Լրահոս

ԱԺ մարդու իրավունքների պաշտպանության և հանրային հարցերի մշտական հանձնաժողովի՝ ապօրինաբար լիազորությունները դադարեցված նախագահ, անկուսակցական պատգամավոր Թագուհի Թովմասյանը սոցցանցի իր էջում գրել է․ «Երևանի քաղաքապետը սպառնում է ՀՀ քաղաքացիներին, ովքեր իրենց սահմանադրական իրավունքն են իրացնում: Հատուկ Տիգրան Ավինյանի համար հիշեցնում եմ ՀՀ Սահմանադրության 58-րդ հոդվածը՝ համաձայն որի 1. Աշխատողներն իրենց տնտեսական, սոցիալական կամ աշխատանքային շահերի պաշտպանության նպատակով ունեն գործադուլի իրավունք: Գործադուլի իրականացման կարգը սահմանվում է օրենքով: 2. Գործադուլի իրավունքը կարող է սահմանափակվել միայն օրենքով՝ հանրային շահերի կամ այլոց հիմնական իրավունքների և ազատությունների պաշտպանության նպատակով: Իսկ ՀՀ աշխատանքային օրենսգրքի 73-րդ և 79-րդ հոդվածները սահմանում են գործադուլ հայտարարելու մանրամասները: Այսինքն, այն ռեպրեսիաները, որոնք գործադրվում են կամ կգործադրվեն իրենց բողոքն արտահայտող քաղաքացիների նկատմամբ, հակաօրինական են: Ստելը և ստով կառավարելն անընդունելի են. մարդկանց պահանջներին պետք է ականջալուր լինել»:

Պետական բյուջեն պետության և պետականության շատ կարևոր հատկանիշ է։ Ազգային ժողովում 2025 թվականի պետական բյուջեի նախագծի քննարկման ընթացքում այս մասին հայտարարեց վարչապետ Նիկոլ Փաշինյանն՝ ընդգծելով բյուջեի դերը և նշանակությունը ոչ միայն պետության, այլև յուրաքանչյուր քաղաքացու համար։ «Այո, պետություն, պետականություն ասելով, անկախություն, ինքնիշխանություն ասելով առաջին հերթին պետք է հասկանալ պետական բյուջե, բայց նաև պետական բյուջեն մեզնից յուրաքանչյուրի ընտանեկան բյուջեի անբաժանելի մաս է։ Ուզում եմ կրկնել, որ Հայաստանի Հանրապետությունում չկա մի մարդ, որի անձնական կարիքների համար Հայաստանի Հանրապետության պետական բյուջեից միջոցներ չեն ծախսվում։ Չկա այդպիսի մարդ։ Ընդ որում, Հայաստանի Հանրապետության ոչ միայն քաղաքացի ու բնակվող, այլև Հայաստանի Հանրապետության քաղաքացի չհանդիսացող և Հայաստանի Հանրապետությունում բնակվող գեթ մեկ մարդ չկա, ում անձնական կարիքները հոգալու համար Հայաստանի Հանրապետության պետական բյուջեից չի ծախսվում կոնկրետ գումար։ Հետևաբար՝ մենք պետք է այս ընկալումն էլ ավելի խորացնենք, որը Հայաստանի Հանրապետության պետական բյուջեն մեր բոլորիս հավաքական ընտանեկան բյուջեն է և սա պետության և պետականության կարևոր ատրիբուտ և հատկանիշ է»,-եզրափակեց վարչապետը։

Դեկտեմբերի 2-ին ՀՀ արտաքին գործերի նախարար Արարատ Միրզոյանը Հաագայում հանդիպում է ունեցել Միջազգային քրեական դատարանի անդամ պետությունների ասամբլեայի նախագահ Պայվի Կաուկորանտայի հետ։ Այս մասին տեղեկացնում են ՀՀ ԱԳՆ-ից: Զրուցակիցները քննարկել են ՄՔԴ գործունեության արդյունավետության ապահովման ուղղությամբ անդամ պետությունների համագործակցության հարցեր։ Ընդգծվել է, որ ներկայիս՝ մարտահրավերներով լի, ժամանակահատվածում ամուր հանձնառությունը միջազգային իրավունքի նորմերի պահպանմանն ու իրավունքի գերակայության ապահովմանը և հետևաբար նաև Դատարանի գործունեությանն առավել, քան կարևոր է։ Համապատասխանաբար, անդրադարձ է կատարվել ՄՔԴ հետ Հայաստանի փոխգործակցության առաջնահերթություններին։ Արարատ Միրզոյանը և Պայվի Կաուկորանտան մտքեր են փոխանակել կայուն խաղաղության ապահովման ուղղությամբ միջազգային արդարադատության մեխանիզմների հնարավոր դերակատարմանը։ Հանդիպմանն անդրադարձ է կատարվել նաև տարածաշրջանային զարգացումներին։

Նիկոլ Փաշինյանը նոր սկանդալային հայտարարություն է արել Արցախի մասին: Արցախը համեմատել է հղի կնոջ հետ, որը 9 ամիս հետո պետք է ծննդաբերեր՝ կամ բնական ճանապարհով, կամ կեսարյան հատումով, իսկ երեխան, վարչապետի խոսքով, կամ պետք է կենդանածին լիներ, կամ մեռելածին: Հայաստանի վարչապետը Հայաստանի թիվ մեկ քաղաքական ամբիոնից հայտարարել է՝ իրենք չեն գտել Արցախ-հղիությունը ևս 9 ամսով երկարաձգելու տարբերակը:

Ռուսական ռուբլու առքի առավելագույն արժեքն է 3․74 դրամ, վաճառքի նվազագույն արժեքը՝ 4.85 դրամ:

Հայաստանի վարչապետը վստահ է, որ հենց գործող կառավարությունն է այն կառավարությունը, որ հնարավորություն է ունենալու ասել, որ երաշխավորել են Հայաստանի պետականության գոյությունն առաջիկա 100-ամյակի ընթացքում: «Արմենպրես»-ի փոխանցմամբ՝ Փաշինյանը նման համոզմունք հայտնեց ԱԺ-ում 2025 թվականի պետական բյուջեի մասին օրենքի նախագծի քննարկման ժամանակ ունեցած ելույթում: Վարչապետը հիշեցրեց՝ 2 տարի առաջ ԱԺ ամբիոնից հայտարարել է՝ եթե հաջողվի 1-2 տարի պահել Հայաստանի պետականությունը, դա նշանակելու է, որ առաջիկա հարյուրամյակում պետության գոյությունը պահպանելու իրական հնարավորություն է ստեղծվելու: «Եվ ահա 2 տարի անց ես կանգնած եմ Հայաստանի խորհրդարանի ամբիոնի մոտ՝ որպես Հայաստանի Հանրապետության վարչապետ: Եվ պիտի այսպիսով արձանագրեմ, որ միջնաժամկետում մեր դարավոր և ռազմավարական խնդիրը լուծված է»,-ասաց Փաշինյանը: Նա սակայն շեշտեց, որ չի կարելի ոչ մի վայրկյան թուլացնել զգոնությունը, որովհետև այն մարտահրավերների մի զգալի մասը, որոնք առկա էին 2 տարի առաջ, դարձել են էականորեն ավելի կառավարելի, բայց նաև ի հայտ են եկել նոր մարտահրավերներ: Ըստ վարչապետի՝ նոր մարտահրավերները կառավարելու համար անհրաժեշտ է հաղթահարել «ազգ-նահատակ», «ազգ-բանակ» բանաձևերն ու ավելի ու ավելի ամուր կանգնել որպես պետություն, որի միակ խնդիրը սեփական տարածքում սեփական քաղաքացիների անվտանգությունն ու բարեկեցությունն ապահովելն է: «Մեզ պետք է ամուր կանգնել այս հայեցակարգի վրա և քայ-քայլ, զգուշորեն, ինքներս մեզ հաշիվ տալով, որ դեռևս շարունակում ենք քայլել ականապատ դաշտի միջով, կարողանալ հաղթահարել այս ականապատ դաշտն ու միջավայրը և հասնել այն հանգրվանին, որը հնարավորություն կտա ասել, որ մենք երաշխավորեցինք մեր պետության լինելիությունն առաջիկա 100-ամյակի ընթացքում: Ես համոզված եմ, որ հենց մենք ենք այն կառավարությունը, հենց մենք ենք այն խորհրդարանը, որոնք հնարավորություն են ունենալու ասելու՝ ահա, մենք երաշխավորեցինք Հայաստանի պետականության գոյությունն առաջիկա 100-ամյակի ընթացքում»,-եզրափակեց վարչապետը:

Սիրիայում ՀՀ դեսպանությունը հորդորում է Հալեպում և շրջակայքում բնակվող հայրենակիցներին հնարավորինս զերծ մնալ տեղաշարժերից։ «Տեղեկացնում ենք, որ մեր հայրենակիցներին օժանդակելու նպատակով Դամասկոսում ՀՀ դեսպանությունում ստեղծվել է թեժ գիծ՝ + 963 96 000 36 22: Այս մասին հայտնում են Սիրիայում ՀՀ դեսպանությունից: «Ներկայումս ճշտվում են ցուցակները, թե ում անձնագրերն են պատրաստ: Կան անձնագրային գործեր, որոնք դեռ գտվում են պատրաստման փուլում և գտնվում են Հայաստանում: Փնտրվում են հնարավորություններ առկա անձնագրերը իրենց հասցեատերերին հանձնելու ուղղությամբ: Իրավիճակը փոքր ինչ կայունանալուց հետո հյուպատոսությունը կկապվի հասցեատերերի հետ և կտեղեկացնի ուր և ինչպես կարող են ստանալ իրենց անձնագրերը: Այս պահին կազմակերպված տարհանումը անհնարին է: Հորդորում ենք Հալեպում և շրջակայքում բնակվող մեր հայրենակիցներին հնարավորինս զերծ մնալ տեղաշարժերից /միայն անհրաժեշտության դեպքում/, իսկ քաղաքից դուրս գալու փորձերը այս պահին լիովին բացառել: Այն հայրենակիցները, ովքեր դիմել են ՀՀ քաղաքացիության, բայց դեռ չեն ստացել անձնագրերը և հայազգի Սիրիայի քաղաքացիները, ովքեր ցանկանում են մեկնել Հայաստան՝ կարող են դիմել Դամասկոսում կամ Բեյրութում ՀՀ դեսպանություններ և հեշտացված կարգով ստանալ ՀՀ մուտքի արտոնագրեր /վիզաներ/: Հալեպում ՀՀ գլխավոր հյուպատոսը ներկայումս տեղակայված է Դամասկոսում ՀՀ դեսպանությունում, և արտակարգ ռեժիմով շարունակում է իր աշխատանքները դեսպանությունից»,- ասված է հաղորդագրության մեջ:

Ասում էր՝ պաշտոնապես Հայաստանում գնաճ չկա կամ 1-2 տոկոս է, որովհետև սոխն ու սխտորն էժանացել է, կանաչին ու կարտոֆիլն էժանացել է, լոբին էժանացել է, փոխարենը՝ միսն ու կարագը թանկացել է։ Միսն ու կարագը հարուստներն են ուտում, իսկ աղքատները մնում են սոխի ու կանաչու հույսին։

Հայլուր 12։30 Ծեծ ուտել չեն ուզում, խաբել են իրենց. ինչո՞ւ վարորդները դուրս չեն եկել աշխատանքի

Այսօր վաղ առավոտից «Երևանի ավտոբուս» ՓԲԸ-ում գործադուլ արած վարորդները 7-ն են։

Մարդու իրավունքների պաշտպան Անահիտ Մանասյանը դեկտեմբերի 2-ին այցելել է Արագածոտնի մարզի եզդիական բնակչություն ունեցող բնակավայրեր։ Այցը կազմակերպվել է Ազգային ժողովի պատգամավոր, խորհրդարանում եզդիական համայնքի ներկայացուցիչ, ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնակատար Ռուստամ Բաքոյանի հետ համատեղ, մասնակցել են Հայաստանում ՅՈՒՆԻՍԵՖ-ի ներկայացուցիչ Քրիսթինե Վայգանդը, խորհրդարանական հանձնաժողովի անդամ պատգամավորներ։ Շրջայց է իրականացվել Արևուտ, Կանչ և Հակո գյուղական բնակավայրերով, Անահիտ Մանասյանն ու այցի մասնակիցները զրուցել են բնակիչների հետ, ծանոթացել նրանց կենցաղային պայմաններին։ Պաշտպանի հանձնարարությամբ բնակիչների կողմից բարձրացված խնդիրները հաշվառվել են։ Այցի մասնակիցները եղել են վերոնշյալ բնակավայրերի դպրոցներում, զրուցել աշակերտների և ուսուցչական անձնակազմի հետ։ Բոլոր բնակավայրերում արձանագրվել են խնդիրներ` կապված բժշկական կենտրոնների, դեղատների, վաճառակետերի և տրանսպորտի բացակայության հետ։ Ի թիվս այլնի, եզդիական համայնքի ներկայացուցիչները նշել են, որ իրենց բնակավայրերում չկա ավագ դպրոց, ինչի հետևանքով երեխաների՝ ապագայում կրթությունը շարունակելու հետ կապված խնդիրներ են առաջանում: Ուսումնական հաստատությունների շենքային պայմանները գտնվում են ոչ բարվոք վիճակում. բացակայում է կենտրոնական ջեռուցման համակարգ, դասարանների կահավորումը թերի է, մարզադահլիճներն ընդհանրապես ենթակա չեն օգտագործման։ Անահիտ Մանասյանը հատուկ ընդգծում է, որ ազգային փոքրամասնությունների իրավունքները պետք է լիարժեք պաշտպանված և խթանված լինեն Հայաստանում։ Ինչ վերաբերում է երեխաների իրավունքներին՝ Պաշտպանը հատուկ ընդգծում է, որ երեխայի լավագույն շահը, նրա իրավունքների պաշտպանությունը Մարդու իրավունքների պաշտպանի առաջնահերթություններից են, մեծ է պետության դերը երեխաների իրավունքների ապահովման և պաշտպանության հարցում: «Երեխաների իրավունքների պաշտպանության տեսանկյունից առաջնային է կրթական բարենպաստ միջավայրի ստեղծման ուղղությամբ համապարփակ և արդյունավետ միջոցների ձեռնարկումը»,- ընդգծել է Անահիտ Մանասյանը: Մարդու իրավունքների պաշտպանը նշել է, որ արձանագրված բոլոր խնդիրները, որոնք գտնվում են իր իրավասության շրջանակներում, կամփոփվեն և կներկայացվեն պետական իրավասու մարմիններին։

Տավուշի մարզի դատախազությունը, պետական (համայնքային) շահերի պաշտպանության լիազորության շրջանակում, ուսումնասիրելով Տավուշի մարզային քննչական վարչությունում քննվող քրեական վարույթով ձեռք բերված տվյալները, հարցումներ է կատարել Կադաստրի կոմիտե և պարզել, որ «Տավուշ» միջազգային հայրենակացական միության ՀԿ-ին Տավուշի մարզում անհատույց տրամադրվել են 5 հողատարածքներ, որոնք չեն օգտագործվում ըստ նպատակային նշանակության: Այս մասին տեղեկացնում են ՀՀ գլխավոր դատախազությունից: Դատախազի կողմից գրություն է հասցեագրվել Իջևանի համայնքապետարան՝ վերոնշյալ հողամասերը համայնքի օգտագործմանը վերադարձնելու նպատակով: Իջևան համայնքի իրավասու մարմինների կողմից դատախազի գրության հիման վրա ձեռնարկված գործողությունների արդյունքում ընդհանուր 3,1845 հա մակերեսով 5 հողամասը վերադարձվել է Իջևան համայնքին:

Մամուլի տեսություն 03.12.2024

ՔՊ խմբակցության քարտուղար Արթուր Հովհաննիսյանից հետաքրքրվեց՝ արդյո՞ք Հովիկ Աղազարյանը կհեռացվի խմբակցությունից։ Մանրամասները՝ տեսանյութում։

Ղարաբաղյան հակամարտության հետևանքով անհետ կորած անձանց հարցը Կարմիր խաչի միջազգային կոմիտեի գործառնական առաջնայնություններից է: Անհետ կորած անձանց ճակատագիրը պարզելու ուղղությամբ ԿԽՄԿ-ի գործառույթների շրջանակներում իրականացվող աշխատանքների վերաբերյալ «Արմենպրես»-ի թղթակցի հարցին ի պատասխան՝ այս մասին ասաց Հայաստանում ԿԽՄԿ պատվիրակության հաղորդակցման ծրագրերի ղեկավար Զառա Ամատունին: «Ղարաբաղյան հակամարտության առնչությամբ տարածաշրջանում այս խնդրով զբաղվում ենք ավելի քան 30 տարի: Սա նշանակում է տարբեր ուղղություններով աշխատանք: Առաջին հերթին խոսքը գնում է հանձնագրով երաշխավորված իրավունքի մասին, որը վերաբերում է ոչ թե ԿԽՄԿ պարտավորություններին, այլ համապատասխան կողմերում իշխանությունների կողմից անհետ կորած անձանց ընտանիքներին պատասխաններ տալուն, թե ռազմական գործողությունների առնչությամբ ինչ է տեղի ունեցել իրենց հարազատի հետ: Սա միջազգային մարդասիրական իրավունքի պահանջն է: Այս ուղղությամբ մենք աշխատում ենք կողմերի պատկան մարմինների հետ, որպեսզի հանձնագրի շրջանակներում հիշեցնենք իրենց պարտավորությունների մասին և որքանով հնարավոր է աջակցենք մեր տեխնիկական փորձառությամբ, որոշակի հմտություններով, որոնք ձեռք ենք բերել նմանատիպ իրավիճակներում աշխատելու ընթացքում»,-նշեց Ամատունին: Նրա խոսքով՝ ԿԽՄԿ-ի աշխատանքների երկրորդ կարևոր ուղղությունը յուրաքանչյուր անհետ կորած անձի մասին հնարավորինս սպառիչ և մանրամասն տեղեկություններ, տվյալներ տրամադրելն է: «Հիմնվելով ընտանիքների հայտերի վրա՝ տարածաշրջանում մեր գրասենյակների միջոցով հավաքագրել ենք շուրջ 5000 անհետ կորած անձանց տվյալներ, որոնք 90-ականներից, այնուհետև 2020 թվականից մինչև 2023 թվականն ընկած ժամանակահատվածում հակամարտության սրացումների հետևանքով անհետ կորած են համարվում: Նրանցից շուրջ 1000-ը հայեր են, որոնց տվյալները ԿԽՄԿ-ն հավաքագրել է Երևանի և Ղարաբաղի գրասենյակների միջոցով: Այս թվում են նաև անձինք, որոնց հարազատները նրանց համարում են անհետ կորած՝ չնայած այն հանգամանքին, որ առկա է դրական ԴՆԹ նույնականացում․ կան ընտանիքներ, որոնք տարբեր պատճառներով չեն ընդունում պատասխանները: Սա մեզ համար նույնպես ազդակ է աշխատելու պատկան մարմինների հետ, փորձելու պարզել, պարզաբանել հանգամանքները, որոնց պատճառով անձինք չեն ընդունում այդ արդյունքները»,-մանրամասնեց Ամատունին՝ շեշտելով, որ ԿԽՄԿ-ն ինքնուրույն չի իրականացնում նույնականացումներ․ դա համապատասխան իշխանությունների ու կառույցների աշխատանքն է: «Մենք ավելի շատ փոխանցում ենք մեր փորձը։ Օրինակ՝ դատաբժշկական փորձագիտության կենտրոնի լաբորատորիայի հետ սերտ համագործակցելով՝ Հայաստանում մեր փորձագետները, թե՛ կահավորման, թե՛ որոշակի դասընթացների և փորձի փոխանակման միջոցով փորձում են բարձրացնել կարողությունները, որպեսզի հնարավորինս աջակցենք այս ոլորտում արհեստավարժության բարձր մակարդակին, իսկ սա իր հերթին կնպաստի որևէ արտակարգ իրավիճակում անհետացումների կտրուկ նվազեցմանը»,-պարզաբանեց Ամատունին: Ինչ վերաբերում է անհետ կորած անձանց որոնումների գործընթացին, ըստ Ամատունու, դրա շուրջ քայլերն ու որոշումները իշխանությունների գործն են, որոնց ԿԽՄԿ-ն՝ որպես չեզոք միջնորդ, պատրաստ է աջակցել: «Մեր պատկերացմամբ՝ որոշակի մարդասիրական միջավայր պետք է ստեղծվի, որը թույլ կտա կողմերին միասին ունենալ համապատասխան քայլեր, օրինակ՝ քարտեզագրել հուղարկավորման հնարավոր վայրերը,եթե խոսքը գնում է այն անձանց մասին, որոնց վերաբերյալ քիչ թե շատ կան տեղեկություններ։ Բնականաբար, մենք միշտ վառ և ակտիվ ենք պահում այս հարցը՝ քննարկելով այն թե՛ իշխանությունների հետ, թե՛ աշխատելով ընտանիքների հետ, սակայն բուն գործողությունները և որոշումները մեր ձեռքում չեն։ Մենք պատրաստ ենք աշխատել կողմերի հետ՝ որպես չեզոք միջնորդ»,-ընհանրացրեց Ամատունին:

Դեկտեմբերի 2-ին՝ ժամը 22:07-ին, Լոռու մարզային փրկարարական վարչության ճգնաժամային կառավարման կենտրոն ահազանգ է ստացվել, որ Սպիտակ քաղաքի Գործարանային փողոցի թիվ 20 հասցեում այրվում է տուն։ Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երեք մարտական հաշվարկ։ Հրդեհը մեկուսացվել է ժամը 22։30-ին, մարվել՝ 23։30-ին։ Այրվել են փայտաշեն տան (մոտ 60 քմ) տանիքի փայտե կառուցատարրերը (մոտ 20 քմ) և շքամուտքը (մոտ 20 քմ)։

Ազգային ժողովը հայտարարեց, որ Կենտրոնական ընտրական հանձնաժողովը ներկայացրել է ԱԺ պատգամավոր ընտրված և լիազորությունները վաղաժամկետ դադարած պատգամավորի մանդատը հաջորդ թեկնածուին տրամադրելու մասին համապատասխան արձանագրություն, ըստ որի մանդատը տրվում է «Քաղաքացիական պայմանագիր» կուսակցության ընտրական ցուցակի առաջին մասի հերթական հաջորդ թեկնածու Ալեքսանդր Ավետիսյանին։ 

Այսօր՝ դեկտեմբերի 3-ին, արտակարգ իրավիճակ է ստեղծվել Երևանում։ Երևանի քաղաքապետարանի «Երևանի ավտոբուս» ՓԲԸ-ի մեծ թվով աշխատակիցներ վաղ առավոտից հայտարարել են գործադուլ և հրաժարվում են դուրս գալ երթուղի։ Ֆոտոլրագրող Գագիկ Շամշյանի զրույցում վարորդներն ասում էին. «Տևական ժամանակ է՝ մեզ խաբված ենք զգում։ Ամեն անգամ քաղաքային իշխանությունները խոստանում էին, որ կվերանայեն մեր աշխատանքային պայմաններն ու աշխատավարձային քաղաքականությունը, այսինքն մեր աշխատավարձը կբարձրացնեն, «կանեցներում» կունենանք բարվոք պայմաններ։ Սակայն ոչ մի առաջընթաց չկա, էլ չենք ասում բազմաթիվ պրոբլեմների մասին, որոնց մասին տեղյակ են հենց քաղաքապետարանում։ Հիմա արդեն մեր համբերության բաժակը լցվել է, ինչքան կարելի է խաբել, խաբել, խաբել։ Քաղաքային իշխանությունը պետք է իմանա, որ չի կարող խաբելով համոզել մեզ, ասել դուրս եկեք գործի։ Ստիպված ենք դիմել այս ծայրահեղ քայլին, քանի որ այդ տրանսպորտից օգտվում են նաև մեր հարազատները։ Մենք էլ ենք ուզում ժողովրդի համար լավ լինի, բայց նաև իշխանությունները պիտի մի քիչ մտածեմ մեր մասին։ Մի օր որ երթևեկեք, կտեսնեք՝ ամենավերջին բաներն են ասում, էն տեսակ անեծքներ են տալիս։ Դուք մի օր պիտի շրջեք ավտոբուսով ու կտեսնեք իրականում ինչ է կատարվում։ Հասնում ենք «կանեց», չենք կարողանում մեր բնականոն կարիքները հոգալ, ավտոբուսը տանում ենք շուկա, ժամերով սպասում ենք, խցանումների պատճառով մի քիչ ուշանում ենք, մեզ են մեղադրում։ Էնքան բան կա ասելու, որ չեք պատկերացնի։ Երևանն սպասարկող 3 պարկերում էլ գործադուլ է, պահանջում ենք, որպեսզի մեր կողմից բարձրացված հարցերը լուծեն, հակառակ դեպքում առեք ձեր գդալն ու կերեք ձեր բորշչը»։

ԱՄՆ ընտրված նախագահ Դոնալդ Թրամփը կմեկնի Ֆրանսիա՝ ներկա գտնվելու Փարիզի Աստվածամոր տաճարի բացմանը, որը խոշոր հրդեհից այրվել էր 2019 թ. ապրիլին։ Սա կլինի նոյեմբերին ընտրվելուց հետո Թրամփի առաջին օտարերկրյա ուղևորությունը։ Իր Truth Social սոցիալական հարթակում Թրամփը, որը ԱՄՆ նախագահի պաշտոնը կստանձնի հունվարի 20-ին, գովել է Ֆրանսիայի նախագահ Էմանուել Մակրոնի կառավարությանը տաճարը վերականգնելու համար։ «Պատիվ ունեմ հայտնելու, որ շաբաթ օրը մեկնելու եմ Ֆրանսիա՝ Փարիզ, մասնակցելու հոյակերտ և պատմական Աստվածամոր տաճարի վերաբացմանը, որը լիովին վերականգնվել է հինգ տարի առաջ տեղի ունեցած ավերիչ հրդեհից հետո: Նախագահ Էմանուել Մակրոնը հիանալի աշխատանք է կատարել՝ ապահովելով, որ Աստվածամոր տաճարը վերականգնվի իր ողջ փառքով և նույնիսկ ավելի: Դա շատ յուրահատուկ օր կլինի բոլորի համար», - գրել է Թրամփը։ Օրերս Ֆրանսիայի նախագահը և առաջին տիկինն այցելել էին Փարիզի Աստվածամոր տաճար և շրջել այնտեղ։

Դեկտեմբերի 2-ին Հաագայում ՀՀ ԱԳ նախարար Արարատ Միրզոյանը հանդիպում է ունեցել Նիդերլանդների արտաքին առևտրի և զարգացման նախարար Ռայնետ Քլևերի հետ: Այս մասին տեղեկացնում են ՀՀ ԱԳՆ-ից: Զրուցակիցները քննարկել են Հայաստանի և Նիդերլանդների միջև ակտիվ քաղաքական երկխոսությանը զուգահեռ ոլորտային ուղղություններով համագործակցության զարգացման հնարավորությունները։ Փոխադարձ հետաքրքրություն ներկայացնող ոլորտների շարքում առանձնանշվել են ջրային ռեսուրսների կառավարումը, առողջապահությունը, ներդրումների խրախուսման միջոցով տնտեսական համագործակցության խթանումը: Նախարար Միրզոյանը նշել է, որ ՀՀ-ն բարձր է գնահատում Նիդերլանդների աջակցությունը Հայաստանում ժողովրդավարության, օրենքի գերակայության և մարդու իրավունքների պաշտպանության ոլորտներում բարեփոխումներին, ինչն արտացոլվել է նաև Նիդերլանդների կոալիցիոն կառավարության առաջնահերթություններն ուղենշող փաստաթղթում։ Ընդգծել է այս ուղղությամբ համագործակցության շարունակականության կարևորությունը։ Զրուցակիցները քննարկել են ՀՀ-ԵՄ գործընկերության հետագա խորացման հեռանկարները։ Այս համատեքստում Արարատ Միրզոյանը և Ռայնետ Քլեվերը մտքեր են փոխանակել նաև տարածաշրջանային փոխկապակցվածության ապահովմանն ուղղված ծրագրերի շուրջ: Ներկայացնելով Հարավային Կովկասում կայուն խաղաղության հաստատման ՀՀ տեսլականը՝ ՀՀ ԱԳ նախարարն անդրադարձ է կատարել ՀՀ կառավարության կողմից մշակված «Խաղաղության խաչմերուկ» ծրագրին: Հանդիպմանը ՀՀ ԱԳ նախարարը ներկայացրել է նաև Լեռնային Ղարաբաղից բռնի տեղահանված հայերի կարիքների հասցեագրմանն ուղղված ՀՀ կառավարության կողմից իրականացվող քայլերը։