Մարիուպոլում անհետ կորած ևս 3 հայ է գտնվել․ 100–ին դեռ փնտրում են․ Տեր Նարեկ քահանա Ամիրյան

Ուկրաինայի Դոնեցկի մարզի հայ համայնքում դիմավորում են շրջափակված Մարիուպոլից հումանիտար միջանցքներով դեպի ՌԴ՝ Նովոազովսկ տեղափոխվող հայերին։

Դոնեցկի և Լուգանսկի տարածաշրջանի հոգևոր հովիվ Տեր Նարեկ քահանա Ամիրյանը «Ռադոլուր»-ի հետ զրույցում պատմել է՝ հաջողվել է գտնել Մարիուպոլում ապրող մի քանի հայի, որոնց հետ պատերազմի սկզբից հարազատները կապը կորցրել էին։

Տեր Նարեկ քահանան ասել է՝ տեղի հայ համայնքի հետ նաև հումանիտար օգնություն են հավաքում և փոխանցում փախստական ընտանիքներին։

«Կազմակերպել ենք հումանիտար օգնություն հիմնականում Մարիուպոլից տեղահանվածների համար։ Նրանք ապաստանել են տարբեր շտաբերում, ես ամեն օր այցելում եմ, փոխանցում հումանիտար օգնությունը և փնտրում հայերին։

Մեր ձեռքի տակ շուրջ 100 հոգու տվյալներով անհետ կորածների ցուցակ կա, որոնց հարազատները փնտրում են։ Այդ ցուցակը փոխանցել ենք տեղում աշխատող բժիշկներին և փրկարարներին։ Արդյունքում մի քանի օր առաջ հաջողվեց 3 հայի գտնել․ նրանցից մեկը թեթև այրվածքներ ունի, մյուսը՝ ծանր բեկորային վնասվածքներ, մի քանի օր այստեղ կբուժվի և կտեղափոխվի Դոնի Ռոստով։ Իհարկե, շատ ուրախալի է, որ կարողանում ենք ողջ գտնել հայերին, բայց ցավալի է նաև որ դեռ շատերին գտնել չենք կարողանում»,– պատմել է Դոնեցկի և Լուգանսկի տարածաշրջանի հոգևոր հովիվը։

Տարհանվածները Դոնեցկում երկար չեն մնում․ ստանում են անհրաժեշտ առաջին բժշկական օգնությունը և շարունակում ճանապարհը դեպի Ռուսաստան։

Տեր Նարեկ քահանա Ամիրյանը նշել է՝ Դոնեցկի մարզում կրակոցները շարունակվում են, վիճակն անփոփոխ է։ Նրա խոսքով՝ մարդիկ անհանգիստ են, զգուշավորություն ու վախ կա։