Թրամփը խելագար է անվանել իր նախկին օգնական Բոլթոնին

ԱՄՆ նախագահ Դոնալդ Թրամփը ակնկալում է, որ դատարանը խիստ պատիժ կսահմանի իր ազգային անվտանգության հարցերով նախկին օգնական Ջոն Բոլթոնի նկատմամբ, որն ավելի վաղ ընդունել է իր մեղքը գաղտնի տվյալների հետ ոչ պատշաճ վարվելու համար։ Այս մասին ամերիկացի առաջնորդը հայտարարել է ուրբաթ օրը՝ Truth Social-ում։

«Հուսով եմ՝ նրա հետ խիստ կվարվեն», - գրել է նա։ «Ջոն Բոլթոնը՝ ԱՄՆ-ի չափազանց հիմար, անհավասարակշիռ, անկարող նախկին ներկայացուցիչը, նոր է ընդունել իր մեղքը։ Նա սարսափելի մարդ է, խելագար, որը ցանկանում էր միայն խնդիրներ ստեղծել և պատերազմներ հրահրել, նա առանց որևէ անհրաժեշտության մահ և ավերածություն էր սփռում, որտեղ էլ որ հայտնվում էր», - ընդգծել է ԱՄՆ նախագահը։

Ուրբաթ օրը Վաշինգտոնի մերձակայքում գտնվող դատարանում Բոլթոնն իրեն մեղավոր է ճանաչել պետական գաղտնիք կազմող տեղեկությունների հետ ոչ պատշաճ վարվելու մեջ։ Ավելի վաղ նա գործարք էր կնքել հետաքննության հետ, որի շրջանակներում համաձայնել էր առաջադրված մեղադրանքներից մեկին, ինչպես նաև ավելի քան 2 միլիոն դոլար տուգանք վճարելուն։ Բոլթոնի դատավճիռը կհրապարակվի հոկտեմբերի 28-ին։ Նախագահի նախկին օգնականին կարող է սպառնալ մինչև հինգ տարվա ազատազրկում։

Ինչպես 2025 թվականի սեպտեմբերին հայտնել էր Politico թերթը, ԱՄՆ Հետաքննությունների դաշնային բյուրոյի աշխատակիցները Բոլթոնի խուզարկության ժամանակ գաղտնի փաստաթղթեր էին հայտնաբերել։ Խոսքը զանգվածային ոչնչացման զենքի, ՄԱԿ-ում ԱՄՆ մշտական ներկայացուցչության և «ամերիկյան կառավարության ռազմավարական հաղորդակցությունների» վերաբերյալ նյութերի մասին է։ Դրանք հայտնաբերվել են Վաշինգտոնի կենտրոնում գտնվող Բոլթոնի գրասենյակում։

Բոլթոնը վաշինգտոնյան ամենաարմատական տրամադրված «բազեներից» մեկի համբավ ունի։ Նա, օրինակ, բազմիցս կոչ է արել ռազմական ուժ կիրառել Իրանի դեմ։ 2018-2019 թվականներին զբաղեցրել է նախագահի ազգային անվտանգության հարցերով օգնականի պաշտոնը։ Այն ժամանակ պաշտոնավարող Թրամփը նրան աշխատանքից ազատել էր իրենց միջև սուր հակասություններ առաջանալուց հետո։ Անցյալում Բոլթոնը եղել է նաև ԱՄՆ պետքարտուղարի՝ սպառազինությունների վերահսկման և միջազգային անվտանգության հարցերով տեղակալը և ՄԱԿ-ում մշտական ներկայացուցիչը։