Փաշինյանը պատերազմի խորհրդանիշ է․ չի ուզում կամավոր գնալ, ուրեմն ժողովուրդը կհեռացնի․ Շարմազանով

Անհնազանդության երթի ժամանակ լրագրողների հետ զրույցում ՀՀԿ խոսնակ Էդուարդ Շարմազանովը նշել է՝ իշխանությունները փորձում են իրենք իրենց համոզել, որ ամեն ինչ նորմալ է, իրավիճակն իրենց վերահսկողության տակ է։

«Իշխանությունները զգում են  մոտալուտ վտանգը, իրենք հանրային վստահություն, լեգիտիմություն չունեն։ Ինչքան էլ ուզում են մեծ-մեծ խոսեն, սա ժողովրդական, ազգային շարժում է։ Փաշինյանը  չի կարող երկու անգամ նույն գետը մտնել։  Նա մի անգամ ժողովրդին խաբել է, երկրորդ անգամ խաբել չի ստացվի։ Նա պետք է  հեռանա։ 

Մենք պետք է դուրս վռնդենք  կապիտուլյանտների «շայկային», որոնք մեր 30-ամյա հաղթանակները  սարքեցին  պարտություն, պատերազմ բերեցին, Նիկոլը պատերազմի  խորհրդանիշ է։ Չի ուզում կամավոր գնալ, ուրեմն ժողովուրդը  պետք է խաղաղ անհնազանդության ակցիաներով ցույց տա այդ մարդուն ու իր խունտային, որ իրենք անելիք չունեն, պետք է գնան»,- ասաց Շարմազանովը։