Տպավորություն է ստեղծվում, որ սա ոչ թե պետություն է, այլ իրենց սեփական «դուքյանը». Վահագն Սարոյան

Ռազմական փորձագետ Վահագն Սարոյանի ֆեյսբուքյան գրառումը․ «Այսօրվա պատասխանատուները իրենց մարզային այցելությունները որքան էլ փորձեն ներկայացնել որպես «կուսակցական հանդիպումներ», իրականում ակնհայտորեն կապված են ընտրությունների հետ։ Ուզեն թե չուզեն՝ դրանք վերածվում են նախընտրական քարոզարշավի։ Ինչ անուն էլ տան՝ փաստը մնում է փաստ. սա նախընտրական քարոզարշավ է, որն այս փուլում անթույլատրելի է, օրենքով արգելված է, հակառակն անելու համար օրենքը սահմանում է պատիժ: Սակայն իշխանությունն այս մարդկանց պատկերացմամբ օրենքից վեր գտնվել է, ոչ թե պատասխանատվություն:

Չեմ անդրադառնա այդ այցերի էթիկա-էսթետիկական կողմին, զուտ մակարդակի հարց է: Միայն թե պարզից էլ պարզ է, որ այս իշխանությունները վերարտադրվելու համար օրենքներ են խախտում, ուժ են կիրառում, ռեպրեսիաներ են կիրառում` դրանք ձևակերպելով այնպես, ինչպես իրենց է հարմար: Տպավորություն է ստեղծվում, որ սա ոչ թե պետություն է, այլ իրենց սեփական «դուքյանը», որտեղ անում են այն, ինչ ուզում են և ինչպես ուզում են՝ միայն թե աթոռը հավերժ պահեն։

Իսկ երբ խոսքը վերաբերում է արտաքին քաղաքականությանը կամ դրսում իրենց «տեսած պահելուն» ու անվտանգությանը, ապա այդտեղ կարող են բամբասել Հայոց Սուրբ եկեղեցուց, հպարտանալ պարտությամբ, պատրաստակամորեն կատարեն առաջադրված «տնային աշխատանքները»՝ հաճոյանալով Ադրբեջանին ու Թուրքիային։ Եթե դրա համար նույնիսկ վտանգավոր գին պետք է վճարի պետությունը, դա արդեն նրանց համար երկրորդական է․ մնացածը պարզապես տեխնիկայի հարց է։
Ինչ անում են՝ հանուն աթոռին մնալու համար են անում»: