«Թող վերադառնա նախկին Թրամփը». Մեքսիկայի նախկին նախագահ

Մեքսիկայի նախկին նախագահ Անդրես Մանուել Լոպես Օբրադորը կարծում է, որ ամերիկացի առաջնորդ Դոնալդ Թրամփի վերաբերմունքի կտրուկ փոփոխությունը հանրապետության նկատմամբ կապված է նրա շրջապատի վնասակար ազդեցության հետ։ Այս մասին ասվում է քաղաքական գործչի՝ X սոցիալական ցանցում հրապարակված հայտարարության մեջ։

«Թրամփի զարմանալի փոփոխությունը ես վերագրում եմ նրա կեղծ ընկերներին, ինչպես նաև ներքին և արտաքին խորհրդատուներին, որոնք նրան ներքաշում են ստոր և չարագուշակ արկածախնդրությունների մեջ», - գրել է նախկին նախագահը։ Պետության նախկին ղեկավարը հույս է հայտնել, որ Թրամփը կսթափվի, կհրաժարվի իրեն շրջապատող «մանիպուլյատորներից ու սրիկաներից» և կվերադառնա կառավարման իր նախկին ոճին։ «Հանուն ընդհանուր բարօրության՝ թող վերադառնա նախկին Թրամփը», - եզրափակել է քաղաքական գործիչը։

Իր ուղերձում Մեքսիկայի նախկին առաջնորդը նաև անվերապահ աջակցություն է հայտնել պետության գործող ղեկավար Կլաուդիա Շեյնբաումին։ Վաշինգտոնի կողմից վերջին հարձակումների ֆոնին նա ամերիկացի որոշ պաշտոնյաների մեղադրել է միգրացիայի և թմրահանցագործությունների դեմ պայքարի պատրվակով ինտերվենցիոնիստական գործելաոճ կիրառելու մեջ։ Նրա կարծիքով՝ այդ հարձակումներն ուղղված են ԱՄՆ-ում նոյեմբերյան ընտրությունների նախաշեմին Մեքսիկայում իշխող կուսակցության թուլացմանը։

Նախկին նախագահը հիշեցրել է, որ իրենց համատեղ աշխատանքի ընթացքում Թրամփը զերծ է մնացել մեքսիկացիների հասցեին կտրուկ արտահայտություններից, խոչընդոտներ չի ստեղծել արտահանման համար և լսել է Մեխիկոյի կարծիքը։ Մասնավորապես, ըստ քաղաքական գործչի, անցյալում Թրամփն իր խորհրդով հրաժարվել է մեքսիկական թմրակարտելները ահաբեկչական կազմակերպություններ ճանաչելու գաղափարից, ինչպես նաև օգնել է ապացուցել Մեքսիկայի պաշտպանության նախկին նախարար Սալվադոր Սիենֆուեգոսի դեմ ամերիկյան մեղադրանքների շինծու լինելը։