Լրահոս

«Խորապես վշտացած ենք Բոլուի ողբերգական հրդեհից, որը տասնյակ կյանքեր խլեց։ Մեր մտքերը զոհերի և նրանց ընտանիքների հետ են: Վիրավորներին մաղթում ենք շուտափույթ ապաքինում»,- ասված է հրապարակման մեջ։

Այսօր ռուսական կողմը հայտնել է, որ ուկրաինական անօդաչուները Սմոլենսկի շրջանում կործանիչներ արտադրող գործարան են վնասել: 1063 օր շարունակվող պատերազմի ընթացքում ավելի քան 1 մլն զոհի մասին են հայտնում միջազգային կառույցները: ԱՄՆ նորընտիր նախագահ Թրամփը սպասում է, որ Պուտինը գործարքի կգնա: Զելենսկին համամիտ է նրա հետ:

Սպիտակ տուն Թրամփի աղմկոտ մուտքը համաշխարհային մամուլի գլխագրերում է: Մեկ շրջան բաց թողնելուց հետո նորից Վաշինգտոն վերադարձած Թրամփը հենց առաջին օրը չեղարկել է իր տարիքի չափ որոշում: Նա վետո է դրել Բայդենի ընդունած 78 որոշումների վրա:

Երեկ՝ հունվարի 20-ին, վիճաբանություն, ծեծկռտուք է տեղի ունեցե Երևանում։ Ժամը 11։40-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Նոր Նորքի բաժնում օպերատիվ տեղեկություններ են ստացվել, որ Թևոսյան փողոցում գտնվող «Տրոլեյբուսների պարկ»-ի տարածքում մի խումբ անձանց միջև վիճաբանություն, ծեծկռտուք է տեղի ունեցել և կա վիրավոր։ Ինչպես հայտնում է ֆոտոլրագրող Գագիկ Շամշյանը, նշված պարկ են ժամանել ոստիկանության Նոր Նորքի բաժնի ծառայողները, որտեղ պարզվել է, որ ստացած տեղեկությունը հավաստի է։ Մինչ ոստիկանների դեպքի վայր հասնելը «Սուրբ Գրիգոր Լուսավորիչ» բժշկական կենտրոնից ահազանգ է ստացվում ոստիկանության Նոր Նորքի բաժին, որ «պոլիտրավմա հարցական, Գ.ՈՒ.Վ» ախտորոշմամբ իրենց մոտ է տեղափոխվել մի քաղաքացի։ Հիվանդանոց մեկնած ոստիկանները պարզում են, որ վիրավորը Երևանի բնակիչ 55-ամյա Լյովա Մ․-ն է։ Բժիշկները ոստիկաններին հայտնել են, որ նա գտնվում է հետազոտման փուլում և ի վիճակի չէ այս պահին կատարվածի մասին բացատրություն տալու։ Մինչ բժիշկները օգնություն էին ցուցաբերում վիրավորին, համայնքային ոստիկանության Նոր Նորքի բաժնի ծառայողները պարզում են, որ այդ օրը ժամը 10։30-ի սահմաններում Թևոսյան փողոցում գտնվող «Տրոլեյբուսների պարկ»-ում վիճաբանություն է տեղի ունեցել Լյովա Մ․-ի և Երևանի բնակիչներ 48-ամյա Վարդգես Պապյանի և 58-ամյա Արթուր Հովհաննիսյանի միջև, որի ժամանակ էլ վերջիններս ծեծի են ենթարկել Լյովա Մ․-ին։ Դեպքի փաստով ոստիկանության Նոր Նորքի բաժնում փաստաթղթեր են ձևակերպվել, որոնք փոխացվել են ՀՀ Քննչական կոմիտեի Երևան քաղաքի քննչական վարչության Նոր Նորքի քննչական բաժին։ Գ․ Շամշյանի տեղեկություններով՝ կասկածյալներից Վ․ Պապյանը «Երևան ավտոբուս» ՓԲԸ-ի անվտանգ երթևեկության ծառայության պետն է, իսկ Ա․ Հովհաննիսյանը աշխատում է «Քինգ Մարշալ» ընկերությունում, որպես անվտանգության աշխատակից է։ Ֆոտոլրագրողի տեղեկություննեորվ՝ այս միջադեպի մասին իմացել է Երևանի քաղաքապետարանի հաշվեկշռում գրանցված «Էլեկտրոտրանսպորտ» ՓԲԸ-ի տնօրեն Սարգիս Բեջանյանը, ով փորձել է այնպես անել, որպեսզի իրավապահները չիմանան միջադեպի մասին, սակայն այս դեպքում համայնքային ոստիկանության Նոր Նորքի բաժնի ոստիկանները Ս․ Բեջանյանին «շախ ու մատ» են արել։

ՆԳ նախարար Արփինե Սարգսյանը հունվարի 20-ին ընդունել է Հայաստանում ՄԱԿ-ի մշտական համակարգող Ֆղանսուազ Ժակոբին։ Հանդիպմանը ներկա էին ՆԳ նախարարի տեղակալ Արմեն Ղազարյանն ու Փրկարար ծառայության տնօրեն-ներքին գործերի նախարարի տեղակալ Կամո Ցուցուլյանը, հայտնում են ՆԳՆ-ից։ «Արփինե Սարգսյանն ընդգծել է ՄԱԿ-ի գրասենյակների հետ ՆԳ նախարարության լայնածավալ համագործակցությունը, որն ընդգրկում է նախարարության մանդատի շրջանակում առկա գործառույթները։ Նախարարի խոսքով՝ փոխգործակցությունն ընդլայնվելու միտում ունի՝ հաշվի առնելով վերջերս մեկնարկած ՆԳ նախարարության մարդկային կապիտալի զարգացմանը միտված նոր ծրագիրը։ Ֆղանսուազ Ժակոբը շնորհակալություն է հայտնել ընդունելության համար և պատրաստակամություն հայտնել շարունակելու համագործակցությունը՝ ընդգծելով հատկապես Փրկարար ծառայության հետ ակտիվ փոխգործակցությունը։ Քննարկվել են համագործակցության ուղղությունների ընդլայնման հեռանկարները, ներառյալ` մարդու իրավունքների պաշտպանության, հատկապես երեխաների իրավունքների ապահովման, Փրկարար ծառայությանը տեխնիկական աջակցություն տրամադրելու հարցեր։ Անդրադարձ է կատարվել նաև Փրկարար ծառայության կառուցվածքային փոփոխություններին, հանցավորության դեմ պայքարին, նախարարության ենթակա ծառայություններում կանանց ներգրավվածության խթանմանը։ Կողմերն ընդգծել են համագործակցությունը շարունակելու պատրաստակամությունը՝ ուղղված համատեղ ծրագրերի արդյունավետ իրականացմանը»,- ասված է հաղորդագրության մեջ։

Մոսկվա աշխատանքային այցի ընթացքում ՀՀ ԱԳ նախարար Արարատ Միրզոյանն այցելել է Տրետյակովյան պատկերասրահ, դիտել ռուս պերեդվիժնիկների ցուցադրությունը: Այս մասին հայտնում են ՀՀ ԱԳՆ-ից:

Սլովակիայի ընդդիմությունը պատրաստվում է երկրում «Մայդան» իրականացնել։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին ասել է Սլովակիայի վարչապետ Ռոբերտ Ֆիցոն։ «Ես չեմ կարող անուններ տալ, չեմ կարող նշել հանգամանքներ, բայց կարող եմ ամենայն լրջությամբ ասել, որ Սլովակիայի ընդդիմությունը պատրաստվում է երկրում «Մայդան» իրականացնել։ Սլովակիայի ընդդիմությունը պատրաստվում է գրավել կառավարական շենքերը, դիմակայելու է կառավարության աշխատանքին և համագործակցելու է արտաքին ուժերի հետ»,- ասել է Ֆիցոն Հունգարիայի վարչապետ Վիկտոր Օրբանի հետ համատեղ ասուլիսում՝ մեկնաբանելով Սլովակիայի հակահետախուզության տեղեկատվությունը երկարաժամկետ նախապատրաստված գործողության մասին, որն ուղղված է Սլովակիայում իրավիճակի ապակայունացմանը: Ավելի վաղ Սլովակիայի հետախուզական և հակահետախուզական ծառայությունը տեղեկություն էր ստացել Սլովակիայի ապակայունացմանն ուղղված երկարաժամկետ կազմակերպված գործողության մասին։ Ինչպես նշել է կազմակերպության խոսնակը, կոնկրետ տվյալներ չեն կարող հրապարակվել դրանց բովանդակության և գաղտնիության աստիճանի պատճառով։

ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյին այցելել է Վեդու ամբարտակի շինհրապարակ։ Դեսպանն այդ մասին տեղեկացրել է համացանցի X հարթակում։ Օլիվիե Դըկոտինյին նշել է, որ անկախությունից ի վեր Հայաստանում կառուցված ամենամեծ հիդրոտեխնիկական կառույցն ավելի քան 80%-ով ֆինանսավորվում է Զարգացման ֆրանսիական գործակալության կողմից։ «Հայաստանում Ֆրանսիան իր ռեսուրսները դնում է այնտեղ, որտեղ իր համոզմունքներն են»,- գրել է ՀՀ-ում Ֆրանսիայի արտակարգ և լիազոր դեսպանը։

Բաքվում այսօր շարունակվել է Արցախի ռազմաքաղաքական ղեկավարների և մեր մյուս հայրենակիցների դատական նիստը: Ի տարբերություն առաջին նիստի, որից հոգեմաշ լուսանրկարներ տարածեց Բաքուն՝ այսօրվա դատական գործընթացից որևէ տեղեկություն չի հաղորդում ադրբեջանական մամուլը:

Հանրապետության նախագահ Վահագն Խաչատուրյանին իր հավատարմագրերն է հանձնել Հայաստանում Իտալիայի նորանշանակ դեսպան Ալեսսանդրո Ֆեռանտին։ Նախագահը շնորհավորել է նորանշանակ դեսպանին Հայաստանում դիվանագիտական առաքելությունն սկսելու կապակցությամբ և մաղթել հաջողություններ։ Նա ընդգծել է, որ պատմական սերտ առնչություններն ու ընդհանուր արժեհամակարգերը նպաստել են Հայաստանի և Իտալիայի ժողովուրդների միջև բարեկամական կապերի ձևավորմանը և զարգացմանը։ Վահագն Խաչատուրյանը նշել է, որ Հայաստանը կարևորում է Իտալիայի հետ փոխշահավետ համագործակցության խորացումը։ Նա վստահեցրել է, որ Հայաստանի ղեկավարությունը պատրաստ է հնարավորինս աջակցել դեսպանին՝ Հայաստան-Իտալիա հարաբերությունների զարգացմանն ուղղված բոլոր նախաձեռնություններում։ Նախագահ Խաչատուրյանը կարևորել է նաև ապակենտրոնացված համագործակցության և խորհրդարանական մակարդակով գործակցության դերը։ Նորանշանակ դեսպանը շնորհակալություն է հայտնել ջերմ ընդունելության և բարեկամական խոսքերի համար՝ վստահեցնելով, որ իր պաշտոնավարման ընթացքում կգործադրի բոլոր ջանքերը՝ երկկողմ կապերն ամրապնդելու և ընդլայնելու ուղղությամբ։ «Մեծ ոգևորությամբ և պատասխանատվությամբ եմ ստանձնում իմ առաքելությունը Ձեր երկրում»,- նշել է դեսպանը։ Հանդիպման ընթացքում զրուցակիցները երկուստեք կարևորել են Հայաստան-Իտալիա կապերի առավել ամրապնդումն ու համակողմանի համագործակցության շարունակական զարգացումը, մասնավորապես տնտեսական, տեղեկատվական տեխնոլոգիաների և մշակութային ոլորտներում։ Նախագահը ընդգծել է, որ Հայաստանի համար Իտալիայի հետ հարաբերությունները կարևոր են ոչ միայն երկկողմ, այլև Եվրոպական կառույցների շրջանակում համագործակցության տեսանկյունից։

Բելառուսի նախագահ Ալեքսանդր Լուկաշենկոն հայտարարել է, որ ինքը՝ որպես պետության ղեկավար, պատրաստ է ներում շնորհել ընդդիմության 2020 թվականի ցույցերի մասնակիցներին, բայց նախ ժողովուրդը պետք է ների նրանց, հայտնում է «ՌԻԱ Նովոստի»-ն։ «Մենք արդեն շատ մարդկանց ենք վերադարձրել մեր հասարակություն, նրանք բոլորը մեր վերահսկողության տակ են։ Մենք պետք է կարողանանք ներել մարդկանց։ Սահմանադրությամբ ես իրավունք ունեմ ներում շնորհել, բայց նախ ժողովուրդը պետք է ների նրանց։ Եթե ​​դրական որոշում լինի, ես կստորագրեմ հրամանագիրը»,- ասել է Լուկաշենկոն։ Միաժամանակ նախագահն ընդգծել է, որ բոլորը պետք է պատասխան տան օրենքով։ Լուկաշենկոն հիշեցրել է, որ երկիրն ունի հանձնաժողով՝ քննարկելու ընդդիմադիրների դիմումները, ովքեր 2020 թվականի իրադարձություններից հետո լքել են Բելառուսը և այժմ ցանկանում են վերադառնալ հայրենիք։

Ազգային ժողովի նախագահի համար 2022 թվականի եռօրյա պատերազմը կարծես պատերազմ չէ: Կարծես Ադրբեջանը չի հարձակվել ու օկուպացրել Հայաստանի սուվերեն տարածքի 200 քկմը: Ալեն Սիմոնյանը այսօր խորհրդարանում լրագրողների հետ ճեպազրույցի ժամանակ պնդել է, թե իշխանությանը հաջողվել է կասեցնել նոր պատերազմները 44-օրյայից հետո ու համաձայնություններ ձեռք բերել Ադրբեջանի հետ:

Ինչպես ավելի վաղ տեղեկացրել էինք, կայացել է ՀՀ ԱԳ նախարար Արարատ Միրզոյանի և ՌԴ ԱԳ նախարար Սերգեյ Լավրովի ընդլայնված կազմով հանդիպումը։ Ստորև ներկայացնում ենք ՀՀ ԱԳ նախարարի հայտարարությունը ՌԴ ԱԳ նախարարի հետ համատեղ մամուլի ասուլիսին. «Հարգելի՛ Սերգեյ Վիկտորի, Հարգելի՛ գործընկերներ, Նախևառաջ կցանկանայի շնորհակալություն հայտնել նախարար Լավրովին այս այցի կազմակերպման և ավանդական հյուրընկալության համար: Պետք է նշեմ, որ այս այցի նախապատրաստական աշխատանքները տևել են շուրջ երեք ամիս, սակայն տեխնիկական պատճառներով այն մի քանի անգամ հետաձգվել է, և ահա, վերջապես, մեզ հաջողվեց հանդիպել։ Սերգեյ Վիկտորի, ուրախ կլինեմ տեսնել Ձեզ Երևանում: Նշեմ, որ այսօրվա հանդիպումն անցավ անկեղծ և կառուցողական մթնոլորտում: Քննարկված հարցերի շրջանակը բավական ընդգրկուն և բազմաշերտ էր: Մենք անդրադարձանք երկկողմ համագործակցության հարցերին և, իհարկե, քննարկեցինք Հարավային Կովկասում խաղաղության թեման։ Երկկողմ հարաբերությունների զարգացման համատեքստում ընդգծվել է բոլոր մակարդակներում քաղաքական երկխոսության ինտենսիվության պահպանման, այդ թվում՝ արտաքին գործերրի նախարարությունների գծով, ինչպես նաև տարբեր ոլորտներում փոխշահավետ համագործակցության շարունակականության կարևորությունը։ Նշել ենք հայ-ռուսական երկխոսության զարգացման դրական միտումը հումանիտար ոլորտում։ Ի թիվս այլ միջոցառումների, ինչպես Դուք նշեցիք, Սերգեյ Վիկտորի, այս տարի Ռուսաստանում նախատեսվում է Հայաստանի մշակույթի օրերի անցկացումը։ Ընդգծելով ԱԳՆ-ների միջև խորհրդակցությունների շարունակման անհրաժեշտությունը՝ մենք նաև քննարկել ենք մեդիա դաշտում ստեղծված իրավիճակը և առավել բարենպաստ տեղեկատվական մթնոլորտի ձևավորման ուղիները։ Մեր համագործակցության կարևոր բաղադրիչներից մեկը տնտեսությունն է։ Այստեղ թվերն ինքնին խոսուն են: Ինչպես գիտեք, դեկտեմբերին տեղի ունեցավ տնտեսական համագործակցության հարցերով միջկառավարական հանձնաժողովի նիստը։ Հայաստանի համար առևտրատնտեսական համագործակցությունը, այդ թվում՝ ԵԱՏՄ շրջանակներում, շարունակում է մնալ տնտեսական աճի և արտաքին առևտրային ներուժի իրացման վրա ազդեցություն ունեցող կարևոր գործոններից մեկը։ Այս համատեքստում, օրինակ, կցանկանայի առանձնանշել անցյալ տարի Հայաստանի Հանրապետության նախագահության ընթացքում Իրանի Իսլամական Հանրապետությանը ԵԱՏՄ-ում դիտորդի կարգավիճակի տրամադրումը։ Հարգելի՛ գործընկերներ, Հայաստանը, գտնվելով յուրահատուկ խաչմերուկում, կարող է նշանակալի ներդրում ունենալ միջտարածաշրջանային հաղորդակցությունների զարգացման գործում՝ նպաստելով տարածաշրջանի լոգիստիկ գրավչության բարձրացմանը։ Հենց այս նպատակին է ուղղված «Խաղաղության խաչմերուկ» ծրագրի իրականացումը. ծրագիր, որը մշակվել և ներկայացվել է Հայաստանի Հանրապետության կառավարության կողմից՝ հիմնված բոլոր պետությունների ինքնիշխանության և իրավազորության հարգման, ինչպես նաև հավասարության և փոխադարձության սկզբունքների վրա։ Ուրախ եմ ընդգծել, որ այս ծրագիրը դրական արձագանք է ստացել մի շարք միջազգային կազմակերպությունների և երկրների, այդ թվում՝ Ռուսաստանի կողմից։ Նախարար Լավրովի հետ մենք անդրադարձել ենք նաև Հարավային Կովկասում խաղաղության և կայունության հարցերին: Ցանկանում եմ ընդգծել, որ չնայած այս ճանապարհին առկա բոլոր դժվարություններին և մարտահրավերներին, Հայաստանը շարունակում է ջանքեր գործադրել՝ հասնելու երկարաժամկետ և կայուն խաղաղության, որը, մեր համոզմամբ, համապատասխանում է մեր տարածաշրջանի բոլոր երկրների շահերին։ Հարգելի՛ գործընկերներ, Վերջում ցանկանում եմ ևս մեկ անգամ շնորհակալություն հայտնել Ռուսաստանի Դաշնության արտաքին գործերի նախարար Սերգեյ Լավրովին կարծիքների հանգամանալից փոխանակման համար՝ հույս հայտնելով, որ այսօր տեղի ունեցած քննարկումները կնպաստեն փոխըմբռնման ամրապնդմանը և հիմնական առաջնահերթությունների շուրջ փոխշահավետ համագործակցության շարունակմանը: Շնորհակալություն»։

Հայլուր 20։30 Դատում են դահիճները. ի՞նչ է հայտնի Բաքվի ստորացուցիչ դատավարությունից

Բրազիլացի ֆուտբոլիստ Նեյմարը նախատեսում է խզել պայմանագիրը սաուդական «Ալ-Հիլալի» հետ և ստանալ 65 միլիոն դոլար, Armsport-ի փոխանցմամբ՝ հաղորդում է Globo-ն։ Նեյմարի պայմանագիրը ակումբի հետ նախատեսված է մինչև 2025 թվականի ամառը։ Դեկտեմբերին Նեյմարը վերսկսել է մարզումները հերթական վնասվածքից հետո։ Նոյեմբերի սկզբին հայտնի դարձավ, որ ֆուտբոլիստը շարքից դուրս է եկել մինչև վեց շաբաթ՝ ծնկի ջլի պատռվածքի պատճառով։ Դրան նախորդող տարում նա ապաքինվում էր ծնկի խաչաձև կապանի և մենիսկի վնասվածքներից։ Աղբյուրի տեղեկությունների համաձայն՝ Նեյմարը արդեն պայմանավորվել է կես տարվա պայմանագրի շուրջ իր հարազատ «Սանթոսի» հետ։ Գործարքը ավարտելու համար նրան անհրաժեշտ է խզել պայմանագիրը սաուդական թիմի հետ և ստանալ 65 միլիոն դոլար։ Նեյմարը 32 տարեկան է։ Նա հանդես է եկել «Սանթոսի» հիմնական կազմում 2009-2013 թվականներին՝ բրազիլական ակումբի հետ նվաճելով Բրազիլիայի Գավաթը, Լիբերտադորեսի Գավաթը և Հարավային Ամերիկայի Ռեկոպան։ Բացի այդ, նա խաղացել է իսպանական «Բարսելոնայում» և ֆրանսիական ՊՍԺ-ում։

Քննվող քրեական վարույթի շրջանակներում որոնվում են տեսագրության մեջ պատկերված անձինք:

«Իրազեկ և պաշտպաված սպառող» ՀԿ նախագահ Բաբկեն Պիպոյանը, արձագանքելով Նիկոլ Փաշինյանի՝ այսօր տարածած տեսանյութում թոշակառուների վերաբերյալ զեղչերին, գրում է. «Թոշակառուի համար հանրային տրանսպորտի ամենաէժան քարտը, որը կարող է լինել, բազմակի օգտագործման 10 ուղևորություն ներառող քարտն է, որի գինը թոշակառուի համար նախատեսված զեղչով կկազմի 1540 դրամ կամ որ նույնն է, եթե 10-ից էլ օգտվի, մեկ ուղևորության համար՝ 154 դրամ: Եթե անգամ ու թոշակառուն օգտվի կենսաթոշակառուի համար նախատեսված քեշբեքից, ապա կստանա ևս 10% վերադարձ, այսինքն գումարը կկազմի՝ 154-15.4=138.6 դրամ: Որքան էլ փորձեն մանիպուլացնել, որքան էլ կեղծ թվերով ու տեքստերով փորձեն այլ իրականության իմիտացիա ստեղծել, 50 դրամ ավելի պակաս վճարելու համար ժամերով կանգառում սպասող թոշակառուն չի կարող չնկատել, որ անկախ բոլոր զեղչերից, տրանսպորտն էականորեն թանկանում է»։

Թունոտ վեճերից հետո Հայաստանն ու Ռուսաստանը որոշել են հաշտվե՞լ: Մոսկվայում վերջապես կայացել է Միրզոյան-Լավրով՝ երեք ամիս ձգձգված հանդիպումը: Արտգործնախարարների այս հանդիպումը, հավանաբար, հոկտեմբերին է ձեռք բերվել Կազանում: Ռուսական դիվանագիտության ղեկավարի ձևակերպմամբ՝ «Մոսկվայի և Երևանի շփման դադարը հաղթահարված է»:

3 միլիոն վարչապետ դարձավ 3 միլիոն տուգանքի մատերիալ. եկամտի հայտարարագրումը՝ բյուջեն լցնելու միջո՞ց

Իսրայելի պաշտպանության բանակի գլխավոր շտաբի պետ Գերցի Խալևին հայտարարել է, որ հրաժարական կտա 2025 թվականի մարտի 6-ին։ Որպես իր հրաժարականի պատճառ՝ նա նշում է 2023 թվականի հոկտեմբերի 7-ին Իսրայելի պաշտպանության բանակի ձախողումը։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։ «Այսօր ես տեղեկացրեցի պաշտպանության նախարարին, որ ճանաչում եմ Իսրայելի պաշտպանության բանակի ձախողման համար իմ պատասխանատվությունը, սակայն հաշվի առնելով պատանդների ազատագրման գործարքի իրականացումը՝ խնդրել եմ, որ իմ պաշտոնավարման ժամկետը ավարտվի 2025 թվականի մարտի 6-ին»,- հայտնել է Խալևին։ Իր հայտարարության մեջ Իսրայելի պաշտպանության բանակի գլխավոր շտաբի պետը պարզաբանել է, որ մինչ իր հրաժարականը նախատեսում է ուժեղացնել բանակի պատրաստվածությունը անվտանգության խնդիրների համար, որից հետո որակապես և մանրակրկիտ կերպով հրամանատարությունը կփոխանցի իր իրավահաջորդին։ Խալևին հրաժարականի դիմումի ևս մեկ օրինակն էլ ուղարկել Իսրայելի վարչապետ Բենիամին Նեթանյահուին։