Մամուլում արդեն տեղեկություններ էին շրջանառվում, որ գիշերը Սյունիքում ձերբակալություններ են սպասվում. Էդգար Ղազարյան

Մամուլում արդեն տեղեկություններ էին շրջանառվում, որ գիշերը Սյունիքում ձերբակալություններ են սպասվում։ Այս մասին Facebook-ի իր էջում գրել է ՍԴ աշխատակազմի նախկին ղեկավար Էդգար Ղազարյանը:

Նա, մասնավորապես, նշել է. «Հուսով եմ ոստիկանությունում և հատուկ ծառայություններում կգտնվեն մարդիկ, որոնք սթափ կգնահատեն իրավիճակը, կհասկանան, որ ապրիլի 21-ին Սյունիքում տեղի ունեցածն ակնհայտ սադրանք էր Նիկոլ Փաշինյանի կողմից։

Առավել քան վստահ եմ, որ հատուկ ծառայությունները նրան նախապես զեկուցել են տեղում առկա իրավիճակի և հասարակական տրամադրությունների մասին՝ կանխելու համար նրա այցը՝ իր իսկ շահերից և անվտանգությունից ելնելով։ Ուժային կառույցների կամքին հակադրվելով ու սադրանքի գնալով, նա հրահրել է լարվածությունը՝ իր մեղքով անվտանգային լուրջ սպառնալիքների առջև կանգնած սյունեցիների շրջանում։

ԱԱԾ-ի նախկին տնօրենը Իջևանում հանրային դժգոհությունները ճնշելու կապակցությամբ ասել էր․ «Նիկոլ Փաշինյանը հերթական հիստերիկ նոպայի մեջ զանգեց ինձ և ոստիկանապետ Վալերի Օսիպյանին՝ պահանջելով ջարդել ցուցարարներին, Փաշինյանն ասաց՝ «ես ուզում եմ տեսնել արյան գետեր»։

Իրենց ազնիվ զգացմունքներով, սեփական արժանապատվությունը պաշտպանելու համար քաղաքացիական կամք դրսևորած մարդկանց հանդեպ ուժային ցանկացած գործողություն հղի է ողջ հանրապետությունում լարվածության աճի վտանգներով, որոնց դիմակայելու իրավապահների ներուժը հնարավոր է բավարար չլինի։

Հուսով եմ այդքանը հասկանում են ոստիկանությունում և չեն ենթարկվի Փաշինյանի՝ այս անգամ արդեն իրենց հանդեպ հրահրվող սադրանքներին և սթափ կգնահատեն ստեղծված իրավիճակը և հնարավոր զարգացումների ռիսկերը»:

Նշենք, որ Նիկոլ Փաշինյանն այսօր՝ ապրիլի 21-ին Ագարակ եւ Մեղրի քաղաքներից հետո այցելել է մարզկենտրոն Կապան: Այստեղ քաղաքի բնակիչները հավաքվել են եւ իրենց բողոքը հայտնել Փաշինյանի այցի կապակցությամբ:

Նրանք հայհոյանքներ էին հնչեցնում վարչապետի հասցեին ու վանկարկում. «Նիկոլ դավաճան», «Նիկոլ հողատու»:

Ավելի վաղ հայտնել էինք, որ ապրիլի 20-ին վարչապետ Նիկոլ Փաշինյանը խիստ գաղտնի պայմաններում ուղեւորվել է Սյունիքի մարզ։ Նրա այցի մասին տեղեկությունը խիստ գաղտնի է պահվել, ուժայիններն այդ մասին իմացել են վերջին պահին, նույնիսկ ճանապարհային ոստիկանությանն ընդամենը կես ժամ առաջ են տեղեկացրել, որ պետք է ուղեկցեն վարչապետին։