Փաշինյանը գերագնահատեց իր քաշն ու աշխատանք չտարավ ԵԱՀԿ ՄԽ-ի հետ. Արմեն Աշոտյան

«ԵԱՀԿ ՄԽ այս հայտարարությունը իշխանափոխությունից հետո առաջին ծավալուն, ծրագրային , համեմատաբար ուղիղ խոսքն է բանակցային գործընթացի առկա իրավիճակի մասին: Ես գնահատում եմ այն որպես բանակցային գործընթացը պահպանելու եւ հնարավոր ռազմական գործողությունների վերսկսումը կանխելու փորձ՝ կողմերին ուղղված հստակ ուղերձներով »,- 5 TV-ի հետ զրույցում անդրադառնալով ԵԱՀԿ ՄԽ համանախագահների հայտարարությանը, ասել է ԱԺ արտաքին հարաբերությունների մշտական հանձնաժողովի նախկին նախագահ Արմեն Աշոտյանը։

Նրա խոսքով, վտանգ կա, որ ղարաբաղյան կարգավորման գործընթացում Նիկոլ Փաշինյանի շտապողականության, սիրողականության և ավելորդ ինքնավստահության հետեւանքով գրեթե մեկ տարի անց մեզ վերադարձնում են ելակետային դիրքերին, ցավոք՝ առանց Վիեննայի, Սանկտ Պետերբուրգի եւ Ժնեւի պայմանավորվածությունների կատարման անհրաժեշտության մասին հիշատակման։ «Սա շատ ուշագրավ հայտարարություն է, որը փաստացի պատասխանն է Նիկոլ Փաշինյանի խոստումներին՝ վերադարձնել Արցախը բանակցային սեղանին:

Այդ խոստումները, իհարկե, լավն էին, բայց փաստացի բախվում են դիվանագիտական ձախողման, և ԵԱՀԿ ոչ մի համանախագահ այս մեկ տարվա ընթացքում և այս հայտարարությամբ չի սատարել Հայաստանի նախաձեռնությանը: Այստեղ Նիկոլ Փաշինյանը իր քաշը գերագնահատել է, իր կատարած իշխանափոխության քաղաքական կապիտալիզացիայի հնարավորությունը գերագնահատել է և աշխատանք չի տարել ԵԱՀԿ համանախագահների հետ»,-շեշտել է Աշոտյանը: Ըստ նրա, այժմ ստանում ենք այն, ինչ ստանում ենք :

Վիեննայի, Սանկտ Պետերբուրգի եւ Ժնեւի պայմանավորվածությունները Ադրբեջանի դիվանագիտական պարտությունն էին 2016-ի ապրիլի պատերազմից հետո: «Այս շաբաթների ընթացքում ես բարձրաձայնում էի, որ չի կարելի հրաժարվել այդ պայմանավորվածություններից, չի կարելի Դուշանբեով բավարարվել, չի կարելի Ադրբեջանական իշխանություններին հղում տալ՝ ասելով , որ իրենք ասում են , որ նման պայմանավորվածություն չի եղել, ինչպես անում էր Փաշինյանը:

Այս ամենը, ցավոք, շատ-շատ կանխատեսելի էր եւ մեր իշխանությունների ապիկար արտաքին քաղաքականության դրսևորումներից մեկն էր: Ցավով եմ ասում, որովհետև, եթե ներքաղաքական տարաձայնությունների դեպքում մենք կարող ենք յուրաքանչյուրս մնալ մեր կարծիքին, ապա արտաքին քաղաքականության, անվտանգության , Ղարաբաղի հարցի պարագայում ներքին քաղաքական տարաձայնություն չպետք է լինի, և Նիկոլ Փաշինյանն ու իր թիմը պետք է ականջալուր լինեին մեր քննադատությանն ու մեր առաջարկություններին, որպեսզի , ի վերջո, բանակցային գործընթացի մասին տեղեկություններ ստանային Սերժ Սարգսյանից և Էդուարդ Նալբանդյանից, ոչ թե Իլհամ Ալիևից»: