Դատախազն ու «բոչկեքը»՝ դատարկ կամ վառոդով լի․ «Հրապարակ»

«Hraparak.am»-ը գրում է․

«Գլխավոր դատախազ Արթուր Դավթյանը, որը տևական ժամանակ չէր երևացել և մի քանի ամսից հրաժեշտ է տալու պաշտոնին` պաշտոնավարման ժամկետի ավարտի կապակցությամբ, նկատելի է նաև, որ որոշակիորեն կորցրել է իշխանական վերնախավի վստահությունը:

Ճիշտ է` նա 2018-ից հետո հսկայական ծառայություններ է մատուցել Նիկոլ Փաշինյանին ու նրա թիմին, կատարել է բոլոր հրահանգները, բայց նրանց, միևնույն է` դա չի բավարարում: Նրանք Սասուն Խաչատրյանի հավատարմությունն են պահանջում, Կարեն Անդրեասյանի կույր սերը, Վահագն Ալեքսանյանի անձնազոհությունը և այլն:

Մինչդեռ գլխավոր դատախազը հակասությունների մեջ է մտել Արգիշտի Քյարամյանի Քննչական կոմիտեի և Սասուն Խաչատրյանի Հակակոռուպցիոն կոմիտեի հետ: Այս կառույցները սկսել են հրապարակային «բոչկա գլորել» միմյանց վրա:

Դա երևաց Վովա Գասպարյանի գործով, ապա՝ Հովիկ Աբրահամյանի, որին Սասուն Խաչատրյանի հիմնարկն աջակցել էր, որ իր միլիոնանոց դղյակն արագ վերաձևակերպի և փրկի պետականացումից:

Երեկ Արթուր Դավթյանը, իհարկե, ԱԺ-ում կրծքով պաշտպանում էր Նիկոլ Փաշինյանին՝ նրա ելույթներում որևէ հանցակազմ պարունակող տարր կամ խնդրահարույց բան չհայտնաբերելով, չնայած զոհվածների ծնողները դիմել են դատախազություն՝ պահանջելով քրգործ հարուցել ԱԺ-ում ելույթի առիթով, որտեղ նա ասում է, որ կարող էր կանխել պատերազմը, բայց «արդունքում կունենայինք նույն իրավիճակը, իհարկե՝ առանց զոհերի»։ Այստեղ դատախազ Դավթյանը որևէ հանցակազմ չի տեսնում և փորձում էր դա հիմնավորել մասնագիտորեն։

Փոխարենը նա փիլիսոփայորեն փորձեց մեկնաբանել մեր այն դիտարկումը, թե քննչական և հակակոռուպցիոն կոմիտեներն իր դեմ «բոչկա են գլորում»։

«Սովորաբար, գլորում են վերևից ներքև, իսկ դատախազությունը վերևում է, հետևաբար, «բոչկեքը» վերևչեն կարող բարձրանալ»,- ասել է Դավթյանը՝ փաստացի շեշտելով, որ Սասուն Խաչատրյանն ու Արգիշտի Քյարամյանն ավելի ցածր կարգավիճակ ունեն, քան ինքը։

Արթուր Դավթյանին հիշեցրինք նաև իր նախկին կոլեգաների՝ նախկին դատախազներ Աղվան Հովսեփյանի և Գևորգ Կոստանյանի նկատմամբ իր հարուցած քրեական հետապնդումների մասին, որոնց արդյունքում Հովսեփյանն արդեն քանի ամիս կալանքի տակ է, իսկ Կոստանյանը՝ հետախուզման մեջ, չնայած խնդրել էր հետախուզումը վերացնել` պատրաստակամություն հայտնելով գալ և մանրակրկիտ ցուցմունք տալ Մարտի 1-ի գործով, որով իրեն մեղադրանք են առաջադրել։

Հիշեցրինք նաև Վանաձորի քաղաքապետ Մամիկոն Ասլանյանին անհասկանալի քրգործով կալանքի տակ պահելու, նաև Նարեկ Մանթաշյանին «դրոշ տեղադրելու համար» ազատությունից զրկելու մասին։ Դավթյանը փորձեց իրավաբանորեն արդարացնել՝ բնականաբար բացառելով, որ այդ ամենում քաղաքական մոտիվացիա կա՝ ուղղորդված իշխանությունների կողմից։

Նրան փորձեցինք մասնագիտականից բերել բարոյական ու մարդկային դաշտ՝ նկատելով, որ այսօր ինքն է իր նախկին կոլեգաների դեմ քրեական հետապնդում իականացնում, մեկին կարողանում է նստեցնել՝ Աղվան Հովսեփյանին, մյուսին՝ Գևորգ Կոստանյանին, թեև չի կարողանում կալանավորել տալ, բայց հետապնդում է, մտավախություն չունի՞, որ իրենից հետո եկող դատախազն էլ իր հետ նման կերպ կվարվի, և ինքն էլ նույն ճակատագրին կարժանանա, ինչ իր նախկին կոլեգա դատախազներն այսօր։

Դավթյանը հեգնանք տեսավ մեր արձանագրած փաստի մեջ, որ չի կարողանում կալանավորել Կոստանյանին, փոխարենը՝ հետը միջոցառման է մասնակցում, և արձագանքեց․

«Ես ոչ միայն մտավախություն չունեմ, այլև կուզեմ, որ իմ վերաբերյալ, եթե էսպիսի հարցեր քննարկվեն, դատախազական հսկողություն իրականացնող անձը մտածի ու վարվի ինձ նման»»։