Հրաձգություն՝ ամերիկյան քրիստոնեական դպրոցում. կան զոհեր

ԱՄՆ-ի Թենեսի նահանգի մայրաքաղաքում քրիստոնեական դպրոցում հրաձգության հետևանքով առնվազն երեք երեխա և երեք մեծահասակ է զոհվել, հայտնել են իշխանությունները: BBC-ի փոխանցմամբ՝ հարձակվողը սպանվել է ոստիկանության կողմից:

Ոստիկանության տվյալներով՝ միջադեպը տեղի է ունեցել Նեշվիլի Բարթոն Հիլզ բուլվարում գտնվող դպրոցում։ Կանչով ժամանած ոստիկանները փոխհրաձգության մեջ են մտել, ինչի հետևանքով հրաձիգը սպանվել է։

Մամուլի ասուլիսի ժամանակ ոստիկանության ներկայացուցիչ Դոն Ահարոնը հայտնել է, որ զոհվածների թվում երեք երեխա կա, դպրոցի երեք աշխատակից և ինքը՝ հրաձիգը: Shantnews.am-ի փոխանցմամբ՝ մեկ ոստիկան վիրավորվել է։

Հարձակվողը զինված է եղել երկու հրացանով, հանցագործության վայրում հայտնաբերվել է նաև ատրճանակ։

Ավելի վաղ NBC հեռուստաալիքը հայտնել էր, որ երեք երեխաներ հրազենային վնասվածքներով տեղափոխվել են հիվանդանոց, սակայն հոսպիտալ ժամանելու պահին երեքն էլ մահացած են եղել:

Հարձակվողի ինքնությունն ու դրդապատճառները հայտնի չեն, զոհերի անուններն ու տարիքը նույնպես չեն հրապարակվում:

Նեշվիլի դպրոցը, որտեղ տեղի է ունեցել դեպքը, մասնավոր քրիստոնեական դպրոց է մինչև վեցերորդ դասարանի աշակերտների համար, և երեխաները սովորում են այնտեղ մինչև մոտ 11-12 տարեկան։ Ըստ դպրոցի կայքի՝ այն ունի մոտ 200 աշակերտ։