատում այդ հանդիպման արդյունքներին, բայց թող կայանա։ Որ հետո Ուկրաինայի ոչ մի քաղաքացի կասկած չունենա, որ ես՝ որպես նախագահ, պատերազմը կանգնեցնելու փորձ չեմ արել, երբ անգամ փոքր հնարավորություն է եղել։ [Վլադիմիր Զելենսկի]