ԵՄ անդամակցությունը երկարատև և բարդ գործընթաց է, որն Ուկրաինայի պարագայում ժամանակավրեպ է. քաղաքագետ

ԵՄ բարձր մակարդակի խորհրդակցությունների ժամանակ բազմիցս հայտարարվել է, որ Ուկրաինան պետք է անդամակցի կառույցին. այժմ այդ հայտարարություններին հաջորդել է Ուկրաինայի նախագահ Զելենսկու խնդրանքը՝ իր երկրին ընդունել ԵՄ ընտանիք։ Սակայն քիչ հավանական է, որ այս պահին կառույցը նման քայլի գնա, Aysor.am-ի թղթակցի հետ զրույցում ասաց քաղաքագետ Արթուր Ղազարանը։

Նրա խոսքով՝ ժամանակին, երբ դեռ Ուկրաինայում պատերազմ չէր սկսվել, և չկար էսկալացիա, մոտ 14 տարի ԵՄ-ն դիտարկում էր այդ երկրի, ինչպես նաև Վրաստանի անդամակցության հարցը, սակայն այս պահի դրությամբ՝ առանց էական առաջընթացի։

«Եթե այդ տարիների ընթացքում անդամակցությունը տեղի չի ունեցել, այս պատերազմական-էսկալացիոն վիճակում հարցն իր հետ բազմաթիվ խնդիրներ է առաջ բերելու։ Ուստի կարծում եմ՝ Ուկրաինայի՝ ԵՄ անդամակցությունն այս պահին ժամանակավրեպ հարց է, և Զելենսկու դիմում-խնդրանքն ավելի շուտ անզորության հետևանք է։

Մենք գիտենք, թե որքան բարդ է ԵՄ անդամության պրոցեսը նույնիսկ խաղաղ պայմաններում, ուր մնաց՝ պատերազմական իրավիճակում, գումարած Ղրիմի խնդիրը։ Ինչպե՞ս կարող է Ուկրաինա ԵՄ-ին անդամակցել վերացական սահմաններով։

Անդամակցությունը երկարատև և բարդ գործընթաց է, որը, չեմ կարծում, որ այժմ իրագործելի է»,- ասաց քաղաքագետը։

Ուկրաինայի նախագահ Վլադիմիր Զելենսկին տեսաուղերձում հայտարարել է, որ Ուկրաինան դիմել է Եվրամիությանը՝ ԵՄ-ին անհապաղ միանալու խնդրանքով։

«Մենք դիմում ենք Եվրամիությանը՝ նոր հատուկ ընթացակարգով Ուկրաինայի հրատապ միանալու խնդրանքով», - ասել է նա։