Մոլդովայի նախկին նախագահը իշխանություններին մեղադրել է ընտրությունների կեղծման մեջ

Մոլդովայի նախագահ Մայա Սանդուն և նրա իշխող «Գործողություն և համերաշխություն» կուսակցությունը կեղծել են նախագահական, խորհրդարանական ընտրությունները և ԵՄ ինտեգրման հանրաքվեն արևմտյան երկրներում բացված ավելի քան 200 ընտրատեղամասերում։ Ինչպես փոխանցում է ՏԱՍՍ-ը, նման մեղադրանքով «TVS-21» հեռուստաալիքի եթերում հանդես է եկել Մոլդովայի նախկին նախագահ, ընդդիմադիր Կոմունիստների կուսակցության առաջնորդ Վլադիմիր Վորոնինը։

«Ես մեղադրում եմ երկրի իշխանություններին, արտաքին գործերի նախարարությանը և դեսպանատներին այն բանում, որ նրանք ստիպել են կեղծել ընտրությունների արդյունքները՝ ինչպես նախագահական, այնպես էլ խորհրդարանական, ինչպես նաև ԵՄ ինտեգրման հանրաքվեի։ Նրանք ամեն ինչ կեղծել են, իսկ նրանք, ովքեր հրաժարվել են մասնակցել կեղծիքներին, արդեն հաջորդ օրը դեսպաններ չէին», - ասել է Վորոնինը։

2024 թվականի աշնանը Մոլդովայում տեղի ունեցած նախագահական ընտրություններում Սանդուն երկրի ներսում պարտվել էր նախկին գլխավոր դատախազ Ալեքսանդր Ստոյանոգլոյին, ձախողվել էր նաև նրա կազմակերպած ԵՄ անդամակցության հանրաքվեն։ Իշխանություններին հաջողվել էր իրենց օգտին արդյունքի հասնել արևմտյան երկրներում աշխատանքային միգրանտների ձայների հաշվին, որտեղ բացվել էր ավելի քան 200 ընտրատեղամաս։ Նույն սցենարով 2025 թվականի աշնանը անցան խորհրդարանական ընտրությունները, որոնք երկրի ներսում տանուլ տվեց իշխող «Գործողություն և համերաշխություն» կուսակցությունը։ Խորհրդարանում մեծամասնությունը պահպանել նրանց հաջողվեց նաև արտասահմանյան տեղամասերի ձայների հաշվին, որտեղ ընտրողների ճնշող մեծամասնությունը քվեարկել էր իշխանության օգտին։ Նախկին նախագահ Իգոր Դոդոնը, նախկին վարչապետ Վասիլի Տարլևը և ընդդիմության այլ առաջնորդներ հրաժարվեցին ճանաչել քվեարկության արդյունքները՝ իշխանություններին մեղադրելով կեղծիքների մեջ։

ԱՄՆ Կոնգրեսի Ներկայացուցիչների պալատի իրավաբանական հանձնաժողովի հետաքննության արդյունքների վերաբերյալ զեկույցում նշվում է, որ Եվրահանձնաժողովը (ԵՀ) կանոնավոր կերպով միջամտել է ԵՄ երկրների ընտրություններին՝ օգտագործելով իր «Թվային ծառայությունների մասին» օրենքը (Digital Services Act, DSA): Հետաքննության մեջ նշվում է, որ 2023 թվականից, երբ DSA-ն ուժի մեջ է մտել, ԵՀ-ն գրաքննության է ենթարկել սոցցանցերի բովանդակությունը Սլովակիայում, Ֆրանսիայում, Նիդերլանդներում, Մոլդովայում, Ռումինիայում տեղի ունեցած ընտրություններից առաջ, ինչպես նաև 2024 թվականի հունիսին կայացած ԵՄ ընտրություններից առաջ։ ԵՀ-ն կանոնավոր կերպով հանդիպումներ է հրավիրել ազգային կարգավորիչների հետ՝ «քննարկելու, թե որ քաղաքական կարծիքը պետք է ենթարկվի գրաքննության»։ Հանձնաժողովը նաև օգնել է կազմակերպել «արագ արձագանքման համակարգեր»՝ ոչ ցանկալի բովանդակության նկատմամբ։