ԱՀԿ-ն աշխարհի երկրներին կոչ է արել չշտապել կորոնավիրուսի դեմ հաղթանակի մասին հայտարարել

Առողջապահության համաշխարհային կազմակերպության ղեկավարը նախազգուշացրել է, որ երկրներին դեռ շատ վաղ է հայտարարել COVID-19-ի դեմ հաղթանակի մասին կամ հրաժարվել վարակի փոխանցումը դադարեցնելու փորձերից։ Այս մասին հայտնում են ամերիկյան լրատվամիջոցները։

«Ցանկացած երկրի համար վաղաժամ է կամ հանձնվել, կամ հայտարարել հաղթանակի մասին»,- լրագրողներին ասել է ԱՀԿ ղեկավար Թեդրոս Ադհանոմ Գեբրեեսուսը: «Այս վիրուսը վտանգավոր է, և այն շարունակում է զարգանալ մեր աչքի առաջ»:

Նրա մեկնաբանությունները հնչել են այն ժամանակ, երբ Դանիան դարձել է ԵՄ առաջին երկիրը, որը վերացրել է COVID-ի հետ կապված բոլոր ներքին սահմանափակումները, չնայած ավելի մեղմ «օմիկրոն» տարբերակի դեպքերի ռեկորդային թվին:

«Մենք անհանգստացած ենք, որ որոշ երկրներում տարածվել է այն կարծիքը, թե պատվաստանյութերի, ինչպես նաև «օմիկրոնի» բարձր փոխանցելիության և ցածր ծանրության պատճառով փոխանցման կանխարգելումն այլևս հնարավոր չէ և այլևս անհրաժեշտ չէ»,- ասել է Թեդրոսն՝ ընդգծելով, որ «COVID-19-ի փոխանցման դեպքերի ավելի մեծ թիվը նշանակում է ավելի շատ մահեր»։

ՄԱԿ-ի առողջապահական գործակալության ղեկավարը նշել է, որ 10 շաբաթ առաջ հարավային Աֆրիկայում օմիկրոնի հայտնաբերումից հետո ԱՀԿ-ում գրանցվել է մոտ 90 միլիոն դեպք՝ ավելի շատ, քան ամբողջ 2020 թվականի ընթացքում:

Ու թեև հայտնի է, որ COVID-ի նոր տարբերակը ավելի մեղմ է, նա նշել է, որ «մենք այժմ սկսում ենք տեսնել մահացությունների շատ տագնապալի աճ՝ աշխարհի տարածաշրջանների մեծ մասում»: Նրա խոսքով՝ շատ կարևոր է շարունակել վիրուսի փոխանցումը դադարեցնելու ջանքերը։

«Մենք ոչ մի երկրի կոչ չենք անում վերադառնալ, այսպես կոչված, մեկուսացման»,- ասել է Գեբրեեսուսը՝ հավելելով, որ, այնուամենայնիվ, «մենք կոչ ենք անում երկրներին պաշտպանել իրենց ժողովրդին՝ օգտագործելով բոլոր գործիքները, այլ ոչ թե միայն պատվաստանյութերը»:

ԱՀԿ-ի ղեկավարն ընդգծել է առաջացող տարբերակներին, ներառյալ «օմիկրոնի» BA.2 ենթատեսակին հետևելու անհրաժեշտությունը: «Այս վիրուսը կշարունակի զարգանալ, ուստի մենք կոչ ենք անում երկրներին շարունակել թեստավորումները, հսկողությունը և հաջորդականությունը»,- ասել է նա:

COVID-19-ի հարցով ԱՀԿ-ի տեխնիկական ղեկավար Մարիա Վան Կերխովեի խոսքով՝ շատ երկրներ դեռևս չեն հասել «օմիկրոնի» իրենց գագաթնակետին, և դրա տարածումը զսպելու միջոցները պետք է աստիճանաբար մեղմացվեն:

ԱՀԿ-ի արտակարգ իրավիճակների հարցերով ղեկավար Մայք Ռայանը կոչ է արել երկրներին համավարակից դուրս գալու իրենց սեփական ուղին գծել, այլ ոչ թե կուրորեն հետևել մյուսներին: «Եթե դուք արագ եք բացում դռները, ավելի լավ է դրանք բավականին արագ փակելու հնարավորություն ունենալ»,- ասել է նա: