Լրահոս

«Sputnik Ղազախստան»-ը հայտնում է, որ Ղազախստանի արտաքին գործերի նախարարությունը հերքել է օտարերկրյա քաղաքացիների մուտքը երկիր կասեցնելու մասին տեղեկությունը։ «Տեղեկությունը չի համապատասխանում իրականությանը»,- հայտարարել է ԱԳՆ պաշտոնական ներկայացուցիչ Այբեկ Սմադյարովը։ Ավելի վաղ հաղորդվել էր, որ Ղազախստանը կասեցրել է օտարերկրյա քաղաքացիների մուտքը երկիր՝ սահմանված արտակարգ դրության հետ կապված:

Մեքսիկացիները նորից ցնցել են Լոս Անջելեսում հիմնադրված հին պարասրահի հատակը: Նրանք հին ավանդական պարեր են պարել, ժպտացել, հիշել նախնիներին:

Ղազախստանում Հայաստանի դեսպանությունը ՀՀ քաղաքացիներին հորդորում է չգնալ մարդաշատ վայրեր։ Դեսպանությունից հիշեցնում են, որ Ղազախստանում ստեղծված իրավիճակով պայմանավորված սահմանվել է արտակարգ դրություն և պարետային ժամ (23:00-ից մինչև 07:00): «Խորհուրդ ենք տալիս Հայաստանի Հանրապետության բոլոր քաղաքացիներին պահպանել անվտանգության կանոնները, զերծ մնալ մարդաշատ վայրեր այցելելուց, մնալ հյուրանոցներում (կացության վայրերում)»,- նշվում է հաղորդագրության մեջ:

Ղրղզստանի ԱԳՆ հայտարարել է, որ սկսել է տարհանել Ղազախստանի տարածքում գտնվող իր քաղաքացիներին։ «Հաշվի առնելով Ղազախստանում վերջին իրադարձությունները՝ Ղրղզստանի արտաքին գործերի նախարարությունը հյուպատոսական-իրավական օգնության շրջանակներում աշխատանք է կատարում պետական սահմանի անցակետերով Ղրղզստանի քաղաքացիներին տարհանելու ուղղությամբ»,- ասվում է հաղորդագրության մեջ։ Տարհանելու նպատակով տրամադրվել են տրանսպորտի միջոցներ, որոնց շահագործման ծախսը պետությունն է հոգում: Ղրղզստանի ԱԳՆ–ն Ղազախստանի տարածքում գտնվող իր քաղաքացիներին կոչ է անում չենթարկվել սադրանքների, խուսափել կոնֆլիկտային իրավիճակներից և մարդաշատ վայրերից և մնալ բնակության վայրում:

Ղազախստանի Ալմաթի քաղաքում, որտեղ արդեն մի քանի օր է՝ բողոքի ակցիաներ են իրականացվում, հունվարի 6-ին կրակոցներ են հնչել։ «ՏԱՍՍ» գործակալությունը տեղեկացնում է, որ ականատեսները պատմում են՝ Ալմաթիի հրապարակի կողմից ուժեղ պայթյուններ են լսվում։

«Արմենիա» ավիաընկերության ինքնաթիռն այսօր չի կարողացել Զվարթնոցից ժամանակին Շարմ Էլ Շեյխ տեղափոխել ուղևորների, ըստ պաշտոնական վարկածի՝ Իրանի օդային տարածքի փակ լինելու պատճառով: Թռիչքը հետաձգվել է:

«ՌԻԱ Նովոստի»-ն փոխանցում է, որ ԵՄ-ն ի գիտություն է ընդունել Ղազախստանի իշխանությունների որոշումը՝ օգնության խնդրանքով դիմել ՀԱՊԿ-ին։ Այս մասին Բրյուսելում կայացած ճեպազրույցի ժամանակ ասել է ԵՄ արտաքին քաղաքականության ծառայության պաշտոնական ներկայացուցիչ Նաբիլա Մասրալին։ «Այս փուլում կարող եմ ասել, որ մենք ի գիտություն ենք ընդունել նախագահ Տոկաևի որոշումը՝ աջակցություն խնդրել ՀԱՊԿ-ից՝ սահմանափակ ժամկետով Ղազախստան խաղաղապահ ուժեր ուղարկել` իրավիճակի կայունացմանն օգնելու համար»,- ​​ասել է նա։

Այսօր՝ հունվարի 6-ին, Սուրբ Ծննդի օրը, լույս աշխարհ է եկել արցախյան պատերազմում զոհված Մանվել Մանուչարյանի եղբայրը։ Փոքրիկին անվանակոչել են ԷՄԱՆՈՒԵԼ, որը, ըստ աստվածաշնչի, թարգմանաբար նշանակում է «Աստված ձեզ հետ»։

ՀՀԿ խոսնակ Էդուարդ Շարմազանովը գրել է, որ 2018-ին փողոցի միջոցով Հայաստանում իշխանություն զավթածը հանդես է գալիս իր ղազախ «հեղափոխական եղբայրների» դեմ․ «Զավեշտ. 2018-ին փողոցի միջոցով Հայաստանում իշխանություն զավթածը հանդես է գալիս իր ղազախ «հեղափոխական եղբայրների» դեմ։ ՀԱՊԿ-ն ամենաշատ վարկաբեկած «վարչապետը» դարձել է ՀԱՊԿ կանոնադրության պաշտպան։ Բա ո՞ր ՀԱՊԿ «նամակ» գրելը գիտես,ինչու՞ 2020-ի նոյեմբերի 16-ին չգրեցիր,երբ թշնամին ակնհայտ հարձակում էր գործել։ Զորք ուղարկելով Ղազախստան՝ Փաշինյանն ընդունում է,որ 2008-ի մարտի 1-ին իշխանությունները ճիշտ էին,իսկ ինքը՝ հանցագործ։ Հ.Գ. «Ինքնիշխան» վարչապետ…վայելեք «հպարտ հեղափոխականներ»»,- գրել է նա։

ԱԻՆ-ը հայտնում է՝ հունվարի 6-ին ժամը 14։06-ին Ճգնաժամային կառավարման ազգային կենտրոն ահազանգ է ստացվել, որ Երևանի Գ․Նժդեհի փողոցի թիվ 12 շենքի բնակարաններից մեկում հրդեհ է բռնկվել։ Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից երկու մարտական հաշվարկ և մեկ ավտոսանդուղք։ Պարզվել է, որ հրդեհը բռնկվել է Երևանի Մանթաշյան փողոցի թիվ 12 շենքի բնակարաններից մեկում։ Հրդեհը մեկուսացվել է ժամը 14։30-ին, մարվել՝ 14։41-ին։ Այրվել է բնակարանի ննջասենյակը գույքով (մոտ 15 քմ) և ջերմահարվել փակ պատշգամբի առաստաղը (մոտ 12 քմ)։

«Արմենիա» ավիաընկերությունը հայտնում է, որ հունվարի 6-ի չվերթը դեպի Շարմ Էլ Շեյխ հետաձգվել է Իրանի օդային տարածքի փակ լինելու պատճառով։ «Հայցում ենք մեր ուղևորների ներողամտությունը և տեղեկացնում, որ այս պահին մեր բոլոր աշխատակիցներն անում են հնարավորը ուղևորների հետ կապ հաստատելու և խնդիրը լուծելու համար»,- նշված է տարածած հաղորդագրության մեջ։

«Хабар-24» հեռուստաալիքը, հղում անելով տեղի վարչակազմին, տեղեկացնում է, որ իրավապահ մարմինները ցուցարարներից ազատել են Ղազախստանի Ակտոբե օդանավակայանը: «Ակտոբեի օդանավակայանն ազատվել է հանցագործներից»,- եթերում ասել է հաղորդավարը։ Ավելի վաղ հեռուստաալիքը հայտնել էր, որ օդանավակայանն աշխատում է բնականոն ռեժիմով, թռիչքներն իրականացվում են ըստ ժամանակացույցի։

Վերջին տեղեկություններով՝ ավելի քան 1000 մարդ է տուժել: Մի քանի հարյուր մարդ հոսպիտալացվել է ծայրահեղ ծանր վիճակում: Քաղաքացիական բնակչության շրջանում զոհերի մասին դեռ պաշտոնական հաղորդագրություն չկա:

Ղազախստանի ՆԳՆ մամուլի ծառայությունից հայտնել են, որ իրավապահ մարմինները Ալմաթիում ձերբակալել են անկարգություններ իրականացնող շուրջ 2000 մասնակցի։ «Ալմաթիի ոստիկանական բաժանմունքի աշխատակիցներն առաջ են շարժվել՝ մաքրելու Կարասայ-Բատիր և Մասանչիի փողոցները։ Միջոցներ են ձեռնարկվում օրինախախտներին ձերբակալելու ուղղությամբ։ Ընդհանուր առմամբ ոստիկանություն է բերվել մոտ 2 հազար մարդ»,- ասված է հաղորդագրության մեջ։

«Sputnik Բելառուս»-ի փոխանցմամբ՝ այսօր Բելառուսի նախագահ Ալեքսանդր Լուկաշենկոն հայտարարել է՝ Ղազախստանի իշխանությունները պետք է համաձայնության գան ցուցարարների հետ․ «Ես ուզում եմ բելառուսներից դիմել այդ ցուցարարներին (ոմանք նրանց ավազակներ են կոչում, այնտեղ տարբեր մարդիկ են): Ես պարզապես կասեի նրանց՝ աղմկեցիք, բղավեցիք` հերիք է։ Պետք է համաձայնության գալ, քանի դեռ ուշ չէ»,- ասել է բելառուսական պետության ղեկավարը։

«Խաբար 24» հեռուսատաալիքի փոխանցմամբ՝ քաղաքի պարետատունը հայտնել է, որ Ալմաթիում բողոքի ակցիաներ իրականացնելիս Գործարարների ազգային կենտրոնը 87 զանգ է ստացել ֆիտնես ակումբների, ռեստորանների, խանութների և գրավատների վրա հարձակվելու մասին: Գործարարներին կոչ են արել լուսանկարել և տեսանկարահանել վանդալիզմի փաստերը։

ԱՊՀ մասնակից պետությունների Հակաահաբեկչական կենտրոնը մտահոգված է Ղազախստանում տիրող իրավիճակով։ «Հակաահաբեկչական կենտրոնը պատրաստ է համակողմանի աջակցություն և օգնություն ցուցաբերել Ղազախստանի իրավասու մարմիններին ահաբեկչական և ծայրահեղական բնույթի սպառնալիքների չեզոքացման ուղղությամբ»,- ասված է կենտրոնի հաղորդագրության մեջ:

Ղազախստանի առողջապահության փոխնախարար Աժար Գինիաթը հայտնել է, որ երկրում ավազակային խմբավորումները հարձակվել են բժիշկների վրա։ «Ավազակախմբերը հարձակվում են բժիշկների վրա, այս պահի դրությամբ հանցագործների գործողություններից տուժել են ավելի քան տասը բուժաշխատողներ»,- հայտարարվել է «Խաբար 24» հեռուստաալիքի եթերում: Գինիաթը հորդորել է չխանգարել բուժաշխատողներին, որոնք իրենց մասնագիտական պարտքն են կատարում։

ՀՀ արտաքին գործերի նախարարությունից հայտնել են, որ Ղազախստանում կատարվող իրադարձությունների հետևանքով ՀՀ քաղաքացիներ չեն տուժել։ «Ղազախստանում ՀՀ դեսպանության հաղորդմամբ` այս պահի դրությամբ ՀՀ քաղաքացիների շրջանում տուժածներ չկան»,–ասել է ԱԳՆ մամուլի խոսնակ Վահան Հունանյանը։

ՌԴ ԱԳՆ մամուլի ծառայությունը հայտնում է, որ Ռուսաստանի և Թուրքիայի արտգործնախարարները պայմանավորվել են «3+3» ձևաչափով նոր հանդիպում կազմակերպել։ Հեռախոսազրույցի ընթացքում Լավրովն ու Չավուշօղլուն դրական են գնահատել 2021 թվականի դեկտեմբերի 10-ին Մոսկվայում կայացած «3+3» ձևաչափով առաջին հանդիպումը, որը միտված էր Անդրկովկասում իրավիճակի կարգավորման ու համագործակցության զարգացմանը։ «Պայմանավորվածություն է ձեռք բերվել առաջիկայում նույն կազմով հաջորդ հանդիպումը կազմակերպել։ Սերգեյ Լավրովն աջակցություն է հայտնել Թուրքիայի և Հայաստանի միջև հարաբերությունների կարգավորմանն ուղղված ջանքերին»,- ասված է հայտարարության մեջ։