Վրաստանի վարչապետը վարակվել է կորոնավիրուսի օմիկրոն շտամով

Վրաստանի վարչապետ Իրակլի Ղարիբաշվիլին վարակվել է կորոնավիրուսի օմիկրոն շտամով։ Այս մասին տեղեկացնում են Վրաստանի վարչապետի մամուլի ծառայությունից։

Հաղորդվում է, որ Իրակլի Ղարիբաշվիլին իրեն լավ է զգում և շարունակում է հեռավար աշխատել։

«Վարչապետն ավարտել է պատվաստումների ամբողջական կուրսը: Նրա մոտ պլանային թեստավորման շրջանակներում Covid-19 է ախտորոշվել»,- հայտնել են կառավարության աշխատակազմից:

Վրաստանում կորոնավիրուսով վարակվածների մեկուսացման ժամկետը 8 օր է։

Ղարիբաշվիլին նախկինում և վարակվել է կորոնավիրուսով. վարակը հայտնաբերվել է 2021 թվականի ապրիլի 6-ին, իսկ երկու շաբաթ անց՝ ապրիլի 20-ին, հայտարարվել է, որ վարչապետն ապաքինվել է։ Այդ ժամանակ նա պատվաստված չէր կորոնավիրուսի դեմ, թեև երկրում պատվաստումն արդեն սկսվել էին։

Առողջապահության նախարարությունում դա բացատրել են նրանով, որ այն ժամանակ պատվաստում էին միայն բարձր ռիսկային խմբի մարդկանց՝ բուժհաստատությունների աշխատակիցներին ու տարեցներին։