Պողոսից անդին….ժողովուրդն է

Լավ, հարգելի ժողովուրդ, չե՞ք հասկանում, որ ձեզ օգտագործում են արդեն քրքրված թաշկինակի պես: Այն թաշկինակի, որը վաղուց էլ օգտագործման ենթակա չէ, բայց դեն չեն նետում, այն կարող է ծառայել մինչև վերջին շունչը, որ դրա մեջ փաթաթեն թոշակից մնացած վերջին կոպեկներն ու պահ տան ցեցը կերած դոշակին:

Իշխանությունը  հեղափոխության առաջամարտիկից շատ շուտ վերածվեց հեղափոխության Ռոբեսպիերի, որն ինքն էլ դեմ չէր թագավոր դառնալ: Հիմա դիմում է ցանկացած քայլի, երբեմնի հիվանդ երևակայությունն ու այլասերված երազանքներն ի կատար ածելու համար օգտագործում է Ձեզ, հենց ձեզ: Իսկ դուք ընդամենը մի քանի ամիս առաջ նրա համար անգետ «Պողոսներ» էիք, որն ունակ չէր ճշմարիտ որոշում կայացնելու: Պատճառը պարզ է, այն ժամանակ մեծամասնության կարծիքը մի տեսակ չէր բռնում իրենց դիրքորոշման ու այդ պահի շահի հետ: Սակայն մի քանի ամիս անց «Պողոսներն» ինչ որ հրաշքով էվոլյուցիա ապրեցին, աճեցին, դարձան ժողովուրդ, Ազիմովի նկարագրած կոլեկտիվ բանականության հզորագույն բաստիոն, ու այսօր իշխանությունն իր համար ճակատագրական որոշում կայացնելու համար դիմում է արդեն ժողովրդին: Ձեզ: «Պողոսներին» չէ, ձեզ, ժողովրդին: Բա ի՞նչ փոխվեց: Մի քանի ամսվա մեջ վերևից լույս իջա՞վ «Պողոսների» ուղեղներին:

Իրականում ժամանակին ճիշտ էին, էլի եմ կրկնում, ամբոխներն ունակ չեն ճշմարիտ որոշում կայացնել: Ամբոխները մտածել չգիտեն, եթե իմանային, դուք անգամ մոտ չէիք գա իշխանական աթոռին: Ոչ դուք, ոչ էլ ձեզ նախորդած ցանկացած ոք: Ամբոխները միայն կերակրկվում են ձեր սարքած տեսարաններով, եթե ժամանակին նրանց նաև հաց էր պետք, հիմա դրա կարիքն էլ չունեն:

Այնպես որ, պարոնա՛յք, դուք ազնիվ չեք, դուք ստում եք շարքային չինովնիկի պես, նույնիսկ եթե այդպես չեք մտածում: Շեֆին հաճոյանալու գայթակղությունից մթագնում են անգամ ամենապայծառ ուղեղները:

Իսկ ժողովրդին կանչում են հանրաքվեի: Այն ժողովրդին, որի մեծամասնությունն անգամ չգիտի, թե ինչ ասել է սահմանադրություն, որն է դրա դերը պետության մեջ ու ընդհանրապես, իր ինչին է պետք այդ սահմանադրությունը: Դրանից ոչ նրա աշխատավարձն է բարձրանում, ոչ էլ հողն է ավելի բերրի դառնում:

Հիմա ձեզ ասում են ժողովուրդ ու «Պողոսի» տեղ դնելով,  ցույց են տալիս ընտրատեղամասը: Այնտեղ գնալով՝ դուք պատասխանում եք հարցին՝ ժողովո՞ւրդ եք, թե՞ «Պողոս»:

Աղվան Ասոյան