ՔՊ-ում և ՔԿ-ում դժգոհ են Աննա Վարդապետյանից. քննչական-դատախազություն հակամարտությունը սրվում է. News.am

News.am-ի տեղեկություններով՝ ամիսներ շարունակ Ամենայն Հայոց Կաթողիկոսին հրաժարական պարտադրելու գործին լծված ՔՊ-ական վերնախավը վերջին շրջանում իր դժգոհությունն է հայտնել գլխավոր դատախազ Աննա Վարդապետյանի դրսևորած կրավորական կեցվածքի վերաբերյալ:
Բանն այն է, որ բացի նախարարներից և ՔՊ-ական պատգամավորներից, Փաշինյանի կազմակերպած մայրաքաղաքային և արտագնա «պատարագներին» ակտիվորեն մասնկացում են ԱԱԾ-ի, ոստիկանության, անգամ մարզային քննիչներ: Օրինակ, ըստ ականատեսների՝ նախորդ տարվա դեկտեմբերի 7-ին Նիկոլ Փաշինյանի օրակարգով ու իշխանական ողջ վերնախավի մասնակցությամբ Արմավիրից հրավիրված քահանայի ձեռամբ տեղի ունեցած «պատարագին» մասնակցում էր անձամբ ԱԱԾ Շիրակի մարզային կառույցի ղեկավարը, ինչպես նաև քննչական կոմիտեի Շիրակի մարզային վարչության որոշ քննիչներ:

Մեր տեղեկություներով՝ ՔՊ-ականները մասնավոր զրույցներում դժգոհել են, թե ինչու՞ պետք է իրենք ողջ օրը ֆեյսբուքում գրառումներ անեն, ուղիղ եթերներով քաղաքացիներին կոչեր անեն, մասնակցեն Փաշինյանի կազմակերպած պատարագներին, սակայն Աննա Վարդապետյանը իր ղեկավարած կառույցից որևէ ներկայացուցիչ չուղարկի՝ մարդաքանակ ապահովելու համար: Փոխարենն իր, իբր քաղաքականությանը չխառնվելու արդարացումով, չեզոք դիրք ընդունելու ֆոն ապահովելով, շարքային դատախազների արձանագրած ձեռքբերումներն իրեն վերագրելով դիրքավորվելով որպես «հանրության սրտի դատախազ» , ինչպես նաև մանկատներ այցելելու և երեխաների նամակներին պատասխանելու PR ակցիաներով փորձի «իրենով անել» Փաշինյանի ընտրազանգավածին: ՔՊ-ականները կարծիք են հայտնել, որ դատախազն իրեն բարձր է դասում բոլորից և հետագայում կարող է «լուրջ սպառալիք» դառնալ հենց Փաշինյանի համար:

News.am-ի տեղեկություններով՝ ՔՊ-ի դժգոհությունների ֆոնին, վերջին շրջանում էլ ավելի են սրվել նաև Վարդապետյանի և իր նախկին տեղակալ , այսօր արդեն Քննչական կոմիտեի նախագահի պաշտոնը զբաղեցնող Արթուր Պողոսյանի հարաբերությունները:

Ըստ ՔԿ-ի մեր աղբյուրերի՝ շարքային քննիչները այլևս չեն կարողանում արդյունավետ համագործակցել դատախազների հետ, քանի որ Վարդապետյանի «քմահաճույքների» պատճառով հսկող դատախազներից մշտապես հակառակ ցուցումներ են ստանում և ստիպված են լինում արդեն իսկ քննած գործերը «քնեցնել», առաջադրած մեղադրանքները վերաորակել, կարճած գործերը վերաբացել և այլն:

Արթուր Պողոսյանը մասնավոր զրույցներում հաճախ է դժգոհում  Վարդապետյանից, սակայն հաշվի առնելով, որ նրա երաշխավորությամբ է նշանակվել ՔԿ ղեկավարի պաշտոնին, շարունակում է քծնել նախկին «շեֆին», իսկ համակարգի ներսում առկա իրավացի բողոքներն անտեսել:

Չնայած արդեն իսկ առկա բացահայտ լարվածությանը, Վարդապետյանը շարունակում է վերևից նայել ՔՊ-ականներին և ողջ դատաքննչական համակարգին՝ պարծենալով, որ իր զբաղեցրած պաշտոնն «անձեռնմխելի է», քանի որ ինքը վայելում է Նիկոլ Փաշինյանի և նրա կնոջ՝ Աննա Հակոբյանի անձնական  աջակցությունը: