Թրամփի եկամուտներն աննախադեպ են. 2025 թվականին նախագահը վաստակել է ավելի քան 2,2 մլրդ դոլար․ WP

ԱՄՆ նախագահ Դոնալդ Թրամփի կարողության աճը 2025 թվականին աննախադեպ է ամերիկյան առաջնորդների համար։ Ինչպես հայտնում է ՏԱՍՍ-ը, նման գնահատականներ է ներկայացրել The Washington Post (WP) թերթը։

Ինչպես նշվում է հրապարակման մեջ, ԱՄՆ նախորդ նախագահներից ոչ մեկը պաշտոնավարման ընթացքում այնպիսի եկամուտներ չի ստացել, ինչպիսիք, ըստ նախագահ Դոնալդ Թրամփի այս շաբաթ հայտնած տվյալների, ստացել է ինքը։ «Ըստ նախագահի վերջին ֆինանսական հայտարարագրի՝ անցյալ տարի նրա եկամուտները հասել են ավելի քան 2,2 միլիարդ դոլարի, ինչին նպաստել են կրիպտոարժույթում և դրա հետ կապված նախագծերում կատարած ներդրումները», - ընդգծում է պարբերականը։

Թրամփի ֆինանսական հայտարարագիրը հրապարակվել է հունիսի 30-ին՝ Կառավարական էթիկայի վարչության կողմից։ ԱՄՆ նախագահը 2025 թվականին ստացել է մոտ 2,2 միլիարդ դոլարի եկամուտ, այդ թվում՝ ավելի քան 1 միլիարդ դոլար՝ կրիպտոարժույթի հետ կապված գործառնություններից։ Մասնավորապես, նա մոտ 500 միլիոն դոլար է վաստակել World Liberty Financial ընկերության կողմից կրիպտոարժույթի վաճառքի արդյունքում։ Այդ ընկերությունում ղեկավար պաշտոններ են զբաղեցնում նրա որդիները՝ Էրիկ Թրամփը և Դոնալդ Թրամփ-կրտսերը։ Վաշինգտոնի վարչակազմի ղեկավարը նաև մոտ 600 միլիոն դոլար է ստացել որպես մասհանումներ $TRUMP թվային արժույթի վաճառքից։

Ամերիկացի առաջնորդը 2025 թվականի հայտարարագրում նշել է, որ իր կարողությունը գերազանցում է 2,4 միլիարդ դոլարը։ Սակայն, ինչպես ընդգծում է պարբերականը, նրան պատկանող ակտիվները գրեթե հաստատ ավելի մեծ արժեք ունեն՝ հաշվի առնելով ֆինանսական հաշվետվությունների կազմման կանոնները։ Forbes ամսագրի գնահատմամբ՝ 2026 թվականի մարտին Թրամփի ակտիվների ընդհանուր արժեքը հասել է մոտ 6,5 միլիարդ դոլարի։

Թերթի լրագրողների կողմից հարցված փորձագետները նշել են, որ ԱՄՆ նախագահի՝ կրիպտոարժույթների հետ կապված նախագծերից ստացված եկամուտները կարող են վկայել շահերի հնարավոր բախման մասին։ Նրանց խոսքով՝ Վաշինգտոնի վարչակազմն ակտիվորեն զբաղվում է թվային արժույթների ոլորտի կարգավորմամբ։

Ըստ այն տեղեկությունների, որոնք Թրամփը նախկինում նշել էր ֆինանսական հայտարարագրերում, 2019 թվականին նա ստացել էր առնվազն 440 միլիոն դոլար, իսկ 2024 թվականին՝ նախագահի պաշտոնում երկրորդ ժամկետի մեկնարկից առաջ, վաստակել էր մոտ 600 միլիոն դոլար։