Փաշինյանը մշտապես ցույց է տվել, որ ինքն ավելի կարևոր է, քան իշխանության մյուս թևերը, այդ թվում՝ ՀՀ նախագահը․ Սեյրան Օհանյան

«Հայաստան» խմբակցության ղեկավար Սեյրան Օհանյանը խորհրդարանում լրագրողների հետ կայացած հանդիպման ժամանակ անդրադարձել է ՀՀ նախագահի ընտրություններին չմասնակցելու վերաբերյալ հարցին։

«Հարցը մենք մանրակրկիտ քննարկել ենք մեր դաշինքի խորհրդում, նաև մեր խմբակցությունում, և մեր տեսակետը նույնն է, որ չենք մասնակցելու ՀՀ նախագահի ընտրություններին։ Հիմնավորումները մի քանիսն են, նախևառաջ՝ ՀՀ նախագահը պետք է վերկուսակցական անձնավորություն լինի, իսկ այսօրվա նախագահի թեկնածու Վահագն Խաչատուրյանը հանդիսանում է կուսակցության անդամ»,- նշել է ընդդիմադիր գործիչը։

Նրա խոսքով, այսօրվա կառավարության ղեկավարը կառավարության նիստում նշանակեց ՀՀ նախագահին։ 

«2020 թվականի մայիսի 28-ին, երբ Սարդարապատում ծաղկեդրման արարողություն էր տեղի ունենում, ՀՀ նախագահը սպասում էր, թե ինչպես վերջում աստիճաններով բարձրանա Նիկոլ Փաշինյանը, այնինչ վերջում պետք է բարձրանար ՀՀ նախագահը»,- նշել է Սեյրան Օհանյանը։

Պատգամավորի խոսքով, Նիկոլ Փաշինյանը մշտապես ցուցադրական գործողություններով ցույց է տվել, որ ինքն ավելի կարևոր է, քան իշխանության մյուս թևերը, այդ թվում՝ ՀՀ նախագահը։ 

«Քաղաքական թիմի անդամ նշանակված անձնավորությունը չի կարողանալու պահպանել անաչառություն»,- հավելել է Սեյրան Օհանյանը։