Իրանը և Օմանը մտադրված են լուծել Հորմուզով անցման վճարի հարցը

Իրանն ու Օմանը որոշում կկայացնեն այն վճարի չափի վերաբերյալ, որը նրանք գանձելու են Հորմուզի նեղուցով անցնող արևմտյան երկրների նավերից: Այդ մասին ՏԱՍՍ-ին հայտնել է Մոսկվայում Իրանի դեսպան Քազեմ Ջալալին։

«Այդ հարցի շուրջ Իրանը և Օմանը բանակցություններ են վարում: Ինչպես նշել էին իսլամական հանրապետության իշխանությունները և ԱԳՆ-ն, մենք Օմանի հետ որոշումներ ենք կայացնում Հորմուզի նեղուցի անվտանգության և դրանով նավերի անցման ռեժիմի վերաբերյալ», - ասել է դիվանագետը։

«Նեղուցով անցման ծառայությունների փոխհատուցումը և դրանց արժեքը մեր բանակցությունների առարկան են: Ապագայում այդ հարցերի վերաբերյալ համապատասխան որոշում կկայացվի», - հավելել է նա։

Ավելի վաղ Մոսկվայում Իրանի դեսպանը ՏԱՍՍ-ին հայտնել էր, որ Թեհրանը կպահպանի Հորմուզի նեղուցով ռուսական նավերի անցման հատուկ ռեժիմը։

Փետրվարի 28-ին ԱՄՆ-ն և Իսրայելը պատերազմ սկսեցին ընդդեմ Իրանի: Իսլամական հեղափոխության պահապանների կորպուսը հայտարարեց պատասխան գործողության մասին: Իրանի իշխանությունները փակեցին Հորմուզի նեղուցը ԱՄՆ-ի և Իսրայելի հետ կապված նավերի համար: Նավագնացությունը ջրային զարկերակով փաստացի դադարեցվել էր: Նեղուցով տեղափոխվում է նավթի համաշխարհային առևտրի մոտ 25%-ը և հեղուկ բնական գազի (ՀԲԳ) շուրջ 20%-ը։ Հունիսին Վաշինգտոնն ու Թեհրանը ստորագրեցին փոխհըմբռնման հուշագիր՝ բոլոր ճակատներում ռազմական գործողությունների անհապաղ դադարեցման վերաբերյալ: Հուլիսի 7-ի լույս 8-ի գիշերը ԱՄՆ-ն վերսկսեց հարվածներն Իրանի ուղղությամբ՝ նրան մեղադրելով պայմանավորվածությունների, այդ թվում՝ Հորմուզի նեղուցի մասով, պայմանները խախտելու մեջ: ԱՄՆ նախագահ Դոնալդ Թրամփը հուլիսի 10-ին հայտարարել է, որ Իրանի հետ հրադադարի ռեժիմն այլևս չի գործում, սակայն բանակցությունները շարունակվում են։

Հուլիսի 24-25-ին Թեհրանում բանակցություններ են տեղի ունեցել Իրանի և Օմանի միջև՝ Հորմուզի նեղուցում նավագնացության հարցի շուրջ։ Կողմերը պայմանավորվել են շարունակել տեխնիկական խորհրդատվությունները։