Հոռետեսության պատճառ չկա, Գերմանիան լավագույն տարիներն առջևում ունի․ Ֆրիդրիխ Մերց

Գերմանիայի կանցլեր Ֆրիդրիխ Մերցը կարծում է, որ իր երկրին, չնայած բոլոր տնտեսական դժվարություններին, առջևում սպասում են շատ լավ ժամանակներ։

«Հոռետեսության և մեր երկրի ապագան մռայլ գույներով պատկերելու ոչ մի պատճառ չկա», - ասել է Մերցը՝ ելույթ ունենալով Արևելագերմանական տնտեսական ֆորումում, որն ընթանում է Բադ Զարով համայնքում (Բրանդենբուրգ դաշնային երկրամաս)։ Հեռարձակումն իրականացրել է «Phoenix» հեռուստաալիքը։

«Մեր երկրի համար լավագույն ժամանակները հետևում չեն մնացել, այլ շատ լավ տարիներ են սպասվում առջևում՝ արևելյան Գերմանիայում, արևմտյան Գերմանիայում, ԳՖՀ-ում՝ ընդհանուր առմամբ, և Եվրոպայում, եթե մենք հիմա միասին աշխատենք այդ ուղղությամբ, այլ ոչ թե միմյանց դեմ», - ասել է նա՝ կոչ անելով մի կողմ դնել «կուսակցական-քաղաքական խաղերը» հանուն երկրի ապագայի։