Նաև Շուշիի կողմից են կրակում, բոլոր կողմերից Ստեփանակերտը ռմբակոծում են․ Մետաքսե Հակոբյան

Մի ժամից ավելի է` ռմբակոծում են Ստեփանակերտը, «Սպուտնիկ Արմենիա»-ի հետ զրույցում ասաց Արցախի ԱԺ պատգամավոր Մետաքսե Հակոբյանը։

«Կարծում էինք՝ միայն Ասկերանի ուղղությունից են կրակոցները, սակայն ձայնով հասկանում եմ, որ նաև Շուշիի կողմից են կրակում։ Բոլոր կողմերից Ստեփանակերտը ռմբակոծում են…Ռմբակոծում են այնպես, ինչպես չեն ռմբակոծել 44–օրյա պատերազմի ընթացքում»,– նշեց պատգամավորը։

Նա նաև ասաց, որ մարդիկ իրենց երեխաներին կորցրել են` մի մասը դպրոցներում է, մեկը փողոցում է, կապն ընդհատված է ու չեն կարողանում գտնել միմյանց։

Մետաքսե Հակոբյանը նաև տեղեկացրեց, որ Ստեփանակերտում մարդկանց մի մասն այս պահին ապաստարաններում են, քաղաքում տագնապ է միացված ու երկնքում անօդաչուներ են պտտվում։