Իշխանությունը ողջ պետական համակարգը բաժանել է «ցանկալիների» ու «ոչ ցանկալիների». Արթուր Վանեցյան

Հայաստանում գործող իշխանությունը բռնաբարում է իրավական դաշտն ու արդարադատությունը։ Այս մասին լրագրողների հետ զրույցում ասել է ԱԱԾ նախկին տնօրեն, «Պատիվ ունեմ» խմբակցության ղեկավար Արթուր Վանեցյանը, որն, ի աջակցություն դատավոր Բորիս Բախշիյանի, եկել է դատարանի բակ:

Նա նշել է, որ պետք է այս հարցի շուրջ հասարակությունն ընդվզի ու հստակ գնահատական տա ստեղծված իրավիճակին:

«Մենք այստեղ չենք եկել պաշտպանելու կոնկրետ մի դատավորի, մենք եկել ենք պաշտպանելու արդարադատությունը, ուստի, մեր բոլոր  քայլերը պետք է ուղղված լինեն նրան, որ թույլ  չտանք Հայաստանը վերածվի բռնապետության, իսկ մենք տեսնում ենք, որ ՀՀ իշխանությունները հստակ քայլերով մեր երկիրը տանում են դեպի բռնապետություն»,- ասել է«Պատիվ ունեմ» խմբակցության ղեկավարը։

Արթուր Վանեցյանի խոսքով՝  իշխանությունը ողջ պետական համակարգը բաժանել է «ցանկալիների» ու «ոչ ցանկալիների»:

«Պատիվ ունեմ» խմբակցության ղեկավարն ընդգծել է, որ Հայաստանն այսօր գտնվում է  ծայրահեղ ծանր վիճակում. կան չլուծված անվտանգային բազմաթիվ խնդիրներ, լուծված չէ գերիների վերադարձի հարցը, բայց իշխանության քայլերը միայն սեփական պաշտոնավարումը երկարաձգելուն են ուղղված։