Լրահոս

Ժամեր շարունակ լարված իրավիճակ էր Աղբյուր Սերոբ փողոցում: Դեպքի վայրից ֆեյսբուքյան լայվով Երևանի ավագանու  ՙԼույս՚ խմբակցության անդամ Թեհմինա Վարդանյանը հայտնեց, որ ոստիկանները անօրինական գործողություններ են անում, փորձում բացել իր քրոջ բնակարանի դուռը: Ներսից դուռը չբացվելուց հետո՝ ոստիկանները գործի են դրել Էլեկտրական սղոցը: Սակայն դադարեցրել են, երբ ներսում գտնվողները սպառնացել են ինքնահրկիզվել:

Ֆրանսիայում մոտ 700 միգրանտ՝ իրենց աջակիցների հետ արգելափակել էին Փարիզի Պանթեոնը: Այս անգամ բողոքի գույնը՝ դեղինի փոխարեն՝ սևն է: Առանց փաստաթղթերի Փարիզում ապրողները պահանջում են փոխել իրենց կարգավիճակը: Ոստիկանների հետ բախումներից հետո բերման ենթարկվածներ կան:

Գունավոր ցույցերից չհանգստացող ֆրանսիան վաղը նշելու է ազգային տոնը Բաստիլի գրավումը: Այն նշում են նաև մեր երկրում Ֆրանսիայի դեսպանատանը: Երկու երկրների օրհներգերն է կատարել Ֆրանսիական բանակի երգչախմբի մենակատար Ժերեմի Դելվերը որին Հայաստանում շատեր են հասցրել սիրել:

Բազմաթիվ հեռուստադիտողներ դիմում են մեր խմբագրություն՝10-յակ տարիներով իրենց չլուծված խնդիրները բարձրաձայնելու համար: Մեզ դիմած քաղաքացին 23 տարի առաջ կորցրել է բնակարանը, իր խոսքով՝ ապօրինաբար: Հին ու նոր իշխանության բոլոր ներկայացուցիչներին ու իրավապահներին դիմել է: 20 տարվա վաղեմությամբ պատմությունը ՝ իրականության բացահայտման հույսով՝ բարձրաձայնում ենք նաև մենք:

16 տարվա վաղեմությամբ Մատաղիսի աղմկոտ գործը վերսկսվել է: Գործը քննելու է ԱԱԾ-ն: Այն ժամանակ 2 զինծառայողի սպանության համար մեղադրվեց երեք զինծառայող: Այնուհետև վճռաբեկ դատարանը որոշեց, որ նրանք անմեղ են: Դիմեցին ՄԻԵԴ ու շահեցին դատը: Սակայն ըստ իրավապաշտպանների՝ իրական մարդասպանները մինչև օրս բացահայտված չեն: Կան պնդումներ, որ հանցանքը կոծկում է այն ժամանակվա զինվորական դատախազ՝ Գագիկ Ջհանգիրյանը:

Ազգային ժողովի առաջին ընթերցամբ ընդունած կոռուպցիայի կանխարգելման մասին օրենքի նախագծում  մի շարք իրավաբաններ լուրջ բացթողումներ են նկատել: Պնդում են, որ բացի այն որ նախագիծը հանրային քննարկման չի դրվել, նաև դեմ է կոռուպցիայի դեմ պայքարի՝ աշխարհում ընդունված սկզբունքներին:

Հուլիսի 7-ից 13-ն ընկած ժամանակահատվածում արցախա-ադրբեջանական հակամարտ զորքերի շփման գոտում հակառակորդը հրադադարի պահպանման ռեժիմը խախտել է ավելի քան 90 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակել է շուրջ 800 կրակոց:

ՀՀ Քննչական կոմիտեն ծանուցել էր «Լիդիան Արմենիա» ընկերությանը, որ հարուցված քրեական գործի շրջանակներում այսօր Քննչական կոմիտեի քննիչները՝ փորձագետների մասնակցությամբ  պետք է իրականացնեն միջոցառումներ Ամուլսարի տարածքում։

ԱՄՆ Դաշնային առեւտրային հանձնաժողովը տուգանել է Facebook-ին ռեկորդային՝ 5 միլիարդ ԱՄՆ դոլլարով՝ օգտատերերի անձնական տվյալները հրապարակելու համար: Cambridge Analytica-ի տվյալներով՝ 87 միլիոն օգտատիրոջ անձնական տվյալներ հայտնվել են հասարակության համար մատճելի հարթակում, տեղեկացնում է BBC-ն:

Հուլիսի 12-ին, ժամը 20:14-ին «911» ծառայությանն ահազանգ է ստացվել, որ Երևան քաղաքի Գրիգոր Զոհրապի փողոցի տներից մեկի տանիքում հրդեհ է բռնկվել:

Մի լուսավոր պատմություն՝ Տեր-Սահակյանների ընտանիքից: Նրանց 10 տարվա կիսակառույցը վերջապես նորոգվում է:

Բարձրագույն դատական խորհրդի սկանդալներից մեկը կարծես հանգուցալուծվեց: 9 ամիս առաջ ԲԴԽ անդամի տեղից հրաժարված Նախշուն Տավարացյանը երդվեց խորհդրի անդամի պաշտոնում: Հետաքրքրական է, որ նա վերադարձել է խորհուրդ նույն հիմնավորմամբ, որով հեռացել էր ցանկանում է ապահովել դատական համերաշխությունը:

Ոոռոգման ու հանգստի ամենաթեժ շրջանում Սևանա ջրերը չեն հանդարտվում: Չնայած արդեն կա պաշտոնական հաղորդագրություն, թե մոտակա գյուղերում կովերի մասսայական անկման պատճառը կապուտակ Սևանի կանաչած ջուրը չէ՝ անհանգստանալու առիթ էլ կա: Երկրի առողջապահներն են հորդորում զգուշանալ կապտականաչ ջրիմուռներով ջրերում լողալուց: 

Ստամբուլյան կոնվենցիայի ընդունման շուրջ աղմուկ կա, ու իշխանության հանգստությունը անհանգստացնում է արտախորհրդարանական ընդդիմությանը: Մեր երկրի համար երկակի դրութներով այդ կոնվենցիայի մութ կողմերը քննարկելու համար նրանք այսօր կլոր սեղան քննարկման էին հրավիրել նաև իշխանական թևի ներկայացուցիչներին, բայց նրանցից որևէ մեկը չէր եկել:

Որ հանրապետությունում էներգետիկ կոլապսը չկրկնվի, հավելյալ երաշխիք է ստեղծվում: 250 մեգավատ հզորությամբ նոր էլեկտրակայանը, ըստ Հանրային ծառայությունները կարգավորող հանձնաժողովի նախագահի, կարող է փոխարինել Հրազդանի ջերմաէլեկտրակայանին: Հենց դրա 5-րդ բլոկը անջատվեց չորեքշաբթի: Ծրագրի իրականացման շրջանակային համաձայնագիրը կնքել էր դեռ նախորդ կառավարությունը, իսկ այսօր վարչապետ Փաշինյանն է հիմնարկեքին մասնակցել: