Նորվեգիան զենք կուղարկի Ուկրաինային

Նորվեգիան զենք կուղարկի Ուկրաինային՝ դառնալով եվրոպական վերջին երկիրը, որը դա արել է ռուսական ներխուժումից հետո։

Այս որոշումը չեղարկում է պատերազմի մեջ կամ զինված հակամարտության սպառնալիքի տակ գտնվող և ՆԱՏՕ-ի անդամ չհանդիսացող երկրներին զենք մատակարարելուց հրաժարվելու Նորվեգիայի քաղաքականությունը, որը 1950-ականներից է սկսվել, գրում է Reuters-ը։

Նորվեգիան M72 հակատանկային մինչև 2000 միջոց կտրամադրի, ասվում է կառավարության հայտարարության մեջ։

«Նորվեգիան խիստ քաղաքականություն է վարում ռազմական տեխնիկայի արտահանման հարցում, սակայն Ուկրաինան այժմ բախվում է արտակարգ հանգամանքների»,- ասել է վարչապետ Յոնաս Գար Շտյորեն։

Կիրակի Նորվեգիան հայտարարել է, որ դուրս կբերի իր սուվերեն հիմնադրամը Ռուսաստանից և խոստացել է սաղավարտներ, զրահաբաճկոններ ու այլ սարքավորումներ ուղարկել Ուկրաինա: