Լրահոս

Այսօր Բաքվի ջարդերի տարելիցն է: 30 տարի անց էլ Հայաստանի կառավարությունը հապաղում է պատահածը որակել Ցեղասպանություն: Ականատեսները պահանջում են, որ Բաքվում բնակվող հայերի կոտորածին քաղաքական գնահատական տրվի: Օրվա ուղերձում վարչապետ Փաշինյանը գրել է, թե հայտարարում է ամենայն պատասխանատվությամբ հայերի բնաջնջման կամ բռնագաղթեցման նոր փորձերի հնարավորություն չենք տալու:

30 տարում բնակչության թիվը 5 միլիոնի հասցնել պատրաստվող կառավարությունը նախատեսում է 7 ծննդատուն փակել: Մարալիկի ծննդատունը փակելու աղմուկը չմարած, նույն սկանդալը հասունացավ Եղվարդում, Աչաջուրում, Արտենիում,Ծաղկահովիտում, Արծվաբերդում, Քաջարանում: Իմ գործընկեր Գայանե Բալայանին Եղվարդի ծննդատան մոտ հավաքված տղամարդիկ են գանգատվել ու բուժաշխատողները: Դժգոհ են առողջապահության նախարարի՝ տարեկան 150-ից պակաս ծնունդ ընդունող ծննդատները փակելու որոշումից

Արդեն մոտ երկու ամիս առաջ մի կայծակի կայծից բռնկված հրդեհը շարունակում է այրել Ավստրալիան: Կամավորները, իշխանությունը, վայրի բնության պահապաններն ու սիրահարները ինչ ասես չեն անում՝ փրկելու էնդեմիկ կենդանիներին ուղղաթիռով գազար են հասցնում, վիրակապում են, 5 հրշեջ էլ կյանքը չի խնայել կրակի դեմն առնելու համար: Ամենաթարմ մանրամասները այրվող մայրցամաքից ռեպորտաժում:

Factor.am-ի տեղեկություններով Սահմանադրական դատարանի նախագահ Հրայր Թովմասյանն այսօր հրավիրվել է Հատուկ քննչական ծառայություն: Խոսնակ Մարինա Օհանջանյանը հրաժարվում է մեկնաբանել լուրը: 168.am_ն ավելի սկանդալային նորություններ ունի: Խմբագիր Սաթիկ Սեյրանյանը պնդում է, որ Սահմանադրական դատարանի անցանկալի դատավորներին օրենքով տուն ուղարկելու փորձերը ձախողած իշխանությունը իրավապահներին նոր հանձնարարական է իջեցրել գտնել բարձր դատական ատյանի դատավորների արտա-ամուսնական կապերը կամ այլ կոմպրոմատներ: Իշխանական էլիտան հերքում է:

Նոր Հայաստանում ֆեմիդայի զորությանը ընդդիմադիրները էլ չեն հավատում: Դե Ֆակտո ամսագրի խմբագիրը չի կարողացել քաղաքում գովազդել իր ամսագրի շապիկը միայն որովհետև դրա վրա Ռոբերտ Քոչարյանի լուսանկարն է: Ապրիլին էլ, ինչպես հիշում եք, քաղաքապետարանը չէր թույլատրել Քոչարյանի ինքնակենսագրական գրքի գովազդը: Այդ գործով դատավարությունը փետրվարին կսկսվի:

Փորձագետներ կան, որ կարծում են՝ եթե նույն ակտիվությամբ իշխանությունը շարունակի բարձր դատարանի անցանկալի անդամներից ազատվելու գործողությունը, Երևանի փողոցներում էլ հնարավոր է՝ հայտնվեն բողոքող դատավորներ Դանիայից, Ավստրիայից, Հունաստանից, ինչպես եղել է Լեհաստանում: Վարշավայում տեղի է ունեցել հազարավոր պատմուճանների երթը: Դատավորները իրենց երկար սև շորերով փողոց են դուրս եկել պայքարելու այն օրենքի դեմ, որ խորհրդարանն ընդունել է իշխանությանն անցանկալի դատավորներից ազատվելու համար:

Պայմանական անունով քաղաքագետ օրգ կայքը, որ, ըստ վարչապետի ընտանիքին պատկանող լրատվամիջոցի՝ սուտ տեղեկություններ է հրապարակում Փաշինյանների մասին, պարզվեց Politik.am-ն է, որի խմբագրի ֆեյսբուքյան էջը անհայտ մարդիկ կոտրել են Հայկական ժամանակի սկանդալային հոդվածի հրապարակման նախօրեին: Պատահականությու՞ն է՝ խմբագիր Բորիս Մուրազին այդպես չի կարծում: Իրենց աղբյուրների համար թիրախավորված լրատվամիջոցների ցանկն ընդլայնվում է Yerevan Today-ին, ժողովուրդ օրաթերթին են միանում նաև պոլիտիկն ու Antifake-ը:

Վարչապետի ընտանիքին պատկանող Հայկական ժամանակում տեղադրել են մի հոդված, որ ըստ էության նպատակ ունի մեղադրել ԱԱԾ նախկին տնօրեն Արթուր Վանեցյանին, թե նա ֆինանսավորում է վարչապետի ընտանիքի դեմ տարվող հակաքարոզչությունը: Եվ մինչ Վանեցյանը հերքել է հոդվածի բոլոր տեղեկությունները Փաշինյանի դուստրը՝ 20-ամյա Մարիամն է ներքաշվել ԱԱԾ նախկին տնօրենի հետ հեռակա բանավեճի մեջ:

Եթե արդեն ճամպրուկներ եք կապում, որ Հայաստանի երկնքում թևերը բացած Ռայան էյըրի ինքնաթիռներով Եվրոպա մեկնեք, մեր հաջորդ պատմությունը Ձեզ համար է: Ձրի պանիրը միայն թակարդում է լինում, այդպիսի մի փոքրիկ ծուղակ է 30 եվրոյով Եվրոպա թռչելու հնարավարությունը: 30 եվրո դուք վճարել եք միայն տոմսի համար, իսկ Ձեր ծանր ուղեբեռը այդ ավիաընկերությունում թանկ արժի: Ռայան էյրի նախկին աշխատակից Սարգիս Սիմոնյանը նախորոք զգուշացնում է բոլոր հնարավոր հիասթափությունների մասին:

Այսօր շնորհակալության միջազգային օրն է: Հայլուրի տեսախցիկը շրջել է Երևանի փողոցներով պարզելու թե ում և ինչի համար են շնորհակալ մեր քաղաքացիները:

Հայաստանում H1N1 գրիպից մարդ է մահացել: Առողջապահության նախարարությունն այլ մանրամասներ չի հայտնում, նշում է միայն, որ դեպքը երեկ է տեղի ունեցել: Սուր շնչառական վարակներով՝ հոսպիտալացվածների 98%-ը մինչև 18 տարեկան է: Ըստ նախարարության, սուր շնչառական վարանկերով հիվանդությունները աճել են ամբողջ եվրոպական տարածաշրջանում, նաեւ մեր երկրում: Միևնույն ժամանակ, հայտնում են, թե նախորդ տարվա նույն ժամանակաշրջանի համեմատ նվազել են պոլիկլինիկաներ դիմելությունը եւ թոքաբորբով հոսպիտալացումները:

Կրթության, գիտության, սպորտի ու նաև մշակույթի նախարար Արայիկ Հարությունյանը առավոտից թակել է մշակույթային արժեք ունեցող տներում ապրող կամ աշխատող քաղաքացիների դռները՝ նրանց թռուցիկ-նամակներ փոխանցելու: Նախարարը այսպիսով կոչ է արել պահպանել տուն-հուշարձաները և անհարկի ձևափոխություններ չանել շենքերում: Զգուշացնող առաջին նամակը Հարությունյանը փոխանցել է օպերային երգչուհի Հայկանուշ Դանիլյանի թոռնուհիներին:

Առավոտից աշխարհը ցնցված է Իրանի իշխանությունների խոստովանությունից, որ իրենք են սխալմամբ խոցել ուկրաինական օդանավը, որի կործանումը 176 մարդու կյանք է խլել: Իրանի և Ուկրաինայի նախագահները հեռախոսով քննարկել են ավիաաղետից հետո ստեղծված վիճակը: Սև արկղերը ուղարկվելու են Ֆրանսիա՝ վերծանման: Իրանի իսլամական հեղափոխության պահապանների կորպուսի հրամանատարներից մեկն էլ՝ հայտարարել է, որ կատարվածի ամբողջ պատասխանատվությունն իր վրա է վերցնում եւ պատրաստ է ենթարկվել իշխանության ցանկացած որոշման:

Երևանում 7-րդ հարկից ընկած 20-ամյա աղջկա վիճակը բավարար է: Նա հրաշքով է փրկվել՝ ընկնելով 6-րդ հարկի հարևանի լվացքի պարանների վրա:

Խորհրդարանի էթիկայի հանձնաժողովը հնարավոր է քննարկի «Իմ քայլական» պատգամավոր Կարեն Սարուխանյանի հարցը, որը վիրավորական արտահայտություն է արել գործընկերուհու՝ Սոֆյա Հովսեփյանի հասցեին: Սարուխանյանը Հովսեփյանին կոչ էր արել «բամբասանքի լեզվով չխոսել» եւ հեգնել «Ամուսնացիր, կանցնի»: Այս արտահայտությունը շատերի գնահատմամբ, սեռական խտրականության դրսեւորում է, եւ պետք է խստորեն դատապարտվի: